ބައިގެންދިއުމަކީ ބަލިވެ އިންނަތާ 20 ހަފްތާ ވުމުގެ ކުރިން ބަނޑުގައިވާ ދަރިފުޅު ނެތިގެން ދިޔުމެވެ. މިއީ ވަރަށް ގިނަ މީހުންނާ ކުރިމަތިވާ އަދި އޭގެ ސަބަބުން ހިތަށް މާޔޫސްކަން ގެނެސްދޭ ކަމެކެވެ. ބަލިވެއިނުމުގެ ޚަބަރު ލިބުމާއެކު އެވާ އުފަލާ ގުޅުވައިގެން މިފަދަ ހިތާމަވެރި ކަމެއް ދިމާވެދާނެތީ ހިތަށް ބިރުވެރިކަން ވަނުމަކީ އެކަށީގެންވާ ކަމެކެވެ.
ބައިގެންދިއުމުގެ ނުރައްކާ އޮތްކަން ދެނެގަތުން
ކުރިމަތި ފަރާތުން ލޭ އައުން: މިއީ ބައިގެންދިއުމުގެ އެންމެ އާންމު އަދި އެންމެ ފުރަތަމަ އަލާމާތެވެ. ނަމަވެސް ހަނދާންބަހައްޓަންވީ ކަމަކީ މާބަނޑު ދުވަސްވަރު ކޮންމެވެސް ވަރަކަށް ލޭގެ އަސަރު ހުރުމަކީ ބައެއް މީހުންނަށް މެދުވެރިވެދާނެ ކަމެއްކަމުގައެވެ. އަދި މިގޮތަށް ކުޑަކޮށް ލޭގެ އަސަރު ފެނުނު ކަމުގައި ވިޔަސް މިއީ ބައިގެންދިއުމުގެ ސަބަބުން ކަމަށް ނުވެދާނެއެވެ.
ބަނޑުގެ ކޮޅުގައި ރިހުން: މައްސަރުކަންތައް ދިމާވާއިރު ބަނޑުގައި ރިއްސާހެން ނުވަތަ އެއަށްވުރެ ބޮޑަށް ބަނޑުގައި ރިއްސުމަކީ ވެސް ބައިގެންދިއުމުގެ އަލާމާތެކެވެ. ޚާއްސަކޮށް ލޭ އައުމާއެކު މިގޮތައް ބަނޑުގައި ރިއްސާނަމަ ބައިގެންދިޔަކަމުގެ ފުރުސަތު ވަރަށް ބޮޑެވެ. އަދި މީގެ އިތުރުން މާބަނޑު ދުވަސްވަރު ލޭ އައިސް ބަނޑުގައި މާބޮޑަށް ރިއްސުމަކީ އެކްޓޮޕިކް ޕްރެގްނެންސީގެ ސަބަބުން ދިމާވާ ކަމަކަށް ވުމީވެސް އެކަށީގެންވާ ކަމެކެވެ. އެކްޓޮޕިކް ޕްރެގްނެންސީއަކީ ރަހިމުގެ ބޭރުގައި ދަރިފުޅު ގަރުބަގަތުމެވެ. ވީމާ މިފަދަ ކަމެއް ކުރިމަތިވެއްޖެނަމަ ލަސްނުކޮށް ޑޮކްޓަރަށް ދެއްކުމަކީ ވަރަށް މުހިންމު ކަމެކެވެ.
ބުރަކަށީގައި ރިއްސުން: މާބަނޑު ދުވަސްވަރު ބުރަކަށީގައި ރިއްސުމަކީ އާންމު ކަމެއްކަމުގައި ވީނަމަވެސް އާދަޔާ ޚިލާފަށް ބޮޑަށް ރިއްސާނަމަ އަދި ހާއްސަކޮށް ލޭ އައުމާއި ބަނޑުގައި ރިހުން ފަދަ ކަމަކާ އެކު، މިގޮތަށް ދިމާވާނަމަ މިއީ ނުރައްކަލެކެވެ. ޚާއްސަކޮށް ބުރަކަށީގެ ތިރީގައި ރިއްސާނަމަ އެއީ ބައިގެންދިއުމުގެ ފުރުސަތު އޮތުމުން ނުވަތަ ބައިގެންދިއުމުގެ ސަބަބުން ދިމާވި ކަމަކަށް ވުމަކީ އެކަށީގެންވާ ކަމެކެވެ.
