ކޮންމެ މީހެއްގެ ހަޔާތުގައިވެސް، ދައްތަ، ބޭބޭ ނުވަތަ ކޮއްކޮމެނާ އޮންނަ ގުޅުމަކީ އެންމެ ގިނަ ދުވަހަށް ދެމިއޮންނަ އަދި އެންމެ މުހިއްމު އެއް ގުޅުމެވެ. ނަމަވެސް މި ގުޅުމުގެ ތެރޭން ވާދަވެރިކަމާ، ހަސަދަވެރިވުމާ އަދި ހަމަނުޖެހުން އުފެދިގެން ދިއުން އެއީ އާއްމުކޮށް ފެންނަ ކަމެކެވެ. ދޭތެރެއަކުން ހިނގާ ދެބަސްވުމަކީ އާދައިގެ އަދި ދުޅަހެޔޮ ކަމެއް ނަމަވެސް ދިގުދެމިގެންދާ ހަރުކަށި ވާދަވެރިކަމަކީ އާއިލާގެ ހަމަޖެހުމަށް އަސަރުކޮށް ދިގު މުއްދަތުގައި ކުދިންގެ ޖަޒުބާތީ ދުޅަހެޔޮކަމަށް އަސަރު ކުރާނެ ކަމެކެވެ.
މިކަން މިގޮތަށް ދިމާވާން މެދުވެރިވާ އަސްލު ސަބަބު ދެނެގަނެ ކުދިންގެ މެދުގައި ދިމާވާ ހަމަނުޖެހުމާއި ވާދަވެރިކަން ހައްލުކުރަން ދަސްކުރުމަކީ ގޭތެރޭގެ ހަމަޖެހުން ހިފަހައްޓާ، ކުދިންގެ ޖަޒުބާތީ ހުނަރުތައް ތަރައްގީ ވުމަށް މަގުފަހިވާނެ ކަމެކެވެ.
ސިބްލިނގް ރައިވަލްރީއަކީ ކޮބާ؟
ސިބްލިންގް ރައިވަލްރީއަކީ އެއް އާއިލާއެއްގެ ކުދިންގެ މެދުގައި އޮންނަ ވާދަވެރިކަމާއި، ހަސަދައާއި، ހަމަ ނުޖެހުމެވެ. މިއީ ބައެއްފަހަރު ދެވަނަ ދަރިފުޅު އުފަންވުމުގެ ކުރިންވެސް ފެށިގެން އަންނަ ވާދަވެރިކަމެކެވެ. ދެވަނަ ދަރިފުޅަށް ބަލިވެ އިންނަ ހިސާބުން ފެށިގެންވެސް، ފުރަތަމަ ކުއްޖައަށް ދެވޭ ސަމާލުކަން ބެހިގެންދާ ކަމާއި ތަފާތުވެގެންދާކަން ފުރަތަމަ ދަރިފުޅަށް އިހުސާސްކުރެވެން ފަށައެވެ.
ދަރިންގެ މެދުގައި އޮންނަ ވާދަވެރިކަން އުފެދެން މެދުވެރިވާ ސަބަބުތައް
1. ސަމާލުކަން ހޯދުމުގެ ވާދަވެރިކަން
ކުދިންނަކީ އަބަދުވެސް މައިންބަފައިންގެ ލޯތްބާއި ރުހުން ބޭނުންވާ ބައެކެވެ. އެކުދިންގެ ނަޒަރުގައި ސަމާލުކަމަކީ ލޯބިވާކަމުގެ ހެއްކެކެވެ. އެހެންކަމުން، އެ ކުދިންނަށް ލިބޭ ލޯތްބާއި ސަމާލުކަން ބެހިގެންދާކަމަށް އެ ކުދިންނަށް އިހުސާސްކުރެވެން ފަށައިފިނަމަ އެ ހޯދަން އެކުދިން މަސައްކަތް ފަށައެވެ. ނޭންގުމެއްގެ ތެރޭންވިޔަސް އެކުދިންނަށް ދެވޭ ސަމާލުކަން ކުޑަވެއްޖެނަމަ ނުތަނަވަސްކަން އިހުސާސްކުރެވެއެވެ. މީގެ ސަބަބުން، އެ ސަމާލުކަން ބެހިންދާ ސަބަބުކަމަށްވާ ކޮއްކޮއާމެދު ހަސަދަވެރިކަމާ، ރުޅިވެރިކަން އުފެދެއެވެ. ބޮޑެތި މީހުނާ ހިލާފަށް ކުދިންނަށް މިގޮތަށް އިހުސާސް މިކުރެވެނީ ކީއްވެކަމެއް ދެނެގަންނަން ފަސޭހައެއް ނޫނެވެ. އެހެންކަމުން،ބާކީވާކަން އިހުސާސްވެޔޭ ބުނުމުގެ ބަދަލުގައި އެކުދިންގެ އުޅުމުން ނުވަތަ ކުރާކަންތައްތަކުން އެކަން ފެނިގެންދެއެވެ. މިސާލަކަށް ކޮއްކޮއާ ދިމާކުރުން، އެހެންމީހުން ވާހަކަ ދައްކަނިކޮށް އެ ވާހަކައެއް ހުއްޓުވާ އަމިއްލައަށް ބުނަން ބޭނުން އެއްޗެއް ބުނަން މަސައްކަތް ކުރުން،ސުކޫލުގައި އުޅޭއިރު އުޅުމަށް ބަދަލުއައުންފަދަ (މިސާލަކަށް މަޑުން ނުހުރެވުން، އެހެންކުދިންނަށް ނުވަތަ ޓީޗަރަށް އުނދަގު ކުރުން) ކަންކަން ފެނިގެން ދެއެވެ. ހާއްސަކޮށް ކުރިން ހުރިހާ ސަމާލުކަމެއް ލިބެމުން އައިސް އިތުރު ކުއްޖަކު އުފަންވުމުން މަންމަމެންގެ ސަމާލުކަން ބެހިގެން ދިއުމުން މި އިހުސާސް ކުރެވުންމީ އާއްމުކޮށް ދިމާވާ ކަމެކެވެ.
2. ޝައުގުވެރިވާ ކަންކަމާއި ޝަހުސިއްޔަތުގައި ހުންނަ ތަފާތުކަމެއްގެ ސަބަބުން
މަޑުމައިތިރި އަދި ލަދުވެތި ކުއްޖަކާ، ހަލަބޮލި އަދި އެހެންމީހުނާ ގުޅޭ ކުއްޖަކާ ކުޅުމުގައި އަދި މުއާމަލާތް ކުރުމުގައި ތަފާތުތަކެއް ހުރެދާނެއެވެ. އަބަދު ކުޅިވަރުތެރޭ އުޅޭ އަދި ނުކިޔަމަންތެރި ކުއްޖާއާމެދު ކިޔެވުމަށް ޝައުގުވެރިވާ ކުއްޖާ ނުރުހުން ވެދާނެއެވެ. އަދި ހަމަ އެހެންމެ، ކިޔެވުމަށް ޝައުގުވެރިވާ ކިޔަމަންތެރި ކުއްޖާއާ މެދު އަބަދު ކުޅިވަރުތެރޭ އުޅޭ ނުކިޔަމަންތެރި ކުއްޖާ ނުރުހުން ވެދާނެއެވެ. އެއް ކުއްޖަކު އަމިއްލައަށް އެކަނި ވަގުތު ހޭދަކުރުމާއި، މަޑުމައިތިރިކަމަށް ލޯބި ކުރާއިރު އަނެއް ކުއްޖަކީ އަޑުގަދަ، ވާހަކަ ދެއްކުމަށް ލޯބިކުރާ އަދި އެހެން މީހުނާ އެކު ވަގުތު ހޭދަކުރުމަށް ލޯބިކުރާ ކުއްޖަކަށް ވެދާނެއެވެ. އެހެންކަމުން، އެއްކުއްޖަކަށް އަޑުގަދަވެގެން އުނދަގުވާއިރު އަނެއް ކުއްޖަކަށް ބާކީވުމާއި އެކަނިވެރިކަން އިހުސާސް ކުރެވެއެވެ.
