ޕީއަރ ޕްރެޝަރ ނުވަތަ އެއް އުމުރެއްގެ ކުދިންގެ ފަރާތުން ކުދިންނަށް އަންނަ ނުފޫޒަކީ ހަމައެކަނި ކުދިން ދިމާވެ އުޅޭ އެކި ތަންތަނުގައި އެކަކު އަނެކަކަށް ގޮންޖަހައި އުޅޭ އުޅުމެއް ނޫނެވެ. އެކަމުގެ އަސަރު މިހާރު ގްރޫޕް ޗެޓްތަކުންނާއި، ވައިރަލްވާ ޗެލެންޖްތަކުންނާއި، ކްލާސްރޫމުގެ މާހައުލުންނާއި، އަދި “މިއީ ހުރިހާ އެންމެން ވެސް ކުރާ ކަމެއް” ކަމަށް ބުނާ ފަދަ ނުސީދާ މެސެޖްތައް ސޯޝަލް މީޑިއާއިން ފެނުމުން ވެސް ފާޅުވެއެވެ. މައިންބަފައިންގެ މަސްއޫލިއްޔަތަކީ ދަރިފުޅުގެ ކޮންމެ ރަޙުމަތްތެރިޔަކު ނުވަތަ އޭނާ ބޭނުންކުރާ ޑިވައިސް ތަކަށް (ކޮމްޕިއުޓަރ، ޓެބްލެޓް ފަދަ) އަބަދު ފާރަލުމެއް ނޫނެވެ. އޭގެ ބަދަލުގައި ކުރަންވީ ކަމަކީ، “ނޫނެކޭ” ބުނުމަށް، އަދި އެ ބުނާ ބަހުގައި ސާބިތުވެ ހުރުމަށް ބޭނުންވާނެ ޖަޒުބާތީ ހުނަރާއި، އިމުގެ ތެރޭގައި ޢަމަލުތައް ބެހެއްޓުމަށް ކިޔައިދިނުމާއި އަދި އަމިއްލަ ނަފްސަށް އިތުބާރު ކުއްޖާއަށް ހޯދައިދިނުމެވެ. މި ލިޔުން ބިނާކޮށްފައިވަނީ ކުޑަކުދިންގެ ބަލިތަކާއި، އާންމު ޞިއްޙަތާއި، އަދި ޒުވާނުންގެ ދުޅަހެޔޮކަމާ ބެހޭ މާހިރުން ދެއްވާފައިވާ އެންމެ ފަހުގެ އިރުޝާދުތަކުގެ މައްޗަށެވެ. މިއީ މިއަދު ތިޔަ ބެލެނިވެރިންނަށް ބޭނުންކުރެވޭނެ، ދިރާސާތަކުން ސާބިތުވާ ޢަމަލީ އެހީތެރިކަމެކެވެ.
އެއް އުމުރެއްގެ ކުދިންގެ ނުފޫޒު ފޯރުމަށް މިއުމުރުގައި ހުށަހެޅެނީ ކީއްވެ؟
އެއް އުމުރެއްގެ ކުދިންގެ ނުފޫޒަކީ ފުރާވަރުގެ މަރުޙަލާގައި ވަރަށް އާއްމު ކަމެކެވެ. އެއީ އެކުދިންގެ އަމިއްލަ ޝަޚްޞިއްޔަތާއި މިނިވަންކަން ބައްޓަންކުރަމުން އަންނަ ދުވަސްވަރެއް ކަމުން، ރަޙުމަތްތެރިން އެކުއްޖާ ބަލައިގަތުމާއި މަޤްބޫލުކަން ލިބުމަކީ ވަރަށް މުހިންމު ކަމަކަށް ވެއެވެ. މިއީ ވޭޕްކުރުމާއި މި ނޫންވެސް ނޭދެވޭ ތަކެތި ބޭނުންކުރުމާއި ބަދުއަޚްލާޤީ ގުޅުން ހިންގުން ފަދަ ނުރައްކާތެރި ޢަމަލުތަކާއި، އޮންލައިންކޮށް ހިންގާ ނުރައްކާތެރި ޗެލެންޖްތަކާއި، އަދި ކިޔެވުމުގައި އޮޅުވާލުން