ވިހަން ބަނޑުގައި ރިހުން (ކޮންޓްރެކްޝަން އައުން): ބަނޑަށް 20 ހަފްތާ ވުމުގެ ކުރިން ވިހަން ބަނޑުގައި ރިހޭ ގޮތަށް ގާތްގާތުގައި ކޮންޓްރެކްޝަން އަންނަނަމަ މިއީ ބައިގެންދިއުމަށް ފުރުސަތު އޮތް ކަމުގެ އަލާމާތެކެވެ. މިގޮތަށްވާނަމަ ލަސްނުކޮށް ޑޮކްޓަރަށް ދެއްކުން މުހިންމެވެ. މިއާ ޚިލާފަށް މާބަނޑު ދުވަސްވަރު ދޭތެރެ ދޭތެރެއިން، ދުރު ދުރުން ނުވަތަ ވަކި ގަވައިދެއް ނެތްގޮތައް ބަނޑުގައި ނުރިހި ކޮންޓްރެކްޝަން އައުމަކީ ވަރަށް ގިނަ މީހުނަށް ދިމާވާ ކަމެކެވެ. ނަމަވެސް މިއީ ބައިގެންދިއުން ނުވަތަ އެހެން ނުރައްކަލެއްގެ އިޝާރާތެއް ނޫނެވެ.
މާބަނޑުވުމުގެ އަލާމާތްތައް ނެތިދިޔުން: މާބަނޑު ދުވަސްވަރުގެ ކުރީކޮޅު އާންމުކޮށް ފެންނަ ހޮޑުލެވުމާއި އުރަމަތީގައި ރިއްސުންފަދަ އަލާމާތައްތައް ކުއްލިއަކަށް ހުއްޓުމަކީވެސް ބައިގެންދިއުމުގެ ސަބަބުންވީ ކަމަކަށް ވުން އެކަށީގެންވެއެވެ.
ބައިގެންދިޔުމަށް މެދުވެރިވެދާނެ ސަބަބުތައް
އާންމުގޮތެއްގާ ބައިގެންދިއުމަށް މެދުވެރިވަނީ ޖޯޑުވާ (ފަރޓިލައިޒްވާ) ބިހުގައި ނުވަތަ މަނީގައި ހުންނަންވާ ޢަދަދާ ތަފާތުކޮށް ކްރޮމޮޒޯމް ހުރުމުންނެވެ. މީގެ ސަބަބުން ފަރޓިލައިޒްވެފައިވާ ބިހަށް ރަނގަޅަށް ބޮޑުނުވެވެއެވެ. މީގެ އިތުރުން ދަރިފުޅު ހެދި ބޮޑުވުމުގައި ދިމާވާ ތަފާތު މައްސަލަތަކުގެ ސަބަބުން ވެސް ބައިގެންދިއުމަށް މެދުވެރިވެއެވެ. މިސާލަކަށް ފަރޓިލައިޒް ވެފައިވާ ބިސް ރަހިމުގެތެރޭ ރަނގަޅަށް ގަރުބަނުގަނެވުން ފަދަ ކަންތައް ހިމެނެއެވެ.
ތައިރޮއިޑް މައްސަލަ ހުރުމަކީ ވެސް ދަރިމައިވުމުގެ މައްސަލައިގެ އިތުރުން ބައިގެންދިއުމަށް ވެސް މެދުވެރިވާ ސަބަބެކެވެ. ތައިރޮއިޑް މަސައްކަތް މާދަށް ނަމަ އެކަން ފޫބެއްދުމަށް ހަށިގަނޑުން އުފައްދާ ހޯމޯނެއްގެ ސަބަބުން ބިސް ބޭރުވުމަށް (އޯވިއުލޭޝަން) ހުރަސްއެޅެއެވެ. އަދި މާގިނައިން ހޯމޯން އުފައްދާ ތައިރޮއިޑް މައްސަލައެއްނަމަ ބިސް ގަރުބަ ގަތުމައްޓަކާ ރަހިމު ރަނގަޅަށް ތައްޔާރުވުމަށް ހުރަސްއެޅެއެވެ. މީގެ ސަބަބުން ބައިގެންދިއުމަށް މެދުވެރިވެއެވެ.
