ޑައުން ސިންޑްރޯމް ކުދިންނަކީ އެކުދިންގެ ދުވަހުން ދުވަހަށް ކުރަންޖެހޭ ކަންތައްތައް ކުރުމަށާއި، އެކުދިންގެ ވަށައިގެންވާ މާހައުލާ ގުޅިގެން އުޅުމަށް އަސަރުކުރާފަދަ ހާއްސަ ތަރައްގީގެ ބޭނުންތަކެއް ހުންނަ ކުދިންނެވެ. އޮކިއުޕޭޝަނަލް ތެރަޕީ (އޯޓީ) އަކީ މިފަދަ ކުދިންނަށް ވީހާވެސް މިނިވަންކަމާއި އިތުބާރާއެކު ދިރިއުޅުމަށް ބޭނުންވާ ހުނަރުތައް ދަސްކޮށްދިނުމަށް އެހީތެރިވެދޭ މުހިންމު ފަރުވާއެކެވެ.
ޑައުން ސިންޑްރޯމްއަކީ ކޮބައިކަމާއި ހެދިބޮޑުވުމުގައި ބޭނުންވާ ކަންކަން ދެނެގަތުން
ޑައުން ސިންޑްރޯމް މެދުވެރިވަނީ 21 ވަނަ ކްރޮމޮސޯމްގެ އިތުރު ކޮޕީއެއް ހުރުމުގެ ސަބަބުންނެވެ. މީގެ ސަބަބުން ޖިސްމާނީ އަދި ސިކުނޑީގެ ތަފާތުތަކެއް ފެންނަ ގޮތް މެދުވެރިވެއެވެ. ކޮންމެ ކުއްޖަކީވެސް ތަފާތު ކުއްޖެއް ނަމަވެސް، އާންމުކޮށް ފެންނަ ތަރައްޤީގެ ގޮންޖެހުންތަކުގެ ތެރޭގައި ހިމެނެނީ:
- ހައިޕޮޓޯނިއާ (މަޑު މަސްގަނޑު): މިކަމުގެ ސަބަބުން މަސްގަނޑުތައް “މަޑު” ގޮތަކަށް ފެނި، ހަށިގަނޑު ބެހެއްޓުމާއި ކޮންކޮންޓްރޯލް ކުރުމަށް އަސަރުކޮށް، އިށީނުމާއި، ފިރުކުމާއި، ހިނގުން ފަދަ ކަންކަން ކުރުމަށް އުނދަގޫވެއެވެ.
- ބޮޑެތި އަދި ކުދި މޫވްމަންޓްތަކުގެ ތަރައްޤީ ލަސްވުން: އެހެން ކުދިންނާ އަޅާބަލާއިރު މިފަދަ ކުދިން ހެލިފެލިވެ އުޅުމުގެ ތަރައްގީގެ ލަނޑުދަނޑިތަކަށް ވާސިލްވުން ލަސްވެދާނެއެވެ.
- ސިކުނޑީގެ ތަރައްޤީ ލަސްވުން: މައްސަލަ ހައްލުކުރުމާއި، ހަނދާން ބެހެއްޓުމާއި، ސަމާލުކަން ދިނުން ފަދަ ކަންކަން ތަރައްގީވުން ލަސްވެދާނެއެވެ.
- އަތާއި ލޮލުގެ ކޯޑިނޭޝާން ދައްވުން: މިކަމުގެ ސަބަބުން އަތުން ލިޔުމާއި، އަމިއްލައަށް ކާން ދަސްކުރުމާއި، އަންނައުނު ލުން ފަދަ ހުނަރުތައް ދަސްވުމަށް އަސަރުކުރެއެވެ.
އަވަހަށް ފަރުވާ ފެށުމާއި އެކުދިންނަށް ހާއްސަކޮށްގެން ދެވޭ ފަރުވާގެ މުހިންމުކަން މިއީ އޮކިއުޕޭޝަނަލް ތެރަޕީ މުހިންމުވާ ހިސާބެވެ.
