ތުއްތު ކުދިން ބޮޑުވަމުން އަންނައިރު ވާހަކަ ދެއްކުމާއި ބަސް ދަސްކުރުމުގައި ކޮންމެ އުމުރުފުރާއަކަށް ޙާއްސަ މޭލުގާތަކެއް ވަނީ ކަނޑައެޅިފައެވެ. ނަމަވެސް އެކި ކުދިން ކަންކަން ދަސްކުރުމުގައި ތަފާތު ހުންނާތީ ވާހަކަ ދެއްކުން ނުވަތަ ބަހުރުވަ ދަސްވުމުގައި ތަފާތު ވުމަކީ އެކަށީގެންވާކަމެކެވެ. ނަމަވެސް ކަނޑައެޅިފައިވާ މޭލުގާ ހާޞިލްނުވެ މާބޮޑަށް ލަސްވުމަކީ އެކަމަށް ފަރުވާ ހޯދަންޖެހޭ ކަމެކެވެ.
ބަސް ދަސްކުރުން ލަސްވުން ކަމުގައި ބަލަނީ ދަރިފުޅުގެ އުމުރާއި އެއްވަރަށް ވާހަކަ ދެއްކުމާއި ދޭހަ ވުމުގައި ދަތިތަކެއް ހުރުމަށެވެ. އެގޮތުން ދިމަވާ ދަތިތަކުގެ ތެރޭގައި ބަސްކިޔުމާއި ބަސް ދަސްކުރުމުގައި ދަތިވުމާއި، ބަސް ގުޅުވައިގެން ޖުމްލަ ހަދަން އުނދަގޫވުމާއި އަދި ބަހުގެ މާނަ ދޭހަ ނުވުން ހިމެނެއެވެ. ވާހަކަ ދެއްކުން ލަސްވުން ކަމުގައި ބަލަނީ ދަރިފުޅުގެ އުމުރާއި ގުޅޭގޮތަށް ބަސްތައް ނުކިޔުމަށެވެ. އޭގެ ސަބަބުން އެކުދިން ބުނާއެއްޗެއް އެހެން މީހުނަށް ސާފު ނުވުމަކީ އެކަށީގެންވާކަމެކެވެ.

ހެދި ބޮޑުވުމުގައި އެކި ކުދިން ތަފާތު ހުންނާނެއެވެ. އެގޮތުން ވާހަކަ ދެއްކުމާއި ބަސް ދަސްކުރުމުގައިވެސް އެކި ކުދިން ތަފާތު ވާނެއެވެ. އެހެން ކަމުން އެއްކުއްޖަކު އަނެއްކުއްޖަކާއި އަޅާ ކިޔުމުގެ ބަދަލުގައި ކަނޑައެޅިފައިވާ މިންގަނޑުތައް ދެނެގަނެ އެއާއި އެއްގޮތަށް ދަރިފުޅު ބަސް ދަސްކުރުމާއި ވާހަކަ ދެއްކުމުގެ ހުނަރު ތަރައްޤީ ނުވާނަމަ ޑޮކްޓަރުންގެ ލަފާ ހޯދުން މުހިންމެވެ.
އުމުރުން އެއްއަހަރު ފުރުމުގެ ކުރިން
ދަރިފުޅުގެ އުމުރުން ބާރަ މަހުގެ ތެރޭގައި ދިރިއުޅޭ މާހައުލާއި ގުޅޭ އަޑުތައް ދެނެގަނެއެވެ. އަދި އެކި އަޑުއަޑުލައްވައި ވާހަކަ ދައްކަން މަސައްކަތް ކުރަންފަށައެވެ. އުމުރުން ގާތްގަނޑަކަށް ނުވަމަހުގެ ތެރޭގައި އެކި އަޑުތައް ގުޅުވާލައި ވާހަކަ ދެއްކުމުގެ ތަފާތު ރާގުތައް ދެނެގަނެއެވެ. އަދި މަންމަ ، ބައްޕަ ފަދަ އާންމުކޮށް އަޑު އިވޭ ބަސްތައް ކިޔަން ފަށައެވެ. ނަމަވެސް އެބަސްތަކުގެ މާނަ ނޭގުމަކީ އެކަށީގެންވާކަމެކެވެ.
މިއުމުރުގައި އިވޭ އަޑުތަކަށް ސަމާލުކަން ދޭނެއެވެ. އަދި އާނމުކޮށް ބޭނުންކުރާ ތަކެތީގެ ނަންތައް ދެނެގަންނަންފަށާނެއެވެ. އުމުރުން އެއްއަހަރު ފުރޭއިރު އަތުގެ ހަރަކާތުން އެއްޗެހި ދެއްކުން އަތުގެ ހަރަކާތުން ޓާޓާ ކިއުން ފަދަ ހަރަކާތްތައް ނުކުރާނަމަ ޑޮކްޓަރަށް ދެއްކުން މުހިންމެވެ. ދަރިފުޅު ސަމާލުކަމާއެކު ބަލަން އޮތް ނަމަވެސް އިވޭ އަޑުތަކަށް ހަރަކާތް ނުކުރާނަމަ ނުވަތަ ސަމާލުކަމެއް ނުދޭނަމަ އެއީ އަޑު އިވުމުން މަޙްރޫމްވެފައިވާ ކަމުގެ އަލާމާތެކެވެ.
