މިޒަމާނުގައި ފޯނު، ޓެބްލެޓް، ލެޕްޓޮޕް އަދި ޓީވީފަދަ ޑިޖިޓަލް ވަސީލަތްތަކަކީ ކޮންމެ އާއިލާއެއްގެވެސް އާއްމު ދިރިއުޅުމާއި ވަރަށް ބޮޑަށް ގުޅި ލާމެހިފައިވާ އެއްޗިއްސެވެ. ޓެކްނޮލިޖީއަކީ މައުލޫމާތު ހޯދުމާއި، ކިޔެވުމާއި، ދުރުގައި ތިބޭ އާއިލާ އަދި ރައްޓެހިންނާ ގުޅުވައިދިނުންފަދަ ގިނަގުނަ ފައިދާތަކެއް ހިމެނޭ އެއްޗެއް ކަމުގައި ވީނަމަވެސް، އޭގައި ގެއްލުންތަކެއްވެސް ހިމެނޭ އެއްޗެކެވެ. ހާއްސަކޮށް މާ ގިނަވަގުތު އޭގެ ބޭނުންކޮށް، މަސްއޫލުވެގެން އުޅޭނަމަ ވަރަށް ބޮޑެތި ގެއްލުންތަކާ ކުރިމަތިލާން ޖެހިދާނެއެވެ. ދިރާސާތަކުން ދައްކާގޮތުގައި، މާ ގިނަ ވަގުތު ސްކްރީން ބޭނުންކުރުމަކީ، ކުދިންގެ ނިދުމަށް ނޭދެވޭ އަސަރު ކުރުމާއި، އަހުލާގީ މައްސަލަތައް ކުރިމަތިވުމާއި، ހެދިބޮޑުވުމުގެ މޭލުގާތައް ހާޞިލްވުމުގައި ލަސްތައް ކުރިމަތިވުމުގެ އިތުރުން ކުދިންގެ ކިޔެވުމަށްވެސް އޭގެ ނޭދެވޭ އަސަރު ވަރަށް ބޮޑަށް ކުރާނެ ކަމެކެވެ. ސުކޫލުގައާއި، މުނިފޫހިފިލުވުމުގައި އަދި އެހެންމީހުނާ ގުޅުން ބަދަހިކުރުމުގެ ތެރޭންވެސް މިފަދަ ވަސީލަތްތަކުގެ ބޭނުން އިތުރުވާ ވަރަކަށް، ވަރަށް ގިނަ ބެލެނިވެރިންގެ ސުވާލަކަށްވަނީ ކުދިންނަށް މިފަދަ ވަސީލަތްތައް ބޭނުން ކުރަން ދޭންވީ ކިހާ ވަގުތަކައްތޯއެވެ.
ސްކްރީން ބޭނުންކުމުގައި ވަކި މިންގަނޑެއް ކަނޑައެޅުން މުހިއްމުވަނީ ކީއްވެ؟
ކަމާ ބެހޭ މާހިރުން ބަޔާންކުރާ ގޮތުގައި، ސްކްރީން ބޭނުންކުރެވޭ ވަގުތު ވަކި ވަރެއްގައި ހިފަހައްޓާފައި ހުރުމަކީ ކުއްޖާގެ ދުޅަހެޔޮކަމަށް ވަރަށް މުހިއްމު ކަމެކެވެ. އެމެރިކަން އެކަޑެމީ އޮފް ޕީޑިއެޓްރިކްސް އިން ބަޔާންކުރާ ގޮތުގައި އުމުރުން 2 އަހަރުން ދަށުގެ ކުދިންނަށް ވީޑިއޯ ޗެޓް ކުރުން ފިޔަވާ އިތުރު އެއްވެސް ގޮތަކުން ސްކްރީން ދެއްކުން އެއްކޮށް ހުއްޓާލަން ޖެހެއެވެ. މި އުމުރަކީ ކުދިންގެ ސިކުނޑީގެ ހެދިބޮޑު ވުމަށް ވަރަށް މުހިއްމު އުމުރެކެވެ. ކުދިން ކަންކަން އެންމެ ބޮޑަށް ދަސްކުރާނީ އެހެންމީހުނާ ސީދާކޮށް ދިމާވެ ކުރާ މުއާމަލާތްތަކުންނާއި، އަތްލައިގެންނާއި އެކުދިން އުޅޭ މާހައުލު ހޯދާ ބަލައިގެނެވެ. މިވަގުތަކީ ކުދިންނާ ގުޅުން ބަދަހިކޮށް، ވާހަކަ ކިޔާދިނުމާއި އެކީކުޅެ ހެދުން ފަދަ ކަންކަމަށް އިސްކަންދޭންވީ ވަގުތެވެ.