ޑައުން ސިންޑްރޯމް ހުންނަ ކުދިންނަށް އޮކިއުޕޭޝަނަލް ތެރަޕީގެ މަގްސަދުތައް
އޮކިއުޕޭޝަނަލް ތެރަޕީގެ މައިގަނޑު މަގްސަދަކީ ކުދިންނަށް ގޭގައި، ސްކޫލުގައި އަދި މުޖުތަމަޢުގައި ދުވަހުން ދުވަހަށް ކުރަންޖެހޭ ކަންކަމުގައި ބައިވެރިވުމަށް އެހީތެރިވެދިނުމެވެ. މުހިންމު މަޤްޞަދުތަކުގެ ތެރޭގައި ހިމެނެނީ:
1. ކުދި މަސްތަކުގެ ހުނަރުތައް (ފައިން މޯޓަރ ސްކިލްސް) ރަނގަޅުކުރުން
އޮކިއުޕޭޝަނަލް ތެރަޕީން އަތާއި އިނގިލިތަކުގެ ކުދި މަސްތަކުގެ ހުނަރުތައް ތަރައްގީ ކުރުމަށް އަމާޒުކޮށް، ކުދިންނަށް ތަކެތި ހިފުމާއި، ތަކެތި ބޭނުންކުރުމާއި، ޒިބު އެޅުވުން ފަދަ ކަންކަމާއި، ބޫޓުގެ ނާޑުވާ އެއްސުމާއި، އަދި ލިޔުމަށް އެހީތެރިވެދެއެވެ.
2. ހަށިގަނޑުގެ ބޮޑެތި މަސްތަކުގެ ހަރަކާތްތަކުގެ ކޯޑިނޭޝަން ރަނގަޅުކުރުން
އޮކިއުޕޭޝަނަލް ތެރަޕިސްޓުން، ބެލެންސްކުރުމާއި ހަށިގަނޑު ބަހައްޓާނެގޮތް (ޕޯސްޗަރ) ، އަދި ހަރަކާތްތައް ގުޅުވާލާނެ (ކޯޑިނޭޓްކުރާނެ) ގޮތުގެ މައްޗަށް މަސައްކަތްކުރެއެވެ. މިއީ ހިނގުމަށާއި، ސިޑިން އަރައި ފޭބުމަށް، ނުވަތަ އުނދޯލި ހެއްލައި ކުޅެހެދުމަށް ވަރަށް މުހިންމު ކަންކަމެވެ.
3. ސެންސަރީ އިންޓެގްރޭޝަނަށް އެހީތެރިވުން
ޑައުން ސިންޑްރޯމް ހުންނަ ކުދިން ފާހަގަ ކުރެވެނީ ބައެއް އިހުސާސްތަކަށް ބޮޑަށް އަދި އަނެއްބައި އިހުސާސްތަކުގެ އަސަރު ކުޑަކޮށް ކުރާ ބައެއްގެ ގޮތުގައެވެ. އެގޮތުން އިވޭ އަޑުތަކާއި އެއްޗެއް ނުވަތަ ތަނެއްގައި ބީހުމުން ކުރެވޭ އިހުސާސްތަކަށް ރޭވުންތެރި ހަމަޖެހޭ ގޮތަކަށް، އެ ކުދިންނަށް މިއިހުސާސްތަކުން ކުރާ އަސަރުތައް މެނޭޖްކުރުމަށް އޮކިއުޕޭޝަނަލް ތެރަޕީން އެހީތެރިވެދެއެވެ.