ފަދަ ކަންކަން ރަޙުމަތްތެރިންގެ މެދުގައި ފެތުރެން މެދުވެރިވާ ސަބަބެވެ. ފަހުގެ ހޯދުންތަކުން ދައްކާ ގޮތުގައި، ގިނަ ފުރާވަރުގެ ކުދިންނަށް އެކުދިންގެ ސިފައާއި، ކާމިޔާބީއާއި، އަދި އަޚްލާޤާ ގުޅޭ ގޮތުން އެކިކަހަލަ ޕްރެޝަރުތަކާ ކުރިމަތިލާން ޖެހެއެވެ. އަދި ދުނިޔޭގެ ޞިއްޙަތާ ބެހޭ އިދާރާތަކުން އިންޒާރުދޭ ގޮތުގައި، ޢާއިލާގެ އެއްބާރުލުން ކުޑަވުމާއި، ސްކްރީނަށް ބަރޯސާވެ، އެހެން މީހުންނާ އަމިއްލަ ނަފްސު އަޅާކިޔުން އިތުރުވުމުގެ ސަބަބުން ފުރާވަރުގެ ކުދިން މިފަދަ ނުފޫޒުތަކަށް ހުށަހެޅުމުގެ ނުރައްކާ މިހާރު ވަނީ ކުރިއަށްވުރެ ބޮޑުވެފައެވެ.
ރަޙުމަތްތެރިންގެ ނުފޫޒު ނުވަތަ ޕިއަރ ޕްރެޝަރ މަސައްކަތްކުރާ ގޮތް
ފުރާވަރުގެ އުމުރުގެ ކުދިންގެ ސިކުނޑި އެންމެ އިސްކަންދޭ އެއްކަމަކީ އިޖްތިމާޢީ ގޮތުން ލިބޭ މަޤުބޫލުކަމެވެ. އެހެން މީހުންގެ ތެރޭގައި ޤަބޫލުކުރެވޭ ނުވަތަ ބަލައިގަނެވޭ ފަރާތަކަށް ވުމަކީ، މީރު ކާއެއްޗެއް ކެއުމުން ނުވަތަ ކުޅިވަރަކުން މޮޅުވުމުން ލިބޭ އުފާވެރިކަން ސިކުނޑިއަށް ގެނެސްދޭ ނާރުތަކުގެ ނިޒާމު ހީވާގިކޮށްދޭ ކަމެކެވެ. މީގެ ސަބަބުން، ނޭދެވޭ ކަމެއްކަން އެނގިހުރެވެސް، ރަނގަޅަށް ވިސްނޭ ނުވަތަ އިނގޭ ކުއްޖަކުވެސް ގްރޫޕެއްގެ ތެރޭގައި ނުރައްކާތެރި ނިންމުމެއް ނިންމަފާނެއެވެ. ބޮޑެތި މީހުންނަށް މިކަމުގައި އެހީތެރިވެވޭނީ، ބަޔޮލޮޖިކަލް ކަންކަން ޢަމަލީ އެހީތެރިކަމަކަށް ބަދަލުކޮށްދީގެންނެވެ. އެގޮތުން، އިޖްތިމާޢީ ޙާލަތްތައް ދެނެގަތުމަށާއި، ދޭނެ ޖަވާބުތަކަށް ތަމްރީނު ކުރުމަށާއި، އަދި އެފަދަ ދަނޑިވަޅެއް އައުމުގެ ކުރިން ސަލާމަތްވާނެ ގޮތުގެ ރޭވުމެއް އެކުލަވާލުމަށް ކުދިންނަށް ދަސްކޮށްދެވިދާނެއެވެ. އެމެރިކަން އެކަޑަމީ އޮފް ޗައިލްޑް އެންޑް އެޑޮލެސެންޓް ސައިކިއެޓްރީ އާއި ކުޑަކުދިންގެ ޞިއްޙަތާބެހޭ އިރުޝާދުތަކުގައިވެސް ބާރުއަޅާފައިވަނީ ހަމައެކަނި އަދަބު ދިނުމުގެ ބަދަލުގައި، މުޢާމަލާތް ކުރުމަށާއި ހުނަރުތައް ތަރައްޤީ ކުރުމަށް އިސްކަން ދިނުމަށެވެ.