3. ކުދިންގެ މެދުގައި ތަފާތުކުރުން ނުވަތަ ތަފާތު ކުރާކަމަށް ދެކެވުން
ގިނަ ބެލެނިވެރިންނަކީ ކުދިންގެ މެދުގައި ގަސްތުގައި ތަފާތުކުރުން ގެންގުޅޭނެ ބެލެނިވެރިންނެއް ނޫނެވެ. ނަމަވެސް، ބައެއް ފަހަރު ނޭންގި ނަމަވަސް އެއްކުއްޖަކަށް ތަފާތު ކުރާކަން އިހުސާސް ކުރެވޭ ކަހަލަ ގޮތަކަށް ބެލެނިވެރިންނަށް ކަންތައް ކުރެވޭތަން އާދެއެވެ. މިސާލަކަށް، ބެލެނިވެރިޔާއާއި އެއްކަހަލަ ކަންކަމަށް ޝައުގުވެރިކަން ހުންނަ ނުވަތަ މިޒާޖުގެ ގޮތުން އެއްގޮތް ކުއްޖާއާ ގިނަފަހަރު ވާހަކަ ދައްކާ ހަދަން ފަސޭހަވެ ގުޅިގެން އުޅެން ފަސޭހަވެއެވެ. މީގެ އިތުރުން އުފަންވާ ތަރުތީބަކީވެސް ވަރަށް މުހިއްމު ރޯލެއް އަދާކުރާ ކަމެކެވެ. ދޮށީ ދަރިފުޅުގެ ފަރާތުން ގިނަފަހަރަށް ކުރެވޭ އުއްމީދުތައް ބޮޑުވެފަ ޒިންމާތައް ބޮޑުވާއިރު އެންމެ ހަގު ދަރިފުޅު މާ ބޮޑަށް ލޯބިން ކުޑަ ކުއްޖެއް ގޮތަށް ކަންތައް ކޮށްދީގެން އުޅެވޭތަން އާދެއެވެ. ކުދިންގެ އުޅުމާއި އަހުލާގުގައި ހުންނަ ތަފާތު ކަމެއްގެ ސަބަބުން ވެސް ބައެއްފަހަރު ކުދިންނަށް ތަފާތުކުރާކަން އިހުސާސް ކުރެވޭ ގޮތަށް ކަންތައް ހިނގާފާނެއެވެ. ބުނާ ގޮތް ހަދާ، ކިޔަމަންތެރި އަދި ބޮޑާހޭކުން ކުޑަ ކުދިންނަކީ ގެންގުޅެން ފަސޭހަ ކުދިން ކަމުން އެކުދިންނަށް ސަމާލުކަން ދެވޭގޮތް މާ ޕޮޒިޓިވްކޮށްވެސް ފެނިދާނެއެވެ. މީގެ އިތުރުންވެސް، ހާއްސަ އެހީއަށް ބޭނުންވާ ކުއްޖެއްނަމަ ނުވަތަ ސިއްހީ މައްސަލައެއް ހުންނަ ކުއްޖެއްނަމަ، ބެލެނިވެރިންގެ ވަގުތާއި ސަމާލުކަން އިތުރަށް ބޭނުންވާނެއެވެ. މި ސަމާލުކަމަކީ ކޮންމެހެން ލިބެންޖެހޭ އެއްޗެއްކަމުގައިވީނަމަވެސް، ނޭންގުމެއްތެރޭން ދެން ތިބޭ ކުދިންނަށް ބާކީވުމާ، އަޅާލުން ކުޑަކަމުގެ އިހުސާސްކުރެވޭ ފަހަރު އާދެއެވެ. މިފަދަ ކަންކަމަކީ އަޅާނުލާ ދޫކޮށްލައިފިނަމަ، ކުދިންގެ މެދުގައި ތަފާތު ކުރުމުގެ އިހުސާސްއާއި، އެއްކުއްޖަކު އަނެއްކުއްޖަކަށް ހަސަދަ އުފެދެން މެދުވެރިވެދާނެ ކަންކަމެވެ.
