އަޅުގަނޑުމެންގެ ހަށިގަނޑު އުފެދިފައިވަނީ އެތައް މިލިޔަން ސެލްތަކަކުންނެވެ. މީގެން ކޮންމެ ސެލްއެއްގައި 46 “ކޮރޮމޮސޯމްސް” ނަމަކަށް ކިޔާ މާއްދާއެއް ހިމެނެއެވެ. ޑައުން ސިންޑްރޮމް ހުރުމަށް މެދުވެރިވަނީ މި ކޮރޮމޮސޯމްސް ހިމެނޭ ވަރު އިތުރު ވުމުންނެވެ. އެހެންކަމުން ޑައުން ސިންޑްރޮމް ހުންނަ ކުދިންގެ ސެލްތަކުގައި އެމާއްދާ ހިމެނޭ އަދަދު 47 އަށް އަރައެވެ. ޑައުން ސިންޑްރަމް އަކީ ބައްޔެއް ނޫނެވެ. ނަމަވެސް އެކަމުގެ ސަބަބުން ދަރިފުޅު ހެދި ބޮޑުވުމާއި، ސިފައަށާއި އަދި ތޫނުފިލިކަމަށް އަސަރުކުރެއެވެ. ޑައުން ސިންޑޮރޮމް ހުރުމަށް މެދުވެރިވަނީ ކޮންގޮތަކުންކަން ހޯދިފައިވީ ނަމަވެސް އެކަން އެގޮތައް މެދުވަރިވާން ދިމާވާ ސަބަބަކީ ކޮބާކަން އަދި ހޯދިފައިނުވެއެވެ. ޑައުންސިންޑްރޮމް ހުރިތޯ ބެލުމަށް ދަރިފުޅު ވިހެއުމުގެ ކުރިންވެސް ޓެސްޓް ކުރެވެއެވެ. ތަފާސް ހިސާބަށް ބަލާއިރު ދޮށީއުމުރުގައި (35 އަހަރުން މަތީގައި) ބަލިވެއިންނަ އަންހެނުންނަށް ލިބޭ ދަރިންގެ ޑައުން ސިންޑްރޮމް ހުރުމުގެ ފުރުޞަތު ބޮޑެވެ.
ޑައުން ސިންޑްރަމް ހުރިނަމަވެސް އޭގެ އަސަރު ކުރަނީ އެކި ކުދިންނަށް އެކިވަރަށެވެ. އެގޮތުން ކުދިންގެ ވިސްނުމާއި ތޫނުފިލިކަން ހުންނަނީ އެކިވަރަށެވެ. އަދި އެކަން ދެނެގަތުމަށް ވަގުތު ނަގާނެއެވެ. އުނގެނުމާއި ވާހަކަ ދެއްކުމުގައި އެކުދިންނަށް ދަތިތަކާއި ކުރިމަތިވެއެވެ. ބައެއް ކުދިން ފަރިތަކަމާއި އެކު ވާހަކަ ދައްކައި އުޅުނަސް އަނެއްބައި ކުދިންނަށް ވާހަކަ ދެއްކުމާއި ބަސް ދެނެގަތުމުގައި އުނދަގޫތަކާއި ކުރިމަތި ވެއެވެ. އަނެއްބައި ފަހަރުގައި ދެކެވޭ ވާހަކަ އެކުދިންނަށް ރަނގަޅަށް ދޭހަވެއެވެ. ނަމަވެސް އެކުދިން ބޭނުންވާ ވާހަކަ ބުނެދިނުމުގައި ދަތިތަކާއި ކުރިމަތިވެއެވެ. ސްޕީޗް ތެރަޕީ އަދި ލޭންގުއޭޖް ތެރަޕީ ދިނުމަކީ އެކުދިންނަށް އެހުނަރު ދަސްކޮށްދިނުމަށް ދެވިދާނެ ފަރުވާއެކެވެ. އާންމުގޮތެއްގައި ޑައުން ސިންޑްރޮމް ހުންނަކުދިން 11 މަހުގައި އިށީނދެ އިންނަންފަށައެވެ. 17 މަހުގައި ފިރުކެން ފަށައެވެ. އަދި 26 މަހުގައި ހިނގަން ފަށައެވެ.