ދަރިފުޅު ރަޙުމަތްތެރިންގެ ނުފޫޒަށް ހެއްލެމުންދާކަން އަންގައިދޭ ޢަލާމާތްތައް
މައިންބަފައިން ސަމާލުކަން ދޭންޖެހޭ ކަންތައްތަކުގެ ތެރޭގައި، ކުއްޖާގެ މިޒާޖަށް ބަދަލުއައުމާއި، ކަންކަން ސިއްރުކުރުމާއި، ރަޙުމަތްތެރިންގެ ގްރޫޕް ބަދަލުވުމާއި، ކުއްލިއަކަށް ކިޔެވުމުގެ ފެންވަރު ދަށްވުން ، ސަބަބެއް ނޭނގި ފައިސާއަށް އެދުމާއި، ހެދިފައިވާ އުސޫލުތަކާ ޚިލާފުވުން ހިމެނެއެވެ. ޓެކްނޮލޮޖީގެ ސަބަބުން ނުރައްކާތެރި ޢަމަލުތަކެއް ފޮރުވިފައި ހުރެދާނެއެވެ. މިސާލަކަށް، ކުއްލިއަކަށް ފޯނު ނުވަތަ ސްކްރީން ބަލާ ވަގުތުތައް ވަރަށް ބޮޑަށް ސިއްރުކޮށް، ރޭގަނޑު ވަގުތު މެސެޖް ލިބެމުންދާނަމަ، އެއީ ކުއްޖާއަށް ސިއްރިއްޔާތުގައި ނުފޫޒުތަކަކާ ކުރިމަތިލާން ޖެހިފައިވާކަމުގެ ނިޝާނަކަށް ވެދާނެއެވެ. މީގެ އިތުރުން، އެކަހެރިވެ، ކުއްލިއަކަށް ރައްދު ދޭ ގޮތަށް ކުރިމަތީ އެއްޗެހި ބުނުމާއި، ނުރައްކާތެރި އާދަތަކެއް ފެށިކަން ފާހަގަކުރެވިއްޖެނަމަ، އެއީ ހަމަޖެހިލައިގެން މަޝްވަރާކޮށްލަންޖެހޭ ވަރުގެ ސީރިއަސް ޢަލާމާތްތަކެކެވެ. ޢާންމު ޞިއްޙަތާ ގުޅޭ ރިޕޯޓްތަކުންވެސް ދައްކާގޮތުގައި، ފުރާވަރުގެ ކުދިންގެ މެދުގައި ހާސްކަން އިތުރުވެ، ޢާއިލާގެ އެއްބާރުލުން ދަށްވުމަކީ، ނޭދެވޭ ނުފޫޒުތަކަށް ހެއްލުމުގެ ފުރުޞަތު އިތުރުވާ ކަމެކެވެ.
ބެލެނިވެރިންނަށް ބޭނުންކުރެވިދާނެ އަމަލީ އުކުޅުތައް
1. ތަހުގީގު ކުރުމުގެ ބަދަލުގައި، ދަރިފުޅަށް ހަމަޖެހިލައިގެން ވާހަކަ ދެއްކުމަށް ފުރުސަތު ދިނުން:
ކުދިކުދި ކަންކަމުން ފެށުން: ބޮޑެތި މައުޟޫތަކާ ބެހޭގޮތުން ވާހަކަ ދެއްކުމުގެ ކުރިން، ކުލާހުގެ ވާހަކަ، ނުވަތަ ޝައުޤުވެރިވާ ކަމެއްގެ ވާހަކަ، ނުވަތަ ރައްޓެއްސެއްގެ ވާހަކަ އަހާލާށެވެ. އެއް އުމުރެއްގެ ކުދިންގެ ފަރާތުން އަންނަ ނުފޫޒު ނުވަތަ ޕްރެޝަރުގެ ވާހަކަ ދަރިފުޅު ދައްކަން ފަށައިފިނަމަ، މައްސަލަ ހައްލުކުރުމުގެ ކުރިން، އެންމެ ފުރަތަމަ ދަރިފުޅުގެ އިހުސާސްތައް ދެނެގަނެ، އެކަން ގަބޫލުކުރާކަން ހާމަކުރާށެވެ. މާހިރުން ވިދާޅުވާ ގޮތުގައި، ދަރިފުޅުގެ އިހުސާސްތައް ގަބޫލުކުރުމުން އިތުބާރު ބޮޑުވެ، އެފަދަ ހާލަތެއް ކުރިމަތިވުމުން އެވާހަކަ ދައްކަން އެކުދިންނަށް ފަސޭހަވެގެންދެއެވެ.