4. މާހައުލުގެތެރޭން ކުރިމަތިވާ ހާސްކަމާއި ކަންބޮޑުވުންތައް
އާއިލާ ރޫޅުން، އާއިލާގެ މީހަކު މާބޮޑަށް ބަލިވެ އުޅުން،ވަޒީފާ ގެއްލުން، އުޅޭ ތަން ބަދަލުވާންޖެހި އެކީ އުޅޭ ރައްޓެހިންނާ ދުރުވާންޖެހުން ފަދަ ދިރިއުޅުމަށް އަންނަ ބޮޑެތި ބަދަލުތަކުގެ ސަބަބުން ޖަޒުބާތިގޮތުން ކުދިންނަށް ވަރަށް ބޮޑު އަސަރެއްކުރެއެވެ. މިފަދަ ހާލަތްތަކާ ބޮޑެތިމީހުންފަދައިން ކުރިމަތިލުމުގެ ޖަޒުބާތީ ހުނަރެއް މިކުދިންގެ ކިބައިގާ ނުހުރެއެވެ. އެހެންކަމުން، އެކުދިންގެ ހާސްކަމާ ހިތާމަ އެކުދިންގެ ރުޅިއާ، އެކަހެރިވުމާ އަނިޔާވެރިވުމުގެ އަމަލުތަކުގެ ސިފައިގާ ބޭރުވެގެން ދިއުމަކީ ގާތްކަމެކެވެ. ގިނަފަހަރަށް މިގޮތަށް ރުޅިއައިސްގެން ކުރެވޭ ކަންކަން އަމާޒުކުރެވޭނީ އެންމެ ގާތުގަ އުޅޭ ކޮއްކޮ، ބޭބެ ނުވަތަ ދައްތަ ފަދަ މީހުނަށެވެ. ވިސްނަންވީ ކަމަކީ މިހާލަތުގައި މި އުފެދޭ ވާދަވެރިކަމަކީ، ހާލަތުގެ ސަބަބުން ކުރިމަތިވާ ޖަޒުބާތީ ޕްރެޝަރާއި ގުޅިގެން ދިމާވާ ކަމެއްކަމެވެ. ގިނަފަހަރު ކުދިންނަށްވެސް ތަޅާފޮޅެނީ ކީއްވެކަން ނުވިސްނޭނެއެވެ.
5. ކުދިންގެ މެދުގައި އަޅާކިޔުން
ކޮންމެ ކުއްޖަކުވެސް އެ ކުއްޖެއްގެ ހުރި ތަފާތު ސިފަތަކާއި ޝަހުސިއްޔަތާއެކު އެހެންމީހުން ބަލައިގަންނަ ކުއްޖަކަށް ވާން ބޭނުންވެއެވެ. އެހެން ކުދިންނާ އަޅާކިޔުން ނުވަތަ އެހެން ކުއްޖަކު އުޅޭގޮތަށް އުޅެން ކިޔާނަމަ، އެ އަޅާކިޔޭ ކުއްޖަކާމެދު ހިތުގައި ނަފުރަތާ ހަސަދަ އުފެދެން މެދުވެރިވެއެވެ. އެހެންކަމުން މައިންބަފައިންވެސް އެއްކުއްޖެއްގެ ރަނގަޅުވާހަކަ އަނެއްކުއްޖެއްގާތު މާގިނައިން ކިޔާ އެގޮތަށް އުޅެން ބުނާނަމަ ކުދިންގެ މެދުގައި ވާދަވެރިކަމާ ހަސަދަ އުފެދި، މައްސަލަތައް ޖެހުމަށް މެދުވެރިވެއެވެ. އަދި މީގެ ސަބަބުން ކުދިން އަމިއްލަ ނަފްސަށް އޮންނަ އިތުބާރު ކުޑަވެއެވެ.
ދަރިންގެ މެދުގައި އޮންނަ ވާދަވެރިކަން ހައްލު ކުރުމަށް ބެލެނިވެރިންނަށް ކުރެވިދާނެ ކަންކަން
ވަކި ކޮޅެއް ނުނެގުން
ކުއްވެރިވަނީ ކޮންކުއްޖެއްތޯ ނުވަތަ އެހާލަތުގައި ރަނގަޅީ ކޮންކުއްޖެއްތޯ ބެލުމަށް ބެލެނިވެރިޔާ އަވަސްވެގަތުމުން ކުދިން ބެލެނިވެރިޔާގެ ނިންމުމަށް ބަރޯސާވާލެއް އިތުރުވެއެވެ. ނުވަތަ އެއްކުއްޖަކަށް ބެލެނިވެރިޔާ ހުރީ އަނެއްކުއްޖާގެ ކޮޅުގައިކަމަށް އިހުސާސްކުރެވެއެވެ. މީގެ ބަދަލުގައި، ކުދިން ދެކޭގޮތް ބުނެދީ، އެކަކު އަނެކަކު ދައްކާ ވާހަކަ ރަނގަޅަށް އަޑުއަހާ،ރަނގަޅު ހައްލަކާ ހަމައަށް ދިއުމަށް ދަސްކޮށްދޭށެވެ. މިސާލަކަށް، “ދަރިފުޅު ބޮޑު ކުއްޖަ ގޮތްދޫކުރަން ވާނޭ” ބުނުމުގެ ބަދަލުގައި ” ދަރިފުޅު ތިހިރީ ހިތްހަމަ ނުޖެހިފަކަން މަންމައަށް އިނގޭ، ކަންހިނގި ގޮތް ދެކުދިންވެސް ރީތިކޮށް މަންމައަށް ކީޔާދީބަލަ” މިފަދަ ގޮތަކަށް ކުދިންނާ ވާހަކަ ދެއްކިދާނެއެވެ.