4. އަމިއްލައަށް ނަފްސު ބެލެހެއްޓުމާގުޅޭ ހުނަރުތައް ތަރައްގީކުރުން
މީގެ ތެރޭގައި ހިމެނެނީ ދަތްއުނގުޅުމާއި، ހެދުން ލުމާއި، ފާހާނާ ބޭނުންކުރުމާއި، އަދި އަމިއްލައަށް ކާން ދަސްކޮށްދިނުން ފަދަ އަމިއްލަ ކަންކަން ކުރުމަށް ކުދިންނަށް ދަސްކޮށްދިނުމެވެ. މިކަންކަން ދަސްކޮށްދެނީ ފިޔަވަހިތަކަކަށް ބަހާލައިގެން، ފޮޓޯ ނޮވަތަ ވީޑިއޯ މަންޒަރުތަކުން ނުވަތަ އަތުގައި ހިފައިގެން އިރުޝާދު ދިނުމުގެ ތެރެއިންނެވެ.
5. ސްކޫލަށް ތައްޔާރުވުމާއި ބައިވެރިވުން އިތުރުކުރުން
އޮކިއުޕޭޝަނަލް ތެރަޕިސްޓުން ކުދިންނަށް ކްލާސްރޫމްގެ ބޭނުންތަކަށް ތައްޔާރުވުމަށް އެހީތެރިވެދެއެވެ. މީގެ ތެރޭގައި ހިމެނެނީ ހިމޭނުން އިށީނދެ ތިބުމާއި، ފަންސުރު ހިފެހެއްޓުމާއި، ބޯޑު ބަލައިގެން ނޯޓު ނެގުމާއި، އިރުޝާދުތަކަށް ތަބާވުމާއި، އަދި މަސައްކަތްތައް ނިންމުން ފަދަ ހުނަރުތައް ދަސްކޮށްދިނުމެވެ.
6. އެހެންކުދިންނާއި ބައިވެރިވެގެން އުޅުމާއި، ކުޅުން ކުރިއެރުވުން
ޅަފަތުގެ ކުދިންނަށް ކުޅިވަރަކީ އުނގެނުމުގެ މައިގަނޑު ބައެކެވެ. އޮކިއުޕޭޝަނަލް ތެރަޕީ ސެޝަންތަކުގައި ގިނަފަހަރަށް ހިމެނެނީ މުޢާމަލާތްކުރުމާއި، ހިއްސާކުރުމާއި، އަދި ޖަޒުބާތުތައް ކޮންޓްރޯލްކުރުން ކުރިއަރުވާ އިންޓަރެކްޓިވް ކުޅިވަރެވެ.
ބޭނުންކުރެވޭ ތެރަޕީ އުކުޅުތަކާއި އިންޓަރވެންޝަންތައް
ޒަމާނީ އޮކިއުޕޭޝަނަލް ތެރަޕީގައި ބޭނުންކުރަނީ ހާއްސަކޮށް ފަރުމާކުރެވި، ދިރާސާތަކުން ސާބިތުވެފައިވާ، ކުޅިވަރަށް ބިނާކޮށްފައިވާ އިންޓަރވެންޝަންތަކެކެވެ. އާންމުކޮށް ބޭނުންކުރާ ބައެއް އުކުޅުތައް ތިރީގައި މިވަނީއެވެ:
1. ސެންސަރީ އިންޓެގްރޭޝަން ތެރަޕީ
ވަށައިގެންވާ މާހައުލުން ލިބޭ އިޙްސާސްތައް – މިސާލަކަށް އަތްލުމުން، އަޑުއިވުމުން، އަދި ހަރަކާތްތަކުން ލިބޭ އިޙްސާސްތައް ދޭހަކުރުމަށް ކުދިންނަށް އެހީތެރިވެދެއެވެ.
މިސާލު:
- ހަޑިވާކަހަލަ ޓެކްސްޗަރތަކުން ދުރުހެލިވާ ކުއްޖަކަށް، އިނގިލިން ކުލަޖެއްސުން ނުވަތަ ވެލީގައި ކުޅުން ތަޢާރަފުކުރެވިދާނެއެވެ
- ބެލެންސް ކުރަން އުނދަގޫ ކުއްޖަކަށް ތެރަޕީގައި އުނދޯޔެއް ނުވަތަ ބެލެންސް ބޯޑެއް ބޭނުންކުރެވިދާނެއެވެ.
