ކުޑަކުދިންނަކީ އެކުދިންގެ ވަށައިގެންވާ މާޙައުލުން ނުހަނު އަވަހަށް ކަންތައް ވިސްނައިގަނެ، ދަސްކޮށް އަދި ނަކަލު ކުރާ ބައެކެވެ. މީގެ ތެރޭގައި ރަގަޅު ކަންތައްތަކާއި ގޯސް ކަންތައްތައް ވެސް ހިމެނިގެން ދެއެވެ. އަޅުގަނޑުމެން މައިންބަފައިންގެ އެންމެ ބޮޑު އެއް ޒިންމާއަކީ އެކުދިންނަކީ މުޖުތަމަޢަށް ބޭނުންހިފޭ، ދިރިއުޅުމުގެ ރަގަޅު ނިންމުންތައް ނިންމާ އަދި ހަރުދަނާ ކުދިބަޔަކަށް ހެދުމެވެ. މިކަން ކުރުމަށްޓަކައި އެކުދިންގެ އެންމެ ތުއްތު އިރުސުރެ މަސައްކަތް ފަށަންޖެހެއެވެ. މިގޮތުން ދަރިފުޅުގެ ވިސްނުން ތަރައްޤީވަމުން އަންނަ މިންވަރު ބަލާ ވަޒަންކުރަމުން ދިޔުން މުހިންމެވެ. އަދި އެކަންކަމަކީ އެންމެ ތުއްތުއިރުން ފެށިގެން މަސައްކަތް ފެށިއްޖެނަމަ ރަގަޅުކުރެވިދާނެ ކަންކަމެވެ. އެހެންކަމުން ދަރިފުޅުގެ ވިސްނުން ތަރައްޤީކުރުމަށްޓަކައި އަޅުގަނޑުމެނަށް ކުރެވިދާނެ ވަރަށް ގިނަކަންކަން ހުރެއެވެ.
ކަންކަމާއި ގުޅޭގޮތުން ދަރިފުޅާ ސުވާލުކުރުން ގިނަކުރާށެވެ. ކުދިންގެ އުމުރާއި ގުޅޭގޮތުން ސުވާލުކުރުމަކީ ސިކުނޑި ތަރައްޤީވުމަށް އެޅޭ ވަރަށްބޮޑު ބާރެކެވެ. މިކަމުގެ ސަބަބުން ކަންކަމާއި މެދު ފުންކޮށް ވިސްނައި ދެނެގަންނަން އެކުދިން މަސައްކަތްކުރެއެވެ. މިގޮތުން 9 މަހާއި 12 މަހުގެ ކުދިންގާތު ތަފާތު އެއްޗެތީގެ ނަން ކިޔުމަށްފަހު އެ އެއްޗެއް ކޮބައިތޯ އެހުންފަދަ އާދައިގެ ސުވާލެއް ކޮށްލެވިދާނެއެވެ. ކުޑަކުދިންނަކީ ވާހަކަ އަޑުއެހުމަށް ޝައުގުވެރިވާ ބަޔަކަށްވުމާއި އެކު ވާހަކަ ކިޔައިދެމުންދާ ވަގުތު ސުވާލު ކޮށްލުމަކީ ވެސް ކުރެވިދާނެ ކަމެކެވެ. އަދި ވާހަކަ ނިމުމުން އެ ކުދިންނަށް ކުރެވުނީ ކޮން އިހުސާސެއްތޯ އޮޅުން ފިލުވިދާނެއެވެ. މީގެ އިތުރުން ވާހަކައިގައި އުޅޭ މީހާ ނުވަތަ އެއްޗަކީ އެ ކުއްޖެއް ކަމަށްވާނަމަ ހަދާނީ ކިހިނެއްތޯވެސް އަހާލެވިދާނެއެވެ.
ދަރިފުޅު ކުޅެން ގެންގުޅޭ އެއްޗިއްސަކީ ވެސް އެކުދިންގެ ވިސްނުން ރަގަޅު ކުރުމަށް އެހީވެދޭ އެއްޗިއްސަށް ހެދުން ވަރަށް މުހިންމެވެ. މިގޮތުން “ޕަޒްލް” ނުވަތަ “ލެގޯ” ފަދަ ކުޅޭ ތަކެތި ކުޅެން ފުރުޞަތު ދިނުމަކީ ކުރެވިދާނެ ވަރަށް ރަނގަޅު ކަމެކެވެ. އެފަދަ ތަކެއްޗަކީ ކުޅުމުގެތެރޭގައި ވިސްނުން ވަރަށްބޮޑަށް ބޭނުންކުރަންޖެހޭ ތަކެއްޗެވެ. އެއިން ތަފާތު އެކި އެއްޗެތި އީޖާދުކޮށް ރާވައި ހެދުމުން އެކުދިންގެ ވިސްނުމުގައި އުފެއްދުންތެރި އެތަކެއް ޚިޔާލެއް އުފެދުމަށް ފުރުޞަތު ލިބިގެން ދެއެވެ.
އަޅުގަނޑުމެނަށް ބައެއްފަހަރު އަޅާނުލާ ދޫކޮށްލެވޭ އެހެން ނަމަވެސް ވަރަށް މުހިންމު ކަމެއް އެބައޮތެވެ. އެއީ ކުދިންކުރާ ބައެއް ސުވާލުތަކަށް ޖަވާބު ނުދީ އަޅާނުލުމެވެ. ޙަޤީގަތުގައި ކުދިން ސުވާލުކޮށް ކަންކަން އޮޅުން ފިލުވަން މަސައްކަތް ކުރުމަކީ އެކުދިން ކަންކަމާއި މެދު ވިސްނާކަމުގެ ހެއްކެކެވެ. އެހެންކަމުން އެކަމަށް ބާރު އަޅައި އެކަށީގެންވާ ޖަވާބު ދިނުން ވަރަށް މުހިންމެވެ. އަދި ގިނަގިނައިން ސުވާލުކުރުމަށް ހިތްވަރު ދިނުމަކީ ކުރުން ވަރަށް ރަގަޅު ކަމެކެވެ.
ޖުމުލަގޮތެއްގައި ދަރިފުޅުގެ ވިސްނުން ތަރައްޤީވަމުން އަންނަގޮތާއިމެދު އަޅުގަނޑުމެން ވަރަށް ބޮޑަށް ސަމާލުކަން ދޭން ޖެހެއެވެ. އަދި އެކަންކަމުގައި ކުޑަވެސް ޝައްކެއްވާނަމަ ކަމުގެ މާހިރުންގެ އަރިހުން ލަފައާއި، އިރުޝާދު ހޯދުން ވަރަށް މުހިންމެވެ.
