ތުއްތު ދަރިފުޅު ބެލެނިވެރިންނާއެކު ނިންދެވުމަކީ ހިޔާލު ތަފާތުވެފައިވާ މައުލޫއެކެވެ. ވަކިން ހާއްސަކޮށް އެއް އެނދެއްގައި ނިންދެވުމާ ގުޅޭގޮތުން ވަރަށް ބޮޑަށް ބަހުސް ކުރެވޭތަން ފެނެއެވެ. ބައެއް ފަރާތްތަކުން ދެކޭގޮތުގައި ދަރިފުޅާއެކު އެއް އެނދެއްގައި ނިދުމަކީ ކޮށްގެން ވާނެ ކަމެއް ނޫނެވެ. ނަމަވެސް، އަނެއްބައި ފަރާތްތަކުން ދެކޭ ގޮތުގައި ތުއްތު ދަރިފުޅު މަންމަ އާއި ގާތުގައި އެއް އެނދެއްގައި ނިންދެވުމަކީ ތުއްތު ދަރިފުޅަށް އެންމެ ފައިދާ ހުރި އަދި އެންމެ އެދެވޭ ގޮތެވެ. މިއާއެކު، މީގައި އުފެދޭ އެންމެ ބޮޑު ސުވާލަކީ، އެންމެ ރަނގަޅު ގޮތަކީ ނުވަތަ ކަންތައް ކުރަންވީ ގޮތަކީ ކޮބާތޯއެވެ. ވީމާ، މިކަމާ ގުޅިގެން ހެދިފައި ހުރި ތަފާތު ދިރާސާ ތަކުގެ އެހީގައި، މި މައުލޫއަށް އަލިއަޅުވާލާނަމެވެ.
މި މައުލޫއަށް ހެދިފައިވާ ދިރާސާތަކަށް ބަލާއިރުވެސް ތަފާތު ނަތީޖާތައް ނިކުމެފައި އެބަހުއްޓެވެ. މިގޮތުން، ބައެއް ދިރާސާވެރިންގެ ހޯދުންތަކުން ނިންމާފައިވާ ގޮތުގައި ތުއްތު ދަރިފުޅު ބެލެނިވެރިންގާތު އެއް އެނދެއްގައި ނިންދެވުމަކީ ރައްކާތެރި ގޮތެއް ނޫނެވެ. އަދި މީގެ ސަބަބުތައް ވެސް ބަޔާންކޮށްދީފައި ވެއެވެ. އަދި އަނެއްބައި ދިރާސާވެރިންގެ ހޯދުންތަކުން ދައްކާގޮތުން، ދަރިފުޅު ބެލިނިވެރިންގާތު ނިންދެވުމަކީ ދަރިފުޅަށް ގިނަގުނަ ފައިދާތަކެއް ލިބިގެން ދާނެ ކަމެކެވެ.
އެއް އެނދެއްގައި ދަރިފުޅު ނިންދެވުމާ ދެކޮޅަށް ވާހަކަ ދަށްކަވާ ފަރާތްތަކުގެ ސަބަބުތަކަށް ބަލާއިރު އެންމެ ބޮޑު ސަބަބަކަށް ފާހަގަ ކޮށްފައިވަނީ ދަރިފުޅު ފިތިގެން ނުވަތަ ހާސްވެގެން މަރުވުމެވެ. މިގޮތުން، ކައިރީ އޮންނަ މީހަކީ ނިދިގަދަ މީހަކަށް ވެއްޖެނަމަ، ދަރިފުޅު ގައިމައްޗަށް އެރޭ އިރުވެސް ނުހޭލެވިފައި އޮވެދާނެއެވެ. އަދި ދަރިފުޅު މަންމަ އާއި ބައްޕަގެ މެދުގައި އޮންނަނަމަ، ދެމީހުންގެ މެދުގައި ދަރިފުޅު ފިތި ހާސްވެގެން މަރުވުމަކީވެސް އެކަށީގެންވާ ކަމެކެވެ.
ދަރިފުޅު ބެލެނިވެރިންނާ ވަކިން ނިންދެވުމަށް ވަކާލާތުކުރާ، ކަމާބެހޭ މާހިރުން ދައްކާ ދެވަނަ ސަބަބަކީ ދަރިފުޅު އަމިއްލަ އަށް ކަންކަން ކުރުމަށް އާދަ ކުރުވުމެވެ. މި ބޭފުޅުން ދެކޭ ގޮތުގައި ދަރިފުޅު ގިނަދުވަހު ބެލެނިވެރިން ގާތު ނިންދަވާ ނަމަ ފަހުން ވަކިން ނިންދަވަން އާދަކުރަން އުންދަގޫވެއެވެ.