2 އަހަރާއި 5 އަހަރާއި ދެމެދުގެ ކުދިންގެ ސްކްރީން ވަގުތު 1 ގަޑިއިރަށްވުރެ ގިނަވެގެން ނުވާނެއެވެ. އަދި މިގޮތަށް މި ދެވޭ 1 ގަޑިއިރު ތެރޭ ދެއްކޭ ޕްރޮގްރާމްތަކަކީ ފައިދާކުރަނިވި ރަނގަޅު ކޮލިޓީގެ ޕްރޮގްރާމްތަކަކަށް ވުމާއި، ކުއްޖާއާއިއެކު މި ޕްރޮގްރާމް ބެލުމުގައި ބެލެނިވެރިޔާވެސް ބައިވެރިވުން މުހިންމެވެ. މިގޮތަށް ކަންތައް ކުރުމުން، ކުއްޖާ އެ ބަލާ އެއްޗަކާމެދު ދަރިފުޅާ މަޝްވަރާކޮށް، ސުވާލުކޮށް އަދި އުނގެނުމަށް ހިތްވަރު ދެވެއެވެ.
އުމުރުން 6 އަހަރުން މަތީގެ ކުދިންނަށް ސްކްރީން ބޭނުންކުރެވޭ ވަގުތު ދިނުމުގައި، ކަނޑައެޅިފައިވާ ވަކި ގަވައިދެއްގެ ދަށުން، އެކުދިންގެ ނިދުމާއި އެހެންމީހުނާ ދިމާވެ މުއާމަލާތްކުރުމާއި، ހެލިފެލިވެ އުޅުމަށް އަސަރު ނުކުރާނެ ގޮތަށް ސްކްރީން ދެވޭ ވަގުތު ހިފަހައްޓަން އެމެރިކަން އެކަޑެމީ އޮފް ޕީޑިއެޓްރިކްސް އިން ބާރު އަޅައެވެ. އަދި މީގެ އިތުރުން، ދުނިޔޭގެ ސިއްހަތު ޖަމިއްޔާ އިން ބަޔާންކުރާގޮތުގައި، އުމުރުން 5 އަހަރުން މަތީގެ ކުދިންނަށް ދުވާލަކު 2 ގަޑިއިރަށްވުރެ ގިނަ ނުވާގޮތަށް ސްކްރީން ބޭނުން ކުރަން ދެވޭ ވަގުތު ހިފަހައްޓަން ޖެހެއެވެ. ކުދިން ސުކޫލަށް ދާންފެށުމާއިއެކު ޑިޖިޓަލް ވަސީލަތްތަކުގެ ބޭނުންކުރުން އިތުރުވެގެން ދެއެވެ. އެހެންކަމުން، ކުދިންގެ ސިއްހަތާއި، ނިދުމާއި ދުޅަހެޔޮކަމަށް މީގެ އަސަރު ކުރާވަރު ކުޑަކުރުމަށްޓަކައި، މި އުމުރުގައި ކުދިންނަށް މިފަދަ ވަސީލަތްތައް ބޭނުން ކުރެވޭ ވަގުތާއި ތަންތަން ކަނޑައަޅައި، މި ވަސީލަތްތައް ބޭނުންކުރަން ވަކި އުސޫލެއް ކަނޑައަޅަން ޖެހެއެވެ. މިސާލަކަށް، ކާ ކޮޓަރި، ނިދާ ކޮޓަރި ފަދަ ބައެއް ތަންތަނަކީ އެއްވެސް ކަހަލަ ޑިޖިޓަލް ވަސީލަތެއް ބޭނުން ކުރުން މަނާ ތަނަކަށް ހެދިދާނެއެވެ. އަދި މީގެ އިތުރުން، ކާ ކަޑި ނުވަތަ ރޭގަނޑު ވަކި ވަގުތެއްގެ ފަހުން މިފަދަ ވަސީލަތައް ބޭނުންކުރުމަކީ މަނާ ގަޑިއަކަށް ހެދިދާނެއެވެ. “އެޕަލް ސްކްރީން ޓައިމް” ނުވަތަ ގޫގްލް “ފެމިލީ ލިންކް” ފަދަ އެޕްލިކޭޝަންތައް ބޭނުންކޮށްގެން ކުދިން ސްކްރީން ބޭނުން ކުރާ ގޮތް މޮނިޓަރ ކުރުމަކީވެސް މުހިއްމު ކަމެކެވެ.