މި ތެރަޕީއިން އާދަތައް ބައްޓަންކުރުމަށާއި ސެންސަރީ އޯވަރލޯޑްގެ ސަބަބުން ކުރިމަތިވާ ހާލަތްތައް މަދުކުރުމަށް އެހީތެރިވެދެއެވެ.
2. ފައިން މޯޓަރ ހުނަރުތައް ތަރައްޤީކުރުން
އަތުގެ ހުނަރުވެރިކަމާއި ކޯޑިނޭޝަން ރަނގަޅުކުރުމަށް ބޭނުންކުރެވިދާނެ ކަންކަން:
- ފޮތިކޮޅަކަށް ނަރުދަތި ޖެހުން.
- މިނަލަށް ރޮދި ލެއްވުން.
- ޓްވީޒަރސް ބޭނުންކޮށްގެން ކުދި އެއްޗެހި ނެގުން.
- ލިޔުމަށް އެހީތެރިވުމަށް ރޮނގުދަމާފައި ހުންނަ ފޮތް ބޭނުންކޮށްގެން ނުވަތަ ފަންސޫރުފަދަ ތަކެތި ހިފަހައްޓަން ފަސޭހަ ގްރިޕް ބޭނުންކޮށްގެން އަތުން ލިޔުން ފަރިތަކުރުން.
މި މަސައްކަތްތަކުން ލިޔުމުގައާއި، ކެއުމުގައާއި، އަދި ހެދުން ލުންފަދަ ކަންކަމުގައި އަމިއްލައަށް ކަންކަން ކުރުމަށް އެހީތެރިވެދެއެވެ.
3. ގްރޮސް މޯޓަރ ތަމްރީނުތައް
މިއީ ފިޒިކަލް ތެރަޕީއާ އެއްގޮތްކަމެއް ހުރި ނަމަވެސް، އޮކިއުޕޭޝަނަލް ތެރަޕީގައި އަމާޒުކުރަނީ ގްރޮސް މޯޓަރ ހުނަރުތަކުން ދުވަހުން ދުވަހަށް ކުރާ މަސައްކަތްތަކަށް ލިބޭ އެހީއަށެވެ:
- ކްލާހަށް ދިއުމަށް ސިޑިން އަރައި ފޭބުން
- އަންނައުނު ލާއިރު ބެލެންސްކޮށްގެން ހުރުން
- ބޯޅަ އެއްލައި ހިފައި ހެދުން. މީގެ ސަބަބުން ހަށިގަނޑުގެ ހޭލުންތެރިކަމާއި ކޯޑިނޭޝަން އިތުރުވެގެން ދެއެވެ.
ތެރަޕިސްޓުން މިކަންކަން މަޖާކޮށް ގެންދިޔުމުގެ ގޮތުން ސްޓެޕިންގ ސްޓޯންތަކުން ފުންމުން ނުވަތަ ޖަނަވާރުން ހިނގާގޮތަށް ހިނގުން ފަދަކަންކަން ކުރެއެވެ.
4. އަމިއްލަ ނަފްސަށް އަޅާލުމުގެ އާދަތައް ދަސްކުރުން
ކުދިން ދިރިއުޅުމުގެ ހުނަރުތައް ދަސްކުރަނީ:
- ދުވަހު އާދަތައް ކުދި ބައިތަކަކަށް ބަހާލައިގެން (މިސާލަކަށް، އިސްޓާކީނަށް އެރުން، ބޫޓަށް އެރުން، ނާޑުވާ އެއްސުން)
- ފެންނަ ގޮތަށް ތާވަލުތަކާއި ޗެކްލިސްޓުތައް ބަހައްޓައި ބޭނުންކުރުން.