2. ޖަވާބުދޭނެ ގޮތްތައް ލިޔެ، އެކްޓްކުރުން (ރޯލް-ޕްލޭ ކޮށްގެން) :
ނޫނެކޭ ބުނެވޭނެ ކުރު ޖުމްލަތައް ތަކުރާރުކޮށް ދަސްކުރުވާށެވެ. “ޝުކުރިއްޔާ، އެއީ އަހަރެން ކުރާހިތްވާ ކަމެއް ނޫން،” “އަހަރެން ނުކުރާނަން،” ނުވަތަ “މާދަމާ އަހަރެންގެ ޕްރެކްޓިސް އެބައޮތް” ފަދަ ޖުމްލަތަކެވެ. ދަރިފުޅާއެކު މިފަދައިން އެކްޓްކޮށް ހެދުމުން، ހަގީގަތުގައި އެފަދަ ހާލަތެއް ކުރިމަތިވާއިރު، އެކުއްޖާއަށް ބިރުވެރިކަން ކުޑަވެ، ދަސްކޮށްފައިވާ ޖުމްލަތައް ބޭނުންކުރުމުގެ ފުރުސަތު ބޮޑުވެއެވެ. ކުޑަކުދިންގެ ހެދިބޮޑުވުމާ ބެހޭ މާހިރުން ފާހަގަކުރައްވާ ގޮތުގައި، ކުރިން ތައްޔާރުވުމާއި، މިފަދަ ހާލަތްތަކުން ސަލާމަތްވުމަށް ދަސްކޮށްފައިވާ ޖުމްލަތަކަކީ ވަރަށް ބޭނުންތެރި ވަސީލަތެކެވެ.
3. ރުޅިވެރިކަމެއް ނެތި، ހިތްވަރާއެކު ކަންކަމާ ކުރިމަތިލާން ދަސްކޮށްދިނުން:
ހަށިގަނޑުގެ ހަރަކާތްތައް ހަމައަކަށް އަޅުވައިގެން ހުރުމަށާއި، މަޑުމައިތިރި އަޑަކުން ވާހަކަ ދެއްކުމަށާއި، އަދި ބޭނުން ވެއްޖެނަމަ “ނޫނެކޭ” ބުނުން ތަކުރާރު ކުރުމަށް ދަރިފުޅަށް ދަސްކޮށްދޭށެވެ. ހިތްވަރާއެކު ކަންކަމާ ކުރިމަތިލާން ދަސްކޮށްދިނުމާއި، ނޫނެކޭ ބުނަން ތަކުރާރުކޮށް ފަރިތަކުރުމަކީ ކުއްޖާ އެހެންމީހުނާ ކުރިމަތިލުމުގައި އަމިއްލަ ނަފްސަށް އޮންނަ އިތުބާރު އިތުރުވާކަމެކެވެ. މި ދާއިރާގެ މާހިރުން ލަފާދެނީ، މި ހުނަރު ކުދިންގެ ކިބައިގައި އާލާކުރުމަކީ ރައްޓެހިކަމުގެ ގުޅުންތަކާއި، ސްކޫލް އަދި ފަހުން ވަޒީފާގެ މާހައުލުގައިވެސް އެހީތެރިވެދޭނެ، ދިރިއުޅުމުގެ މުހިންމު ހުނަރެއްކަމުގައެވެ.