ވަކި ގޮތަކަށް ކުދިން ލޭބަލް ކުރުން ނުވަތަ ކުދިންގެ މެދުގައި އަޅާކިޔުން ހުއްޓާލުން
އެއްކުއްޖަކަށް މީ އެންމެ މޮޅު ކުއްޖައޭ ނުވަތަ އެންމެ އެހީތެރިވާ ކުއްޖައޭ ކިޔާ އަނެއްކުއްޖަ ކުރިމަތީ މާގިނައިން ތައުރީފު ކުރާނަމަ ނޭންގިނަމަވެސް ކުދިންގެ މެދުގައި ވާދަވެރިކަމެއް އުފެދެއެވެ. މިސާލަކަށް، “ދައްތަ ގޮތަށް ތަންތަން ސާފު ނުކުރަނީ ކީއްވެހޭ” ބުނުމުގެ ބަދަލުގައި “މަންމަ ވަރަށް އުފާވާނެ ދަރިފުޅު ކޮޓަރިތެރެ ސާފުކުރުމަށް މަންމައަށް އެހީތެރިވެދިނީމަ” މިފަދަ ގޮތަކަށް ބުނުމުން އެހެން ކުއްޖަކާ އަޅާކިޔާ ކަމުގެ އިހުސާސް ކުއްޖާއަށް ނުކުރެވޭނެއެވެ.
ކޮންމެ ކުއްޖެއްގެވެސް ހުރި ރަނގަޅު ކަންތައްތަކާ ހުނަރުތައް ފާހަގަކުރުން
ކޮންމެ ކުއްޖަކަށްވެސް އެ ކުއްޖެއްގެ އަމިއްލަ ޝަޚްޞިއްޔަތު ތަރައްޤީކުރުމަށް އެހީތެރިވާށެވެ. މިގޮތުން އެކުއްޖާ ޝައުގުވެރިކަން ހުންނަ ތަފާތުކަންތައްތަކާއި ކުރާހިތްވާކަންތައް ތަކުގައި އަދި ރަޙްމަތްތެރިކަމުގެ ގުޅުންތަކަށް އެހީތެރިވެ އެއްބާރުލުން ދޭށެވެ. ކުދިންނާއި އެކު އޮންނަ ގުޅުން ވަރުގަދަ ކުރުމަށްޓަކައި ކޮންމެކުއްޖަކާއިއެކުވެސް ވަކިވަކިން ވަގުތުކޮޅެއް ހޭދަކުރުމަކީ ވަރަށް ބޭނުންތެރިކަމެކެވެ.
އާއިލާގެ ތެރޭގައި ހާއްސަ އުޞޫލެއް ގެންގުޅެ އެ ތަންފީޒުކުރުން
އުމުރުފުރާއާއި ގުޅޭގޮތުން ހުރިހާ ކުދިންވެސް އަމަލުކުރަންވީ ގޮތުގެ ވަކި އާއިލީ ގަވައިދެއް ނުވަތަ އުސޫލުތަކެއް ކަނޑައެޅިދާނެއެވެ. މިސާލަކަށް އެއްކުއްޖަކު އެނަނެއް ކުއްޖަކަށް އެކުއްޖާ ނުރުހޭ ނަމަކުން ނުގޮވުން. އެއްކުއްޖު އެނެއްކުއްޖަކަށް އެހީތެރިވުން، އެއްވެސް ކުއްޖަކު އެނެއް ކުއްޖާއަށް ތަދުވާފަދަ ކަމެއް ނުކުރުން. ކުޅޭގަޑިތަކުގައިވެސް އަދި އެހެނިހެން ކަންކަމުގައިވެސް އެއްކުއްޖަކު އަނެއް ކުއްޖަކަށް ފުރުޞަތުދިނުން.
