ޖީ.6. ޕީޑީ ނުވަތަ ގުލުކޯޒް 6 ފޮސްފޭޓް ޑީހައިޑްރޮޖިނޭސް އަކީ ރެޑްބްލަޑް ސެލްތަކަށް ގެއްލުން ވުމުން ސަލާމަތްވުމަށް ހަށިގަނޑުގައި އުފައްދާ އެންޒައިމްއެކެވެ. މި އެންޒައިމް ހަށިގަނޑުގައި އެކަށީގެންވާ ވަރަށް ނުއުފެދުމަށް ޖީ.6.ޕީޑީ ޑެފިޝިއެންސީއޭ ކިޔައެވެ. މިއީ މައިންބަފައިންގެ ފަރާތުން ދަރިންނަށް ވާރުތަވާ ކަމެކެވެ. މީގެ ސަބަބުން، ރެޑް ބްލަޑް ސެލްތަކަށް ފުރިހަމަ ރައްކާތެރިކަން ނުލިބި ހަލާކު ވުމަށް މެދުވެރި ވެއެވެ. ބައެއްފަހަރު ހަށިގަނޑުގައި ލޭ މަދުވެ ލޭ އަޅަން ޖެހޭ ހާލަތުވެސް މެދުވެރިވެއެވެ. ޖީ.6.ޕީ.ޑީ އަކީ ދެ ޖިންސުގެ ކުދިންނަށްވެސް ވާރުތަކުރާ ކަމެކެވެ. ނަމަވެސް މި ކަން އެންމެ ގިނައިން ފެންނަނީ ފިރެހެންކުދިންގެ ގައިންނެވެ. އަދި މިހާލަތާއި ގުޅުންހުރި ގިނަ އަލާމާތްތައްވެސް ގިނައިން ފެންނަނީ ފިރެހެން ކުދިންގައިންނެވެ. އަންހެން ކުދިންގައިން އަލާމާތްތައް ފެންނަލެއް މަދެވެ. ލޭގައި އެންޒައިމް ލެވަލް ހުރިވަރު ބަލަން ހަދާ އާދައިގެ ލޭގެ ޓެސްޓެއްގެ އެހީގައިވެސް މި ބަލި ދެނެގަނެވޭނެއެވެ.
މި ބަލި ހުންނަ ތުއްތުކުދިން ރީންދުވެ ހާލު ބޮޑުވުމަކީ އެކަށީގެންވާ ކަމެކެވެ. ވީމާ، ދަރިފުޅު ރީންދޫވުން ފަދަ ކަމެއް ދިމާވެއްޖެނަމަ، ޖީ.6.ޕީޑީއަށް ޓެސްޓު ކުރިކަން ޔަގީންކުރުން މުހިންމެވެ. ރީންދޫ ވުމުގެ އިތުރުން ފެނިދާނެ އަލާމާތްތަކުގެ ތެރޭގައި ލޭ މަދުވުން، ކުޑަކަމުދާ އެއްޗެހީގެ ކުލަ ގަދަވުން، ހިތުގެ ތެޅުން އަވަސްވެ ނޭވާ ކުރުވުން އަދި ހަންގަނޑު ދޮންފޫޑުވުން ހިމެނެއެވެ.
ޖީ.6. ޕީޑީ ޑެފިޝިއެންސީ ހުންނަކުދިންނަށް ނުރައްކާވެދާނެ ބައެއް ތަކެތި އަދި ކާނާ:
- ފާވާ ބީން (ފެހި ތޮޅި)
- ސޯއި ބީން އަދި އޭގެ އުފެއްދުންތައް (ސޯއި މިލްކް، ޓޯފޫ)
- ތޮޅި އަދި މުގުގެ ބާވަތްތައް
- ބްލޫބެރީ
- ކަރުބޮލަކު
- ހީނާފަތް
- ޕީނަޓް
- ބައެއްކަހަލަ ބޭސް
މި ބަލި ހުންނަ ކުދިންގެ ހާލަތު ގޯސްވެދާނެކަހަލަ މިފަދަ އެއްޗެހިން ކުދިން ދުރުކޮށްގެން ގެންގުޅުމަކީ ވަރަށް މުހިއްމު ކަމެކެވެ. މިއީ ޖެނެޓިކް ޑިސްއޯރޑަރއެއް ކަމުން މިކަމަކީ ސީދާ ފަރުވާއެއް އޮތްކަމެއް ނޫނެވެ. ނަމަވެސް މި ބަލި ހުންނަ ކުދިންގެ ހާލަތު ގޯސްވެދާނެ ފަދަ ތަކެތިން ކުދިން ދުރުކުރުމުން މީގެ ސަބަބުން ދިމާވެދާނެ ނުރައްކާތަކުން ދަރިފުޅު ސަލާމަތްކުރެވޭނެއެވެ.