ބައެއްފަހަރު ރަހިމުގެ ދޮރު ބަލިކަށިވުމުގެ ސަބަބުން ވެސް ބައިގެންދިއުމަށް މެދުވެރިވެއެވެ. ރަހިމުގެ ދޮރު ބަލިކަށިވުމުގެ ސަބަބުން ދަރިފުޅު ބަނޑުގައި ހިފެހެއްޓުމަށް ހުރަސްއެޅެއެވެ. މިކަމުގެ ސަބަބުން ބައިގެންދަނީ އާންމުގޮތެއްގައި ދެވަނަ ޓްރިމެސްޓަރ ( 13 ހަފްތާ އާއި 28 ހަފްތާއާ ދެމެދު) ގައެވެ. ކުއްލިއަކަށް ޕްރެޝަރެއް އިޙްސާސްވުން ނުވަތަ ފެންދުލި ފަޅައިގެން ދިއުމަކީ މިކަމުގެ ސަބަބުން ބައިގެންދާއިރު ފެނިދާނެ ކަންތަކެވެ. ރަހިމުގެ ދޮރު ބަލިކަށިވުމުގެ ސަބަބުން ބައިގެންގޮސްފައި ވާނަމަ ދެވަނަ ފަހަރަށް ބަލިވެއިނުމުން ގާތްގަނޑަކަށް 12 ވަނަ ހަފްތާގެތެރޭގައި ރަހިމުގެ ދޮރު ފެހުމަށްފަހު ވިހަން ތައްޔާރުވުމުން ރޮދި ކޮށުމަކީ ބައިގެން ދިއުމުން ސަލާމަތްވުމަށް ދެވޭ ފަރުވާއެކެވެ.
ބައެއްކަހަލަ ބޭސްތައް ބޭނުންކުރުމުން ވެސް ބައިގެންދިއުމަށް މެދުވެރިވެއެވެ. ވީމާ ބަލިވެއިންނަށް މަސައްކަތްކުރާނަމަ ނުވަތަ ބަލިވެއިންނަމަ ބޭހެއް ބޭނުންކުރުމުގެ ކުރިން އެބޭހަކީ މާބަނޑު ދުވަސްވަރު ބޭނުންކުރުން ރައްކާތެރި ބޭހެއްތޯ ބެލުން މުހިންމެވެ. މީގެ އިތުރުން ބައެއް ސިއްޙީ މައްސަލަތަކުގެ ސަބަބުން ވެސް ބައިގެންދިއުމުގެ ނުރައްކާ ބޮޑުވެއެވެ. މީގެ ތެރޭގައި ހަކުރުބަލި ކޮންޓްރޯލްނުވެ ހުރުމާއި ޕޮލިސިސްޓިކް އޯވޭރިއަން ސިންޑްރަމް (އަންހެންމީހާގެ ހޯމޯން ލެވެލްއަށް ބަދަލު ގެނުވާ ޙާލަތެއް) ފަދަ ބައެއް ސިއްޙީ މައްސަލަތައް ހިމެނެއެވެ.
ބައިގެންދިއުމުގެ ނުރައްކާ އޮންނަ އެހެނިހެން ސަބަބުތަކުގެ ތެރޭގައި މައިމީހާގެ ޢުމުރާއި، ފިރެހެން މީހާގެ ޢުމުރު ދޮށީވުމާއި، އެކި ކަހަލަ ކެމިކަލްފަދަ ތަކެތީގެ އަސަރުކޮށްފައި ވުމާއި، ސިނގިރޭޓާއި ބަނގުރާ ނުވަތަ އަލްކަހޯލް ފަދަ ތަކެތި އަދި ޑްރަގްސް ބޭނުން ކުރުން ހިމެނެއެވެ. އަދި މީގެ އިތުރުން ލިސްޓީރިއާ ބެކްޓީރިއާގެ ސަބަބުންނާއި ކޯފުއްޕި، ހިމަބިހި، މީސަލްސް، އެޗް އައި ވީ ފަދަ އިންފެކްޝަންތަކުގެ ސަބަބުން ވެސް ބައިގެންދިއުމަށް މެދުވެރިވެއެވެ.