އާންމު ދިރިއުޅުމުގައި ބޭނުންވާ ކަންތައްތަކާއި ހުނަރުތަކަށް ބަލާއިރު ޑައުން ސިންޑްރަމް ހުންނަ ކުދިންނަކީވެސް އާދައިގެ ކުދިންނެކޭ އެއްގޮތަށް ކިޔެވުމާއި އިތުރު ހަރަކާތްތަކާއި އެހެނިހެން ކަންމުގައިވެސް ބައިވެރިވެ އުޅެވޭނެ ކުދިންނެވެ. އެކުދިންނަށް ބޭނުންވަނީ އިތުރު އެހީތެރިކަމެކެވެ. އެހެންކަމުން އެފަދަ ކުދިން ވަކިން ގެންގުޅުމުގެ ބަދަލުގައި މަދުރަސީ ދައުރުގައިވެސް އެހެން ކުދިންނާއި އެކު އެއް ކުލާހެއްގައި ކިޔެވުމުގެ ފުރުޞަތާއި ވަޒީފާގެ މައިދާނުގައިވެސް އެކުދިންނަށް ފުރުޞަތު ފަހިވެފައި އޮތުން މުހިންމެވެ. އާއިލާ އާއި މުޖުތަމައުގެ ބައިވެރިވުން ލިބުމަކީ އެކުދިންނަށް ވަރަށް ފައިދާ ކުރާކަމެކެވެ.
ޑައުން ސިންޑްރަމް ހުންނަ ކުދިންގެ ހަށިގަނޑުގެ ބޭރުފުށުން ފާހަގަ ކުރެވޭ ބައެއް ކަންކަން.
- ލޮލުގަ ހުންނަ ތަފާތުކަން (ލޯ މައްޗަށް ވާގޮތަށް ހުރުން، ލޮލުގެ މަތީކައިރިން އިތުރު ހަމުގެ ފަށަލައެއް ލެވިފައި ހުރުން. ކަޅީގައި ހުދު ތިކިތަކެއް ހުރުން)
- ގުނަވަންތަކުގެ މަސްތަކުގެ ބާރު ކުޑަވުން.
- އިސްކޮޅުން ކުރުކޮށް ހުރުން ނުވަތަ ކަރު ކުރުކޮށް ހުރުން.
- ނޭފަތް ފެށޭހިސާބު ފަތާކޮށް ހުރުން.
- ދޫ ބޭރަށް ނުކުމެފައި ހުރުން.
- ފައިގެ ބޮޑުވާ އިނގިއްޔާއި ޝަހާދަތް އިނގިއްޔާއި ދޭތެރެ ދުރުމިން އެހެން އިނގިލިތަކުގެ ދެމެދަށްވުރެ ބޮޑުކޮށް ހުރުން.
ދިމާވެދާނެ ބައެއް ސިއްޙީމައްސަލަތައް.
- ނޭވާލާ ނިޒާމުގެ މައްސަލަ
- އަޑުއެހުމުގައި ދަތިކަމެއް ހުރުން.
- ހަނދާންނެތޭ ބަލި
- އެޕިލެޕްސީ
- ތައިރޮއިޑްގެ މައްސަލަތައް
ދެވިދާނެ ފަރުވާ
ޑައުން ސިންޑްރަމް އަށް ފަރުވާއެއް ހޯދިފައި ނުވެއެވެ. ނަމަވެސް އެކަމުގެ ސަބަބުން ދިމާވާ ސިއްހީ މައްސަލަތަކަށް އެހެން މީހުނެކޭވެސް އެއްގޮތަށް ފަރުވާ ކުރެވެއެވެ. އަދި ހެދި ބޮޑުވުމާއި ބަސް ދަސްކުރުން ފަދަ ކަންކަމުގައި ތަފާތު ތެރަޕީތައް ދެވެއެވެ. “އާރލީ އިންޓަރވެންޝަން” ޕްރޮގްރާމް ތަކުން އެކުދިންގެ ޤާބިލުކަން އެންމެ ފުރިހަމަ ގޮތުގައި ބޭނުންކުރުމަށް ދަސްވެގެން ދާނެއެވެ. އަދި އާއިލާއާއި މުޖުތަމަޢުގެ އެހެންމީހުނާއި ގުޅިގެން އުޅޭނަމަ އެކަމުގެ ފައިދާ ވަރަށް ބޮޑެވެ.