އުމުރުން 13 އަހަރާ 18 އަހަރާ ދެމެދުގެ ކުދިންނަކީ އެހެންމީހުނަށް ބަރޯސާވުން ކުޑަ އަދި ސުކޫލުގެ މަސައްކަތްތައް ނިންމުމުގަޔާއި، އެހެންމީހުނާ ގުޅުންބަދަހިކުރުމާއި މުނިފޫހި ފިލުވުމަށް ޑިޖިޓަލް ވަސީލަތްތަށް ވަރަށް ބޮޑަށް ބޭނުންކުރާ ކުދިބައެކެވެ. އެހެންކަމުން، މާ ބޮޑަށް ހަރުކަށި އުސޫލެއް ކަނޑައެޅުމުގެ ބަދަލުގައި، ސްކްރީން ބޭނުންކުރުމުގެ ސަބަބުން އެކުދިންގެ މޫޑާއި، އުފެއްދުންތެރިކަމާއި އެހެންމީހުނާ އޮންނަ ގުޅުންތަކަށް ކުރާ ނޭދެވޭ އަސަރުތަކާ ގުޅޭގޮތުން މަޝްވަރާކޮށް ވާހަކަ ދައްކައިގެން، ދެފަރާތުން ގުޅިގެން ސްކްރީން ބޭނުންކުރުމުގެ މިންގަނޑެއް ކަނޑައެޅުމަކީ މާ ކާމިޔާބު ގޮތެކެވެ. އަދި ހަމަ އެއާއެކު، ސޯޝަލް މީޑިއާއާއި، އިންޓަރނެޓް ބޭނުންކުރުމުގައި ރައްކާތެރި ގޮތްތަކާމެދު ވާހަކަ ދެއްކުމަކީވެސް މުހިއްމު ކަމެކެވެ.
ރަނގަޅު ސްކްރީން ޓައިމް ރޫޓިން އެއް ގާއިމްކުރާނީ ކިހިނެއް؟
- ނަމޫނާ ދައްކައިގެން: ކުދިންނަކީ ބޮޑެތި މީހުން ކުރާ ކަންކަން ނަކަލު ކުރާ ބައެއް ކަމުން ކާ ގަޑިތަކުގަޔާއި އެހެން މީހުނާ މުއާމަލާތްކުރާ ވަގުތުތަކުގައި މާގިނައިން ބެލެނިވެރިންވެސް ފޯނުގެ ބޭނުން ކުރާކަމުގައިވާނަމަ، ކުދިންގެ ކިބައިގައިވެސް މިފަދަ އާދަތައް ހަރުލުމަކީ ގާތް ކަމެކެވެ.
- އާއިލާ ތެރޭގައި ޑިޖިޓަލް ވަސީލަތްތައް ބޭނުން ކުރާނެ ގޮތުގެ ޕްލޭނެއް އެކުލަވާލުން: މިފަދަ ޕްލޭނެއް އޮތުމަކީ ކުދިންނަށް ބެލޭނެ ރަނގަޅު ކޮންޓެންޓް ނުވަތަ ޕްރޮގްރާމްތަކެއް ނިންމާ، ޑިޖިޓަލް ވަސީލަތްތައް ބޭނުން ކުރެވޭނެ ވަގުތުތަކާއި ތަންތަން ކަނޑައެޅުމުގައި އެހީތެރިވެދޭނެ ކަމެކެވެ.