4. ދަރިފުޅަށް ރައްކާތެރި ރައްޓެހިންނާއި މާޙައުލުތައް އިޚްތިޔާރުކުރުމަށް އެހީތެރިވެދިނުން:
ބޮޑެތި މީހުންގެ ބެލެހެއްޓުމުގެ ދަށުން ހިންގާ، އަދި ހެޔޮ އާދަތައް އަށަގަންނަފަދަ ހަރަކާތްތަކާއި ކްލަބްތަކަށް (މިސާލަކަށް، ކުޅިވަރު ޓީމުތައް، ފަންނާނުންގެ ގްރޫޕްތައް) ހިތްވަރުދޭށެވެ. ފުރުޞަތު ލިބޭނެ ވަގުތުތަކުގައި، ދަރިފުޅުގެ ރައްޓެހިންނާއި އެކުދިންގެ މައިންބަފައިންނާ ބައްދަލުކުރާށެވެ. އެކުދިންގެ އިޖުތިމާޢީ ދާއިރާ އެނގުމަކީ ކަންކަން ދެނެގަތުމަށް ވަރަށް އަގުހުރި މަޢުލޫމާތު ލިބޭނެ ކަމެކެވެ. މާހިރުން ލަފާދެނީ، ދަރިފުޅަށް ސިއްރުން ފާރަލާ ކަންކަން ބެލުމުގެ ބަދަލުގައި، އިސްނަގައިގެން ދަރިފުޅުގެ ދިރިއުޅުމުގެ ކަންކަމުގައި، ބައިވެރިވުމަށެވެ.
5. ސާފު، އިންސާފުވެރި ހައްދުތަކެއް ކަނޑައަޅައި، އެކަން ކުރާ ސަބަބު ބުނެދިނުން:
ވަކި ގަޑިއަކަށް ގެއަށް އައުމާއި، ބޭރުތެރެއަށް ގޮސް އުޅުމާއި، އިލެކްޓްރޯނިކް އާލާތްތައް ބޭނުންކުރުމާއި، އަދި ފައިސާގެ ކަންކަމުގައި ގެންގުޅޭ އުޞޫލުތަކަކީ ދަރިފުޅު ކޮންޓްރޯލް ކުރުމަށް ހަދާ އެއްޗެއް ނޫނެވެ. ރަނގަޅު ގޮތުގައި ބުނެދެވިއްޖެނަމަ، އެއީ ރައްކާތެރިކަމުގެ ގޮތުން އަޅާފައިވާ ފިޔަވަޅުތަކެކެވެ. އެ ގަވާއިދުތައް ހަދާ ސަބަބު އޮޅުންފިލުވައިދޭށެވެ. އެއީ ސިއްހީގޮތުން، ރައްކާތެރިކަމުގެގޮތުން ނުވަތަ އިތުބާރު ދެމެހެއްޓުމަށްޓަކައި ނަމަ އެކަން ބުނެދޭށެވެ. އަދި ދަރިފުޅުގެ ފަރާތުން ޒިންމާދާރުކަން ފެންނަ ވަރަކަށް، އުމުރާ ގުޅޭ މިނިވަންކަން ދިނުމާމެދު މަޝްވަރާކުރާށެވެ. ދިރާސާތަކުން ދައްކާ ގޮތުގައި، ގަވާއިދުތައް ބުއްދިއަށް ގަބޫލުކުރެވޭ އަދި އެއްގޮތަކަށް ދެމެހެއްޓޭނަމަ، ކުދިން ދެބަސްވެ ދެކޮޅުވެރިވާވަރު ކުޑަވާނެއެވެ.