- ހިފަހައްޓަން ފަސޭހަކޮށް ހުންނަ ދަތްއުނގުޅާ ބުރުސް ފަދަ އެކުދިންނަށް ފަސޭހަވާނޭހެން ބަދަލުކޮށްފައިވާ އާލާތްތައް ބޭނުންކުރުމަށް އާދަކުރުވުން
މިކަންކަމުން އެކުދިންގެ އަމިއްލަ މިނިވަންކަމުގެ އިހުސާސް އިތުރުވެ، ބޮޑެތި މީހުންގެ މައްޗަށް ބަރޯސާވާ މިންވަރު މަދުވެއެވެ.
5. ބަދަލުކޮށްފައިވާ އާލާތްތަކާއި ޓޫލްތައް
މި ކުދިންނަށް ހުންނަ ދަތިތައް ފޫބެއްދުަމަށް ބޭނުންކުރެވޭނެ އާލާތްތައް ތެރަޕިސްޓުން ކިޔާދޭނެއެވެ. މިސާލަކަށް:
- ކޮންޓްރޯލް ރަނގަޅުކުރުމަށްޓަކައި ވެއިޓެޑް ޕެންސިލް ބޭނުންކުރުން
- ނާޑުވާ އައްސާހެދުން އުނދަގޫވާނަމަ ވެލްކްރޯ ލާފަ ހުންނަ ބޫޓްބޭނުންކުރުން
- ހިފަހައްޓާބައި ބޮޑުކޮށްހުންނަ ތަށި ސަމުސާ ފަދަތަކެތި ބޭނުންކުރުން
- އަތްތިލަ ވަރުގަދަކުރުމަށް ތެރަޕީ ޕުޓީ ނުވަތަ ރެސިސްޓަންސް ބޭންޑު ބޭނުންކުރުން
މި އާލާތްތައް ހޮވަނީ ކުއްޖާގެ ވަކިވަކި ޤާބިލިއްޔަތާއި ލަނޑުދަނޑިތަކަށް ބަލައިގެންނެވެ.
6. މައިންބަފައިންނާއި މުދައްރިސުން ތަމްރީނުކުރުން
އެންމެ ފައިދާހުރި އޮކިއުޕޭޝަނަލް ތެރަޕީގެ ހަރަކާތްތަކުގެ ތެރޭގައި ހިމެނެނީ ބޮޑެތި މީހުންނަށް ކުއްޖާއަށް އެހީތެރިވާން ދަސްކޮށްދިނުމެވެ. މީގެ ތެރޭގައި ހިމެނިދާނެ ބައެއް ކަންތައްތަކަކީ:
- ސެންސަރީ-ފްރެންޑްލީކޮށް ކުލާސްރޫމް ތައްޔާރުކުރުން
- ދުވަހުގެ އާދަތަކަށް ގޭގައި ފަރިތަކުރުވުން
- މުއާމަލާތްކުރުމާއި ގުޅޭ ބޯޑުތައް ނުވަތަ ކުރެހުމުގެ ތާވަލުތައް ބޭނުންކުރުން
- ސަމާލުކަން ދެމެހެއްޓުމަށް އެހީވުމަށްޓަކައި ހަރަކާތްތަކުގެ ދެމެދުން ހުސްވަގުތުކޮޅެއް ދިނުން
ގޭގައާއި، ސްކޫލުގައާއި އަދި މުޖުތަމަޢުގައި އެއްކޮށްލުން
އޮކިއުޕޭޝަނަލް ތެރަޕީގެ އެންމެ ބޮޑު ފައިދާ ލިބެނީ ކުއްޖާ އުޅޭ ހުރިހާ މާހައުލެއްގައި އެކަން އެއްކޮށްލެވޭ ހިނދުއެވެ:
ގޭތެރޭގައި
ތެރަޕިސްޓުން މައިންބަފައިންނަށް އެހީތެރިވެދެނީ ދަސްކުރުން ދިރިއުޅުމުގެ ކަންކަމާއި ގުޅުވާލުމަށެވެ. މިސާލަކަށް:
- ވިޝުއަލް ޗާޓެއް ބޭނުންކޮށްގެން ދަތްއުނގުޅުން އާދައަކަށް ހަދައިދިނުން.
