ތުއްތު ދަރިފުޅަށް ދެވޭ ވެކްސިންތަކަކީ ދަރިފުޅުގެ ދިފާޢީ ނިޒާމް ވަރުގަދަކޮށްދީ އެދަރިފުޅަށް ދިމާވެދާނެ އެތައް ބައިވަރު ނުރައްކާތެރި ބަލިތަކަކުން ރައްކާތެރި ކުރުވާ އެއްޗެކެވެ. އެހެންކަމުން ވެކްސިން ތާވަލާއި އެއްގޮތަށް ޤަވާޢިދުން ވެކްސިން ދިނުމަކީ ވަރަށް މުހިންމުކަމެވެ.
އުފަންވުމާއެކު:
SPONSORED


- ބީ.ސީ.ޖީ ވެކްސިން: މިވެކްސިން އަކީ ކެއްސުން ބަލި ނުވަތަ ޓީ.ބީ އިން ރައްކާތެރިވުމަށްޓަކައި ދެވޭ ވެކްސިނެކެވެ. ދަރިފުޅު އުފަންވުމާއިއެކު ލަސްނުކޮށް މިވެކްސިން ދޭންޖެހެއެވެ. އަދި މިވެކްސިނަކީ އުމުރުން އެއްފަހަރު ދެވޭ ވެކްސިނެކެވެ. ބީ.ސީ.ޖީ ވެކްސިންޖެހުމުން ވެކްސިންޖަހާތަން ކުޑަކޮށް ދުޅަވެއެވެ. އަދި އެތަން ފަސޭހަ ވާއިރު ލަކުނު ލާފައި ހުރެއެވެ.
- ޕޯލިއޯ ވެކްސިން: ދަރިފުޅު އުފަންވުމާއިއެކު ޕޯލިއޯ ވެކްސިންގެ ފުރަތަމަ ޑޯޒް ދޭންޖެއެވެ. މިވެކްސިންއަކީ ޖުމްލަ ހަތަރު ޑޯޒް ދެވޭ ވެކްސިނެކެވެ. ޕޯލިއޯ ވެކްސިން އަކީ ވާބަލިން ދަރިފުޅު ރައްކާތެރި ކުރުމަށްޓަކައި ދެވޭ ވެކްސިނެކެވެ. ޕޯލިއޯ ވެކްސިން ދެގޮތަކަށް ދެވެއެވެ. އެއީ އަނގަޔަށް (އޯ.ޕީ.ވީ) ވެކްސިން ދިނުމާއި އިންޖެކްޝަން ޖަހައިގެން (އައި.ޕީ.ވީ) ވެކްސިން ދިނުމެވެ. ރާއްޖޭގައި ޕޯލިއޯ ވެކްސިން ދިނުމުގައި ފުރަތަމަ ތިން ޑޯޒް ދެނީ އަނގަޔަށެވެ. އަދި ހަތަރު ވަނަ ޑޯޒް ދެނީ އިންޖެކްޝަން ޖަހައިގެންނެވެ.
- ހެޕަޓައިޓިސް ބީ ވެކްސިން: ހެޕަޓައިޓިސް ބީ އަކީ ގޮހޮރަށް ޖެހޭ ނުރައްކާތެރި ބައްޔަކަށް ކިޔާ ނަމެކެވެ. މިވެކްސިން ދެވެނީ އެބަލިން ރައްކާތެރި ވުމުގެ ގޮތުންނެވެ. ހެޕަޓައިޓިސް ބީ ވެކްސިންއަކީވެސް އާންމުކޮށް 3 ޑޯޒް ދެވޭ ވެކްސިނެކެވެ. ދަރިފުޅު އުފަންވާތާ 24 ގަޑިއިރު ތެރޭގައި މިވެކްސިންގެ ފުރަތަމަ ޑޯޒް ދޭންޖެހެއެވެ. މިވެކްސިން ދިނުމުން ވެކްސިންޖަހާތަން ކުޑަކޮށް ދުޅަވެ ހުން އައުން އެކަށީގެންވެއެވެ.
އުމުރުން ދެމަހުގައި:
- ޕޯލިއޯ ވެކްސިން: ދަރިފުޅުގެ އުމުރުން ދެވަނަ މަހުގައި ޕޯލިއޯ ވެކްސިންގެ ދެވަނަ ޑޯޒް ދޭންޖެހެއެވެ.
- ޕެންޓަވެލަންޓް: މިވެކްސިންއަކީ ތަފާތު 5 ވައްތަރެއްގެ ބައްޔަކުން ރައްކާތެރިވުމަށް ދެވޭ ވެކްސިނެކެވެ. އެގޮތުން މިވެކްސިންއިން ކަރުފޮޅު، ހޯއްގޮވާ ކެއްސުން، އިދިފުށަށްދަމާ ބަލި، ހެޕަޓައިޓިސް ބީ އަދި ހިމޯފިލަސް އިންފުލުއެންޒާ ޓައިޕް ބީގެ ސަބަބުންޖެހޭ، މެނިންޖައިޓިސް، ނިއުމޯނިޔާ ފަދަ ބަލިތަކުން ރައްކާތެރިކޮށްދެއެވެ. މިވެކްސިން ޖެހުމުގެ ސަބަބުންވެސް ދަރިފުޅަށް ބައެއް އުނދަގޫތައް ކުރިމަތިވެއެވެ. އޭގެތެރޭގައި އިންޖެކްޝަންޖަހާތަނަށް ތަދުވުމާއި، ރަތްވުން އަދި ކުޑަކޮށް ދުޅަވުން އެކަށީގެން ވެއެވެ. މީގެ އިތުރުން ދަރިފުޅު އާދަޔާ ޚިލާފަށް ރުއިމާއި، ހޮޑުލެވުމާއި އަދި ކާހިތް ނުވުން ހިމެނެއެވެ.