6. އޮންލައިންކޮށް ކުރިމަތިވާ ނުފޫޒާއި ސޯޝަލް މީޑިއާގެ ހަގީގަތާ ބެހޭގޮތުން ވާހަކަ ދައްކާށެވެ:
ސޯޝަލް މީޑިއާގެ ސަބަބުން “ހުރިހާ އެންމެންވެސް މިކަން ކުރޭ” މިފަދަ ހީކުރުވުންތައް އިތުރަށް ބޮޑުވެގެންދެއެވެ. ވައިރަލްވެފައިވާ ޗެލެންޖްތައް، ނުވަތަ ނިވާކަން ކުޑަ/އާންމު އިޖުތިމާއީ މިންގަނޑަށް ނުފެތޭ ފޮޓޯ ފޮނުވުމަށް އަންނަ ޕްރެޝަރ، ނުވަތަ ރައްޓެހިންގެ ސަބަބުން ކުރަންޖެހޭ ޓްރެންޑްތައް ފަދަ ވަކި މިސާލުތައް ބޭނުންކޮށްގެން، އޭގައި ހިމެނޭ ހަގީގީ ނުރައްކާތަކާއި “އޮންލައިންކޮށް ނޫނެކޭ ބުނާނެ ގޮތް” ބުނެދޭށެވެ. ކޮމަން ސެންސް މީޑިއާ އަދި ނަފްސާނީ އިލްމުގެ މާހިރުން ފާހަގަކުރާ ގޮތުގައި، މިހާރު ހަޤީޤީ ދިރިއުޅުމުގައި މީހުންނާ ބައްދަލުވެގެން ކުރިމަތިވާ ނުފޫޒާ އެއްވަރަށް އޮންލައިންކޮށް އަންނަ ނުފޫޒު ވަނީ ބޮޑުވެފައެވެ. އަދި އެކަމާ ގުޅޭގޮތުން ދަރިފުޅާ ގަވާއިދުން ވާހަކަ ދެއްކުން މުހިންމެވެ.
7. ދަރިފުޅުގެ ކިބައިން ދެކެން ބޭނުންވާ ސުލޫކު، އަމިއްލަ ނަމޫނާއިން ދެއްކުން:
ބޮޑެތި މީހުން އެމީހުންގެ ރައްޓެހިންނާއި އެއް އުމުރެއްގެ މީހުންނާ މުޢާމަލާތްކުރާ ގޮތަށް މި އުމުރުގެ ކުދިން ވަރަށް ބޮޑަށް ސަމާލުކަމެއް ދޭނެއެވެ. އެހެންކަމުން، ކެރިގެން އަމިއްލަ ޚިޔާލު ފާޅުކުރުމާއި، ގެއްލުންހުރި އާދަތަކަށް ދެކޮޅު ހެދުމާއި، އަދި އިޙްތިރާމާއެކު ޚިޔާލު ތަފާތުވާ ކަންކަން ފާޅުކުރާށެވެ. އަމިއްލައަށް ހެދޭ ގޯސްތައް ޤަބޫލުކޮށް، އެކަންކަން އިޞްލާޙުކުރި ގޮތް ދެއްކުމުން، މީހުންގެ ރުހުން ހޯދުމަށްވުރެ ތެދުވެރިކަމާއިއެކު ރަނގަޅު އުޞޫލުގައި ގާއިމްވެ ހުރުން މާ މުހިންމުކަން ދަރިފުޅަށް ދަސްވެގެންދާނެއެވެ.