- ކެއުމުގެ ވަގުތުތަކުގައި ކެއުމުގައި ބޭނުންކުރާ ސާމާނުތައް (ތަށި ސަމުސާ،އޫ ފަދަތަކެތި) ބޭނުންކުރުމުގެ ހުނަރު ދަސްކޮށްދިނުން.
- ކުޅޭ ވަގުތުތަކުގައި ތެރަޕީ ގޭމްތައް ހިމެނުން.
ސްކޫލު
އޮކިއުޕޭޝަނަލް ތެރަޕިސްޓުން ތަޢުލީމީ ބައިވެރިވުމަށް އެހީތެރިވެދެނީ:
- ހަރަކާތްތަކަށް ބަދަލުގެނައުން (މިސާލަކަށް، ކުރު އެސައިންމަންޓްތައް)
- އިށީނުމާއި ގައިގެ ހަށިގަނޑު ރީތިކޮށް ބެހެއްޓުމަށް އެހީތެރިވެދިނުން
- ސަމާލުކަން ދެމެހެއްޓުމާއި ސެންސަރީ ބޭނުންތަކަށް އިޖާބަދޭނެގޮތް މުދައްރިސުންނަށް އޮޅުންފިލުވައިދިނުން
މުޖުތަމައު
އޮކިއުޕޭޝަނަލް ތެރަޕިސްޓުން ކުދިން ތައްޔާރުކުރަނީ މިކަންކަމުގައި ބައިވެރިވުމަށް ހިތްވަރު ދެމުންނެވެ:
- ޕާޓީތަކާއި އެހެނިހެން ހަރަކާތްތަކުގައި އެކުވެރިންނާއެކު އުޅުން
- ޕާކު ފަދަ ކުޅޭތަންތަނުގެ ހަރަކާތްތަކުގައި ބައިވެރިވުން
- މިސްކިތުގެ ޕްރޮގްރާމްތައް
- އެހީތެރިކަމަށް އެދޭނެ ގޮތާއި، ފުރުސަތަށް މަޑުކުރާނެ ގޮތާއި، ގްރޫޕްގެ ގަވާއިދުތަކަށް ތަބާވާނެ ގޮތް ދަސްކުރުން
ހެކިތަކާއި ނަތީޖާތައް
ޑައުން ސިންޑްރޯމް ހުންނަ ކުދިންނަށް އޮކިއުޕޭޝަނަލް ތެރަޕީގެ ދިގު މުއްދަތުގެ ފައިދާތައް އެތައް ދިރާސާއަކުން ކަށަވަރުކޮށްދީފައިވެއެވެ. އެގޮތުން:
- އަރލީ އިންޓަރވެންޝަން ރިސަރޗް (އީއައިއާރު، 2023) އިން ރިޕޯޓުކޮށްފައިވާ ގޮތުގައި ކުޑައިރު ތެރަޕީ ލިބުނު ކުދިން، ފަހުން ފެށި ކުދިންނާ އަޅާބަލާއިރު 6 އަހަރު ވާއިރު މާ ރަނގަޅަށް މިނިވަންކަމާއެކު މަސައްކަތްކުރަން ދަސްވެފައިވެއެވެ.
- އޭއޯޓީއޭ ގައިޑްލައިންސް (2024) އިން ބާރުއަޅާފައިވަނީ ކްލާސްރޫމަށް ތައްޔާރުވުމަށްޓަކައި މޯޓަރ އަދި ސެންސަރީ އިންޓެގްރޭޝަން ދެކަމަށްވެސް އަހައްމިއްޔަތުކަން ދިނުމުގެ މުހިންމުކަމަށެވެ.