އުމުރުން ހަތަރު މަހުގައި:
- ޕޯލިއޯ ވެކްސިން: ޕޯލިއޯ ވެކްސިންގެ ތިންވަނަ ޑޯޒް އުމުރުން ހަތަރުވަނަ މަހުގައި ދޭންޖެހެއެވެ.
- ޕެންޓަވެލަންޓް: މިވެކްސިންގެ ދެވަނަ ޑޯޒް ދޭންޖެހެނީ ދަރިފުޅުގެ އުމުރުން ހަތަރުވަނަ މަހުގެ ތެރޭގައެވެ.
އުމުރުން ހަމަހުގައި:
- ޕޯލިއޯ ވެކްސިން: ޕޯލިއޯ ވެކްސިންގެ ހަތަރުވަނަ ޑޯޒް އުމުރުން ހަމަހުގައި ދޭންޖެހެއެވެ.
- ޕެންޓަވެލަންޓް: މިވެކްސިންގެ ތިންވަނަ ޑޯޒް ދޭންޖެހެނީ އުމުރުން ހަމަހުގައެވެ.
އުމުރުން ނުވަ މަހުގައި:
- މީސްލްސް: މިވެކްސިންއަކީ ހިމަބިހިން ރައްކާތެރި ވުމަށް ދެވޭ ވެކްސިންއެކެވެ.
- ވިޓަމިން އޭ: ވިޓަމިން އޭ ކެޕްސިއުލް އަކީ ދިފާޢީ ނިޒާމް ވަރުގަދަކޮށް ބަލިތަކުން ރައްކާތެރިވުމަށް ދެވޭ ކެޕްސިއުލްއެކެވެ. ދަރިފުޅުގެ އުމުރުން ނުވަ މަހުގައި ވިޓަމިންއޭގެ ފުރަތަމަ ޑޯޒް ދޭންޖެހެއެވެ.
އުމުރުން އަށާރަ މަހުގައި:
- އެމް.އެމް.އާރ ވެކްސިން: އެމް.އެމް.އާރ ވެކްސިންއަކީ ކޯފުއްޕި، ރުބެއްލާ އަދި ހިމަބިހިން ރައްކާތެރިވުމަށް ދެވޭ ވެކްސިނެކެވެ. މިވެކްސިން ދިނުމުން އިންޖެކްޝަން ކަށި ޖަހާ ތަނުގައި ރިއްސުމާއި ކުޑަކޮށް ދުޅަވުމަކީ އާންމުކަމެކެވެ. އަދި ކުޑަކޮށް ހުންއައުމާއި، ބޮލުގައި ރިއްސުމާއި، މޭނުބައި ކުރުމާއި، ހޮޑުލެވުމަކީވެސް މިވެކްސިން ދިނުމާއި ގުޅިގެން ވެދާނެކަމެކެވެ. މިއުނދަގޫތައް އާންމުގޮތެއްގައި ކުރިމަތިވަނީ ވެކްސިންދޭތާ ހަފްތާއެއް ފަހުންނެވެ. އެމް.އެމް.އާރ ވެކްސިންއާއި ގުޅޭގޮތުން 1995 ވަނަ އަހަރު ރިސާރޗްކުރާ ގުރޫޕަކުން އާންމުކުރި ލިޔުމެއްގައި އެމް.އެމް.އާރ ވެކްސިން ދިނުމުގެ ސަބަބުން އޯޓިޒަމްއަށް މަގުފަހިކުރުވާކަމަށް ބުނެފައިވާތީ އެޚަބަރު މުޅިދުނިޔޭގައި ފެތުރުމާއި ގުޅިގެން ބައެއް ފަރާތްތަކުން ވެކްސިން ދިނުން ހުއްޓާލިއެވެ. ނަމަވެސް އޭގެ ފަހުން ހެދުނު ރިސާރޗްތަކުން ވެކްސިން ދިނުމާއި އޯޓިޒަމްއާއި ގުޅުމެއް ނުވާކަން ވަނީ ސާބިތުވެފައެވެ.
- ވިޓަމިން އޭ: ދަރިފުޅުގެ އުމުރުން އަށާރަ މަހުގައި ވިޓަމިން އޭ ކެޕްސިއުލްގެ ދެވަނަ ޑޯޒް ދެވެއެވެ.
ވެކްސިން ތާވަލާއި އެއްގޮތަށް އެމް.އެމް.އާރ ފިޔަވައި އެހެނިހެން ވެކްސިންތައް ކުޑަދަރިފުޅުގެ އުމުރުން ބާރަމަސްވުމުގެ ކުރިން ޑޯޒްތައް ފުރިހަމަ ކުރުމަކީ މުހިންމުކަމެކެވެ. އެމް.އެމް.އާރ ދޭނީ ދަރިފުޅަށް އަށާރަ މަސް ފުރުމުންނެވެ.