ދިގު މުއްދަތަށް ކެތްތެރިކަން ވަރުގަދަކޮށްދޭނެ އާދަތައް
ކެތްތެރިކަމާއި ހިތްވަރުގަދަކަމުގެ ސަބަބުން، ރައްޓެހިންގެ ނުފޫޒުގެ ބާރު ކުޑަވެއެވެ. އެހެންކަމުން، ކުއްޖާގެ ޤާބިލުކަން އިތުރުކޮށްދޭ ކަންކަމަށް ހިތްވަރު ދޭށެވެ. މިސާލަކަށް، ކުޅިވަރު، ކުރެހުން، ކޯޑިން، އިޖުތިމާއީ މަސައްކަތްތަކުގައި ބައިވެރިވުން ފަދަ ކަންކަން ކުރެވިދާނެއެވެ. އަދި ވަކި އެއް ގްރޫޕެއްގެ ރަޙްމަތްތެރިންނަށްވުރެ ބޮޑަށް، ތަފާތު ކުދިންނާއި އެކުވެސް ރަޙްމަތްތެރިކަމުގެ ގުޅުން ބާއްވަން ބާރުއަޅާށެވެ. ކުއްޖާ ހޯދާ ނަތީޖާއަށްވުރެ ބޮޑަށް އެކަމަށް ކުރި މަސައްކަތަށް ތަޢުރީފު ކުރާށެވެ. ކުއްޖާގެ އަމިއްލަ ވަންތަކަން، އެ ކުއްޖަކު ޤަބޫލުކުރާ އަސާސްތަކާއި، ކުރަން ޝައުޤުވެރިވާ ކަންކަމާއި، މުސްތަޤްބަލުގެ އަމާޒުތައް ވަރުގަދަވުމުން، ވަގުތީ ގޮތުން އެހެން މީހުންގެ ރުހުން ހޯދުމަށްޓަކައި އޭނާގެ ދިގު މުއްދަތުގެ އަމާޒުތައް ދޫކޮށްލުމުގެ ފުރުސަތު ކުޑަވެއެވެ. ޞިއްޙީ ދާއިރާގެ އިދާރާތަކުން ފާހަގަކުރާ ގޮތުގައި، އާއިލާގެ ފަރާތުން ލިބޭ ފުރިހަމަ އެއްބާރުލުމާއި، ސްކޫލުން ކުރިމަތިވާ ޕްރެޝަރުތައް ކުޑަވުމަކީ، ފުރާވަރުގެ ކުދިންނަށް ރަނގަޅު ނަތީޖާތަކެއް ލިބުމާ ގުޅިފައިވާ ކަންކަމެވެ. އެހެންކަމުން، އާއިލީ ގުޅުންތައް ދެމެހެއްޓުމަށާއި، ކުއްޖާގެ ނަފްސާނީ ދުޅަހެޔޮކަން ހުރިނެތްގޮތް ބަލައި ޗެކްކުރުމަށް އަބަދުވެސް ސަމާލުކަން ދޭށެވެ.
ދަރިފުޅަށް ގޯހެއް ހެދިއްޖެކަމަށް އިއުތިރާފްވުމުން ކަންތައް ކުރާނެ ގޮތް
އެންމެ ފުރަތަމަވެސް ހަމަޖެހިލާށެވެ. އަދި މިހާރު އިޙްސާސް ކުރެވެނީ ކިހިނެއްތޯ އާއި، ކަންތައްވީ ގޮތް އަހާލާށެވެ. ރުޅި އައުމުގެ ބަދަލުގައި، ކަން ހިނގައިދިޔަ ގޮތް އޮޅުންފިލުވަން މަސައްކަތް ކުރާށެވެ. ކުއްޖާގެ އިޙްސާސްތައް ޤަބޫލުކުރާކަން ކުއްޖާއަށް ބުނެދީ، އެ ވާހަކަ ހިއްސާކުރުމުން ޝުކުރު އަދާކުރާށެވެ. އޭގެ ފަހުން، އެކުގައި މައްސަލަ ޙައްލުކުރަން މަސައްކަތް ކުރާށެވެ. މިކަން އެނގެނީ އިތުރު ކާކަށްތޯ، މިހާރު ކުއްޖާ ހުރީ ރައްކާތެރިކަމާއެކުތޯ، އަލުން އިންތަކެއް ކަނޑައަޅަން ޖެހޭތޯ، އަދި ފަންނީ އެހީތެރިކަމެއް ހޯދުން މުހިއްމުތޯ ބަލާށެވެ. ކުއްޖާގެ ތެދުވެރިކަމުގެ އަގު ވަޒަންކުރުމުން އިތުބާރު ދެމެހެއްޓޭނެއެވެ. މިއީ، ކުރިމަގުގައި ކަންކަން ސިއްރުކުރުމަށް މަގުފަހިވާފަދަ އަދަބެއް ދިނުމަށްވުރެ މާ ރަނގަޅު ނަތީޖާއެކެވެ. ކުޑަކުދިންގެ ބެލެހެއްޓުމާ ބެހޭ އިރުޝާދުތަކުގައިވެސް ބާރުއަޅަނީ، ކުއްޖާގެ ރައްކާތެރިކަމާއި ކަންކަން އިޞްލާޙުކުރުމަށް އިސްކަންދީގެން، އެހީތެރިވެދޭފަދަ ގޮތަކަށް ޖަވާބުދިނުމަށެވެ.