- ޖިސްމާނީ ހަރަކާތްތެރިކަން އިތުރުކުރުމާއި ނިދުމަށް މުހިއްމުކަން ދިނުން: ދުނިޔޭގެ ސިއްހަތު ޖަމިއްޔާއިން ލަފާދޭ ގޮތުގައި ދުވާލަކު މަދުވެގެން 1 ގަޑިއިރު ކަސްރަތު ކުރުން ފަދަ ޖިސްމާނީ ހަރަކާތްތެރިކަން ހިމެނޭ ކަމެއްކުރުން އުމުރުން 5 އަހަރާއި 17 އަހަރާއި ދެމެދުގެ ކުދިންނަށް ބޭނުންވެއެވެ. މީގެ އިތުރުން ނިދުމުގެ މަދުވެގެން 1 ގަޑިއިރު ކުރިން ސްކްރީން ބޭނުން ކުރުން ހުއްޓާލަން ޖެހެއެވެ.
- ސްކްރީން ބޭނުން ނުކުރެވޭ ވަގުތުތަކަކާއި ތަންތަން ކަނޑައެޅުން: ސްކްރީން ބޭނުން ކުރުން މަނާ ވަގުތުތަކެއް (މިސާލަކަށް ކާ ވަގުތު، ނިދާ ވަގުތު) ނުވަތަ ސްކްރީން ބޭނުން ކުރެވޭނެ ވަކި ގަޑިއެއް ކަނޑައެޅާ ގަވައިދުން އެގޮތަށް އަމަލު ކުރުމަކީ ކުދިން ސްކްރީން ބޭނުން ކުރާވަރު ކޮންޓްރޯލު ކުރުމަށް ފަސޭހަވެގެން ދާނެ ކަމެކެވެ. ސްކްރީން ބޭނުންކުރާ ވަގުތު މަދުވުމަކީ އާއިލީ ގުޅުން ބަދަހިވުމަށް މަގުފަހިވެ، އަރާމު ނިދި ލިބުމަށް މަގުފަހިވާނެ ކަމެކެވެ.
- ކުދިން ސްކްރީން ބޭނުން ކުރުމުގައި މުނިފޫހި ފިލުވުމުގެ ގޮތުން ކުޅޭ ގޭމުތަކާއި، ބަލާ ކާޓޫނު ނުވަތަ ފިލްމު އަދި ވީޑިއޯތަކުގެ ބަދަލުގައި ކޯޑިންގ، ޑިޖިޓަލް އާރޓް ނުވަތަ އުނގެނުމަށް ތައްޔާރުކޮށްފައި ހުރި ވީޑިއޯ ނުވަތަ އެޕްލިކޭޝަން ބޭނުން ކުރާވަރު އިތުރުކުރުމަކީވެސް ފައިދާ ހުރިގޮތުގައި މި ވަސީލަތްތައް ބޭނުން ކުރުމަށް ކުރެވިދާނެ ކަމެކެވެ. މި ވަސީލަތްތައް ހަމައެކަނި މުނިފޫހި ފިލުމަށް ބޭނުން ކުރުމުގެ ބަދަލުގައި އުފެއްދުންތެރި ގޮތަކަށް ބޭނުން ކުރުމަށް ކުދިންނަށް ބާރު އަޅާށެވެ.
ޝައްކެތްނެތް ގޮތުގައި ޓެކްނޮލޮޖީއަކީ ވަރަށް މުހިއްމު އެއްޗެކެވެ. ހަމަ އެފަދައިން ކުދިން މި ވަސީލަތްތަކަށް ރަނގަޅަށް އަހުލުވެރިވެ، އޭގެ ބޭނުން ކުރުމުގެ ހުނަރު ލިބުމަކީވެސް ވަރަށް މުހިއްމު ކަމެކެވެ. އެހެން ނަމަވެސް ވިސްނުންތެރިކަމާއެކު ވަކި މިންގަނޑުތަކެއް ކަނޑައެޅި، ބެލެނިވެރިންގެ ބައިވެރިވުން އިތުކޮށްގެން، ކުދިންނަށް މީގެން ވާ ގެއްލުން ކުޑަ ވާނެ