ކުދިންގެ މެދުގައި ދެބަސްވުމެއް ހިނގާވަގުތުގައި މަޑުމައިތިރިކަމާއިއެކު އެކުދިންނަށް އާއިލާގެ ތެރޭގައި އެކުލަވާލެވިފައިވާ އުސޫލު ހަނދާންކޮށްދީ އެފަދަ ކަމެއް މުސްތަގުބަލުގައި ދިމާވެއްޖެނަމަ އެކަން ހައްލުކުރާނެ ރަނގަޅު ގޮތާއިމެދު ވިސްނާ ހިޔާލުބަދަލުކޮށްލުމަކި ވަރަށް ރަނގަޅުކަމެކެވެ.
މައްސަލަތައް ހައްލުކުރާނެ ގޮތް ކުދިންނަށް ދަސްކޮށްދިނުން.
ކުދިންނަށް ކުރެވޭ އިހުސާސްތައް ދެނެގަނެ ދެމެހެއްޓުމަށް އެކުދިންނަށް އެހީތެރިވެދޭށެވެ. ފޮތްތަކާއި، ރޯލް-ޕްލޭފަދަ ކަންތައްތަކުން އެކުދިންނަށް އިހުސާސްތައް ދެނެގަންނާނެ ގޮތާއި ބަޔާންކޮށްދޭނެގޮތް ދަސްކޮށްދެވިދާނެއެވެ. އަދި ހިތްހަމަ ނުޖެހޭ ކަމެއް ދިމާވުމުން އެކަމެއް ހައްލުކުރެވޭނެ ރަނގަޅު ގޮތްތައް ދަސްކުރުމަށް އެހީތެރިވެވިދާނެއެވެ.
ކުދިންގެ މެދުގައި ގުޅުންބަދަހި ކުރުމަށް ބާރުއެޅުން.
އެގޮތުން ކުދިން އެކުގައި ކުރަންޖެހޭ ބައެއް ކަންކަން ހަވާލުކުރުމާއި، ކޮންމެ ދުވަހަކުވެސް ހުރިހާކުދިން އެކުގައި ކުޅުމަށް ވަގުތުކޮޅެއް ހޭދަކުރުމާއި، ކަމަކާއި ދެބަސްވި ނަމަވެސް އިހުތިރާމާއިއެކު ދެބަސްވެވޭނެކަން ނަމޫނާ ދެއްކުމާއި، ނިދާވަގުތު ވަހަކަ ކިޔުން ނުވަތަ ހަފްތާގެ ވަކި ރެޔެއްގައި ހުރިހާކުދިން އެއްކޮށް ވަގުތު ހޭދަކޮށްލުމުގެ ގޮތުން ފިލްމެއް ބަލާލުން ފަދަ ކަންކަން ކުރުމަކީ ކުދިންގެ މެދުގައި އޮންނަ ގުޅުން ވަރުގަދަ ކުރެވޭނެ ގޮތްތަކެކެވެ.
ކުދިންގެ މެދުގައި އުފެދޭ ވާދަވެރިކަމަކީ އެއްކޮށް ނައްތާލެވޭނެ ކަމެއް ކަމުގައި ނުވިނަމަވެސް އެއީ ކޮންޓްރޯލް ކުރެވިދާނެ އަދި ރަނގަޅު ގޮތަކަށް ބަދަލުކުރެވިދާނެ ކަމެކެވެ. މަގުދެއްކުމާއި، އޯގާތެރިކަމާއި، އަދި ރަނގަޅު ވަސީލަތްތަކާއެކު، މައިންބަފައިންނަށް ކުދިންގެ މެދުގައި އުފެދޭ ދެބަސްވުންތަކަކީ އެކަކު އަނެކަކުގެ އިހުސާސްތައް ދަންނަ، ވަރުގަދަ ގުޅުމަކަށް ބަދަލުކުރެވިދާނެއެވެ.
މައިންބަފައިންގެ ހައިސިއްޔަތުން އަޅުގަނޑުމެންގެ މަޤްޞަދަކަށް ވާންވާނީ ހުރިހާ މައްސަލަތަކެއް ނައްތާލުމެއް ނޫނެވެ. ނަމަވެސް، ތިމާގެ ދަރިންނަށް އެހެން މީހުންގެ ވާހަކަ އަޑުއެހުމާއި، އިޙްތިރާމްކުރުމާއި، އަދި އެއްބަސްނުވާ ހާލަތްތަކުގައިވެސް އެކަކު އަނެކަކަށް ލޯބިވާން ދަސްކޮށްދިނުމެވެ.