- 2024 ގައި “ޗައިލްޑް: ކެއަރ، ހެލްތު އެންޑް ޑިވެލޮޕްމަންޓް” ގައި ޝާއިޢުކުރެވުނު ރެންޑަމައިޒްޑް ޓްރަޔަލްއަކުން ދައްކާގޮތުގައި މައިންބަފައިންނަށް ކޯޗިންގ ދީގެން ގޭގައި ކުރިއަށްގެންދެވޭ ތެރަޕީ ޕްރޮގްރާމްތަކުން 6 މަސްދުވަހުގެ ތެރޭގައި ދިރިއުޅުމުގެ ހުނަރުތައް %30 އިތުރުވެފައިވެއެވެ.
އަވަސް އަދި ދެމެހެއްޓެނިވި އެހީތެރިކަމުގެ މުހިންމުކަން
އޮކިއުޕޭޝަނަލް ތެރަޕީގެ އާރލީ އިންޓަވެންޝަން، ގިނަފަހަރު އުމުރުން އެއް އަހަރު ވުމުގެ ކުރިން ފެށިގެން ދިއުމަކީ، ކުއްޖާގެ ބޮޑުވަމުން އަންނައިރު ކުރިއެރުން ހާސިލްކުރުމަށް އެޅޭ ބިންގަލެކެވެ. ނަމަވެސް، ބޭނުންތަކަށް ފެތޭގޮތަށް ތެރަޕީ ބަދަލުވަމުންދާންވާނެއެވެ.
- ކުދިން ސްކޫލަށް ވަންނަ އިރު، އެކުދިންނަށް ލިޔުމާއި ސަމާލުކަން ދިނުމުގައި އެހީތެރިކަން ބޭނުންވެދާނެއެވެ.
- ފުރާވަރަށް އަރަމުން އަންނަ އުމުރުގައި، އޮކިއުޕޭޝަނަލް ތެރަޕީ ކެއްކުމާއި، ފައިސާ މެނޭޖްކުރުމާއި، ނުވަތަ އާންމު ދަތުރުފަތުރުގެ ވަސީލަތްތައް ބޭނުންކުރުމަށް އަމާޒުކުރެވިދާނެއެވެ.
- ބޮޑެތި މީހުންގެ އުމުރުގައި، އޮކިއުޕޭޝަނަލް ތެރަޕީއިން ވަޒީފާގެ ހުނަރުތަކާއި ނުވަތަ އަމިއްލައަށް ކަންކަންކޮށްގެން ދިރިއުޅުމަށް އެހީތެރިވެދެވިދާނެއެވެ.
އޮކިއުޕޭޝަނަލް ތެރަޕީއިން ޑައުން ސިންޑްރޯމް ހުންނަ ކުދިންނަށް އިތުރަށް ފުރިހަމަ، އަދި ކޮންމެވެސް މިންވަރަކަށް އަމިއްލައަށް ކަންކަންކޮށްގެން އުޅެވޭ ދިރިއުޅުމެއް އުޅުމަށް ބާރުވެރިކަން ދެއެވެ. މިއިން މޯޓަރ ސްކިލްސް، ސެންސަރީ ޕްރޮސެސިންގ، އަދި ދުވަހުން ދުވަހަށް ކުރަންޖެހޭ ކަންކަމަށް އަދި ވަކިވަކި ފަރުދުންނަށް އަމާޒުކުރެވިފައިވާ އެހީތެރިކަން ފޯރުކޮށްދެއެވެ. އާއިލާތަކާއި، ސްކޫލްތަކާއި، އަދި މުޖުތަމައު ބައިވެރިކޮށްގެން، އޮކިއުޕޭޝަނަލް ތެރަޕީއިން ކުދިން ދަސްކުރަން ބޭނުންވާ ކަންކަމަށް އެހީތެރިވެވުމުގެ އިތުރުން އެކުދިން އެންމެ ރަނގަޅަށް ދަސްކުރާނެ ގޮތްތަކަށްވެސް އަމާޒުކޮށްގެން ފުޅާ ދާއިރާއެއްގައި އެކަންކަމަށް އެހީތެރިކަން ފޯރުކޮށްދެވެއެވެ.