މީގެ އިތުރުން، ދަރިފުޅު ބެލެނިވެރިންނާ އެއް އެނދެއްގައި ނިދާނަމަ، ދަރިފުޅު އަދި ބެލެނިވެރިޔާއަށްވެސް އަވަސް އަވަހަށް ހޭލެވޭ ކަމަށް ދިރާސާއިން ދައްކައެވެ. އަދި މީގެ ސަބަބުން ދަރިފުޅު އަދި މަންމައަށް ރޭގަނޑު ލިބޭ ނިދީގެ ކޮލިޓީ ދަށްވާ ކަމަށް ފާހަގަ ކޮށްފައިވެއެވެ. ނަމަވެސް އަނެއްބައި ފަރާތްތަކުން ބުނާ ގޮތުގައި މިގޮތަށް ރޭގަނޑު އަވަސް އަވަހަށް ހޭލެވުމަކީ ރަނގަޅު ކަމެކެވެ. ސަބަބަކަށް ފާހަގަ ކުރަނީ މީގެ ސަބަބުން ރޭގަނޑު ވަގުތުގައިވެސް ގާތުން ދިނުމަށް މަގުފަހިވެ ގާތުން ދިނުން އިތުރު ވުމެވެ. އަދި މީގެ އިތުރުން، ދަރިފުޅު ވަކިން އޮންނަނަމަ ތެދުވެގެން ގޮސް ގާތުން ދޭން ޖެހޭނަމަ ޖުމްލަ ގޮތެއްގައި މަންމަގެ ނިދި އިތުރަށް މަދުވެ ދުވާލުގެ ވަގުތު ތަކުގައިވެސް ނިދި ނުފިލާފައި ހުންނަށް ޖެހި ދަރިފުޅަށް ދެވޭ އަޅާލުން ކުޑަވެދާނެ ކަމަށް ބައެއް ދިރާސާތަކުގައި ފާހަގަ ކޮށްފައި ވެއެވެ. އަދި މީގެ އިތުރުން، ރޭގަނޑު އަވަސް އަވަހަށް ހޭލެވުމުން، އޮކްސިޖަން ލެވެލް އާއި ހިތުގެ ތެޅުން އިތުރުވެއެވެ. މިއީ ދަރިފުޅުގެ ސިކުނޑި ތަރަށްގީވުމަށާއި ދިފާއީ ނިޒާމު ވަރުގަދަވާ ސަބަބެއްކަމުގައި ފާހަގަ ކުރެވިފައިވެއެވެ.
މިދާއިރާއިން ގިނަ ދިރާސާތަކެއް ހަދާފައިވާ އަދި 150 އަށް ވުރެ ގިނަ އާރޓިކަލް ލިޔެފައިވާ މެކެނާ ފާހަގަ ކުރާގޮތުގައި، ބޮޑު މީހަކާ ގާތުގައި ނިދުމުން ދަރިފުޅުގެ ހަށިގަނޑުގެ ފިނިހޫނުމިން އެއްވަރެއްގައި ހިފެހެއްޓުމަށް އެހީތެރިވެއެވެ. އަދި ދަރިފުޅު ނޭވާލުން ރަނގަޅުވެ، ހެދިބޮޑުވުން އަވަސްވެ އަދި ސްޓެރެސް ދަށްވެއެވެ. ޖިސްމާނީ ދުޅަހެޔޮކަމުގެ އިތުރުން، މައިންބަފައިންގާތު ނިދުމަކީ ދަރިފުޅުގެ ނަފްސާނީ ދުޅަހެޔޮކަމަށް ވެސް ގިނަގުނަ ފައިދާތަކެއެ ކުރާ ކަމެއްކަން ފާހަގަ ކުރެވިފައިވެއެވެ. މިގޮތުން، މައިންބަފައިންނާ ދުރުގައި ނުވަތަ ވަކި ކޮޓަރިއެއްގައި ނިދާ ކުދިންނާ އަޅާ ބަލާއިރު، މިކުދިންގެ އަމިއްލަ ނަފްސަށް އޮންނަ އިތުބާރު ބޮޑުވެ، ކަންތައްތަކާ ޖެހިލުންވާލެއް ކުޑަކަމާއި އަވަހަށް އަމިއްލައަށް ކަންތައްތައް ކުރަން ފަށާކަން ފާހަގަ ކުރެއެވެ. ނަމަވެސް، މިގޮތަށް ދަރިފުޅު ގާތުގައި ނިދާ ބެލެނިވެރިޔަކީ، ސިނގިރޭޓް ބުއިމާއި، ޑްރަގްސް ނުވަތަ އެނޫންވެސް ދަރިފުޅަށް ގެއްލުން ވެދާނެފަދަ ނުރައްކާތެރި އަމަލެއް ކުރާ މީހަކަށް ވެގެން ނުވާނެއެވެ.
މި މައުލޫގައި ހިޔާލު ތަފާތުވުންތައް އުޅޭއިރު، ދެން ކަންތައް ކުރާނީ ކިހިނެއްހެއްޔެވެ؟ ކޮންމެ ގޮތަކަށް ނިންމި ކަމުގައި ވިޔަސް، އެންމެ މުހިންމު ކަމަކީ އެ ނިންމާ ނިންމުމަކީ ބެލެނިވެރިޔާއަށް ދަރިފުޅު ގާތުގާ ނިންދެވުމުން ލިބޭ ފައިދާ ތަކާއި، އޭގެ ސަބަބުން ލިބޭ ގެއްލުންތަށް ރަނގަޅަށް އެނގި، އަމިއްލައަށް އެންމެ ކަމުދާ ކަމަށް ފެންނަ ގޮތަށް ނިންމުމެވެ. ރަށްޓެއްސަކު، އާއިލާ މީހަކު ނުވަތަ އެހެންމީހަކު ބުނާ ގޮތެއްގެ ބަދަލުގައި މިކަމުގައި ހުރި ރަނގަޅު ކަންތައްތަކާއި ނުރަނގަޅު ކަންތައްތަކަށް ބެލުމަށް ފަހު ދަރިފުޅަށް އެންމެ ރަނގަޅު ގޮތް ދަރިފުޅުގެ މައިންބަފައިން ނިންމުމެވެ.