އިތުރު ފަރާތެއްގެ އެހީތެރިކަން ހޯދަންވީ ކޮންއިރަކު؟
ކުއްޖާގެ ފަރާތުން ގޯސްކަމަކަށް ދެވިހިފުމުގެ އަލާމާތްތަކެއް، ޑިޕްރެޝަންގެ އަލާމާތެއް ދިގުދެމިގެންދާކަމަށް ގަބޫލުކުރެވޭނަމަ، އަމިއްލަ ނަފްސަށް ގެއްލުންދިނުން، ޖިންސީ ގޮތުން ގޯނާއެއް ކޮށްފައިވާކަމަށް ޝައްކު ކުރެވުން، ނުވަތަ ކުއްޖާ ކުއްލި ނުރައްކަލެއްގެ ތެރޭގައިވާނަމަ، ވަގުތުން ފަންނީ އެހީތެރިކަން ހޯދާށެވެ. ކުޑަކުދިންގެ ޑޮކްޓަރާ، ސްކޫލްގެ ކައުންސެލަރާ، ނުވަތަ ސިއްޙީ ދުޅަހެޔޮކަމާބެހޭ ޚިދުމަތްދޭ ފަރާތަކާ ވާހަކަ ދައްކާށެވެ. ޤައުމީ އަދި ބައިނަލްއަޤްވާމީ ޞިއްޙީ އިދާރާތަކުން ފާހަގަކުރާ ގޮތުގައި، ޒުވާން އުމުރުގެ ކުދިންގެ ނަފްސާނީ މައްސަލަތައް ދަނީ އިތުރުވަމުންނެވެ. އަދި ކަންބޮޑުވާފަދަ އަލާމާތެއް ފެނިއްޖެނަމަ، އަވަސް ފިޔަވަޅު އެޅުމަށް ލަފާދެއެވެ. ޖިނާއީ ކުށެއްގެ ތެރެއަށް ކުއްޖާ ވަނުމުގެ ނުވަތަ އަނިޔާއެއް ލިބުމުގެ ނުރައްކަލެއް އޮތްނަމަ، ކަމާބެހޭ އިދާރާތަކަށް އަންގާށެވެ.
ބެލެނިވެރިޔާއަށް ދަރިފުޅު ހުންނަ ކޮންމެ ތަނެއްގައި ނުވަތަ ކޮންމެ ސްކްރީނެއްގެ ކުރިމަތީގައި ކުއްޖާއާއެކު ނުހުރެވިދާނެއެވެ. އެކަމަކު، ކަންކަން ސުޕަވައިޒްކުރުމަށްވުރެ މާ ދިގު މުއްދަތަކަށް ދެމިހުންނަ އެއްޗެއް ދަރިފުޅަށް ދެވިދާނެއެވެ. އެއީ، ރަނގަޅު އަޚްލާޤާއި އުސޫލުތަކުގެ މަތީގައި ސާބިތުވެ ހުރުމަށް ބާރުއަޅުމާއި، ނޫނެކޭ ބުނުން އާދަކަމަކަށް ހަދައިދިނުމަށް ތަމްރީނުކުރުމާއި އަދި ތެދުވެރިވުމުން އަދަބުގެ ބަދަލުގައި އެހީތެރިކަން ލިބޭނެ ގެވެށި މާޙައުލެކެވެ. މިއީ އެކުވެރިންގެ ނުފޫޒުން ރައްކާތެރިވުމަށް އޮތް އެންމެ ވަރުގަދަ ދިފާއީ ވަސީލަތެވެ. އަދި ބޮޑު މީހަކަށް ވުމުންވެސް، ދަރިފުޅުގެ ކިބައިގައި މިހުނަރުތައް ހަރުލާފައި ހުންނާނެއެވެ.