އުމުރުން ބާރަ މާހައި ފަނަރަ މަހާއި ދެމެދު
މިއުމުރުގެ ކުދިން އަޑުލައްވާއިރު ވާހަކަ ދައްކަން ބޭނުންކުރާ ބައެއް އަކުރުތަކުގެ އަޑުތައް ލައްވައެވެ. އިވޭ އަޑުތަކާއި ބަސްތައް ކޮޕީކުރަން ފަށައެވެ. އަދި މަންމަ ބައްޕަ ގެ އިތުރުން އެހެން ބަސްތައް ކިޔަން ފަށައެވެ. އެގޮތުން އާނމުގޮތެއްގައި ފުރަތަމަ ކިޔަންފަށަނީ ބޯޅަ، ފުޅި މިފަދަ ނަންތަކެއެވެ. މިއުމުރުގައި ފަސޭހައިން ދެނެގަނެވޭ ފަދަ ކުރުކޮށް ބުނެވޭ ކަމެއް ކުރަން ބުނުމުން އެކަން ދެނެގަނެ އެގޮތައް އެކަމެއް ކުރެއެވެ. މިސާލަކަށް ފައިވާނަށް އަރާށޭ ބުނުމުން އެބުނީ ކީކޭކަން ދޭހަވެ ފައިވާނަށް އަރާނެއެވެ.
އަށާރަ މަހާއި ދެއަހަރާއި ދެމެދު
އުމުރުން 18 މަހުގައި ގިނަ ކުދިން ގާތްގަނޑަކަށް ވިއްސަކަށް ބަސް ކިޔާނެއެވެ. އަދި ދެއަހަރު ހަމަވާއިރު 50 ބަސް އާނމުކޮށް ކިޔަން އެނގޭނެއެވެ. އުމުރުން ދެއަހަރުގައި ބަސްތައް ގުޅުވައިގެން ދެބަހުގެ ޖުމްލަތައް ހަދަން ފަށާނެއެވެ. އަދި އާނމުކޮށް ފެންނަ ތަކެތި، އެތަކެތީގެ އަސްލު ފެނުމުންނާއި ފޮޓޯއިން ފެނުމުންވެސް ފާހަކަ ކުރަން އެނގޭނެއެވެ. ސުވާލުކުރުމުން ލޮލާއި، ނޭފަތް އަދި ކަންފަތް ފަދަ ގުނަވަންތައް ދައްކަން އެނގޭނެއެވެ. މީގެ އިތުރުން ދެކަމެއް ހިމެނޭގޮތަށް ދެވޭ އިރުޝާދާއި އެއްގޮތަށް އަމަލުކުރަން އެނގޭނެއެވެ. މިސާލަކަށް ފައިވާން ނަގައިގެން ގެނެސް ހަރުގަނޑަށް ލާށޭ ބުނުމުން އެޖުމްލަ ދޭހަވާނެއެވެ. އުމުރުން އަށާރަމަސް ހަމަވާއިރު ވާހަކަ ދެއްކުމުގެ ބަދަލުގައި އަތުގެ ހަރަކާތުން މުޢާމަލާތު ކުރާނަމަ އަދި އިވޭ އަޑުތައް ކޮޕީނުކުރާނަމަ ޑޮކްޓަރަކާއި މަޝްވަރާކުރުން މުހިންމެވެ.
ދެއަހަރާއި ތިންއަހަރާއި ދެމެދު
މިއުމުރުފުރާގައި ދަރިފުޅުގެ ވާހަކަދެއްކުން ވަރަށް ބޮޑަށް ތަރައްޤީވެގެންދާނެއެވެ. ވަރަށްގިނަ ބަސްތައް ދަސްވެފައިވުމުގެ އިތުރުން ތިނެއް ނުވަތަ އިތުރު ބަސްތައް ހިމަނައިގެން ޖުމްލަހަދަން އެނގޭނެއެވެ. އަދި ދޭހަވުންވެސް އިތުރަށް ރަނގަޅުވެގެން ދާނެއެވެ. އެގޮތުން މޭޒު މަތީގައި އެއްޗެއް ބޭއްވުން ނުވަތަ މޭޒު ދަށުގައި އެއްޗެއް ބޭއްވުމަށް ބުނުމުން އޭގެ މާނަ ރަނގަޅަށް އެނގޭނެއެވެ. އަދި ތިން އަހަރު ފުރޭއިރު ތަފާތު ކުލަތަކާއި ތަކެތީގައި ހުންނަ އިތުރު ތަފްޞީލްތައް ވަކިކުރަން އެނގޭނެއެވެ. މިސާލަކަށް ބޮޑު، ކުޑަ އެދެ ސައިޒުގެ ތަފާތު ވަކިކުރަން އެނގޭނެއެވެ. އުމުރުން ދެއަހަރު ފުރޭއިރު ތިރީގައި ފާހަގަކުރެވިފައިވާ ކަންކަން ފާހަގަ ކުރެވޭނަމަ ޑޮކްޓަރަކާއި މަޝްވަރާކުރުން ވަރަށް މުހިންމެވެ.
- ހަމައެކަނި އިވޭ އަޑު ނުވަތަ ފެންނަ މަންޒަރު ރިޕީޓްކުރުން.
- ހަމައެކަނި އެއް އަޑުތަކެއް ނުބަތަ ބަސްތަކެއް ރިޕީޓް ކުރުމާއި ޒަރޫރީ ކަމެއްގެ ވާހަކަ ބުނުން ނޫންގޮތަކަށް ވާހަކަ ނުދެއްކުން.
- އެންމެ އާދައިގެ ކަންކަމުގައި ބުނުމުން އެކަމެއް ކުރަން ނޭނގުން.
- ވާހަކަ ދައްކާއިރު ތަފާތު އަޑެއް ހުރުން. މިސާލަކަށް ނޯށައް އެރުން ފަދަ އަޑެއް ހުރުން.
- އުމުރުގެ އެހެން ކުދިންނާއި އަޅާބަލާއިރު ދަރިފުޅު ދައްކާ ވަހަކަ ދެނެގަންނަން އުނދަގޫވުން.