މައްސަރު ކަންތައް ނުވަތަ ޕީރިއަޑަކީ ޖިންސީ ބަދަލުތަކުގެ ގުދުރަތީ ބައެކެވެ. ނަމަވެސް ގިނަ ކުދިންނަށް މިކަމާއެކު އުނދަގޫ އިހުސާސްތަކާއި، ހާސްކަމާއި އަދި ވޭނާ ކުރިމަތިލާން ޖެހެއެވެ. މިކަމުގެ ސަބަބުން ސްކޫލަށް ދިއުމާއި، ދުވަހުގެ މަސައްކަތްތަކާއި އަދި ނަފްސާނީ ދުޅަހެޔޮކަމަށް އަސަރުކުރެއެވެ. މައިންބަފައިންގެ ހައިސިއްޔަތުން، އާންމު ކަމަށް ބެލެވޭނެ މައްސަރު ތަދަކީ ކޮބައިކަމާއި، އިތުރަށް ސީރިއަސް މައްސަލައެއް ހުރިކަން ދައްކުވާދޭނެ ސިގުނަލްތަކަކީ ކޮބައިކަމާއި، އެ ކުދިންނަށް މިހާލަތުގައި ރަނގަޅަށް އެހީތެރިވެވޭނީ ކިހިނެއްކަން ދެނެގަތުމަކީ މުހިންމު ކަމެކެވެ. ދިރާސާތަކުން ދައްކާ ގޮތުގައި މައްސަރު ކަންތަކާއި ގުޅިގެން ކޮންމެވެސް ވަރަކަށް ތަދުވުމަކީ އާންމު ކަމެއް ނަމަވެސް، ގަދައަށް ރިއްސުމާއި އަދި ދިގު މުއްދަތަކަށް ދެމިގެންދާ ރިހުމަކީ އެތެރޭގައި އެހެން މައްސަލައެއް ހުރިކަން ދައްކުވައިދޭ ކަމެކެވެ. އަދި މިފަދަ ކަންކަމަށް ވަރަށް ބޮޑަށް ސަމާލުކަން ދޭން ޖެހެއެވެ.
އާންމު ނުވަތަ ނޯމަލް ޕީރިއަޑު ތަދަކީ ކޮބާ؟
މައްސަރު ކަންތަކުގެ ފުރަތަމަ ދުވަސްތަކުގައި ދަށް ބަނޑުގައި ރިއްސުމާއި، ބުރަކަށީގައި ނުވަތަ ފައިގެ މަތީ ބައިގައި މެދުމިނުގެ ރިއްސުމެއް އިހުސާސްވުމަކީ މައްސަރުކަންތައް އަލަށް ދިމާވާ ކުދިން ނުވަތަ ފުރާވަރުގެ އަންހެން ކުދިންގެ މެދުގައި ވަރަށް އާންމު ކަމެކެވެ. މި ބާވަތުގެ ރިހުމަށް ކިޔަނީ ޕްރައިމަރީ ޑިސްމެނުރިއާ އެވެ. މިއީ ޕްރޮސްޓަގްލަންޑިންސް ކިޔާ ގުދުރަތީ ހޯމޯނު ބާވަތެއްގެ މާއްދާތަކެއްގެ ސަބަބުން ވާ ކަމެކެވެ. މި މާއްދާތަކުގެ ސަބަބުން ރަހިމަށް ކޮންޓްރެކްޝަންއެއް އައިސް އޭގެ އެތެރޭގައިވާ ފަށަލަ (މައްސަރު ކަންތަކުގައި އަންނަ ލެއާއި، މަސްދުވަހުގެ ތެރޭގައި ރަހިމުގައި އުފެދިފައިވާ ޓިޝޫތައް) ބޭރުވުމަށް މަގުފަހިވެއެވެ. މި ތަދު އާންމުކޮށް ފެށެނީ ޕީރިއަޑްވުމުގެ އެކެއް ނުވަތަ ދެ ދުވަސް ކުރިންނެވެ. އަދި ލޭ އަންނަން ފަށާތާ ފުރަތަމަ ދެ ދުވަހުގެ ތެރޭގައި ރަނގަޅުވާން ފަށައެވެ. ގިނަ އަންހެން ކުދިންނަށް އަރާމުކޮށްގެން، ހޫނު އެއްޗަކުން ބޮނޑިތާންކޮށްގެން ނުވަތަ ތަދު ކަނޑުވާ ބޭސް ބޭނުންކޮށްގެން މިކަމުން އަރާމު ލިބެއެވެ.
އާދަޔާ ހިލާފު ތަދަކީ ކޮބާ؟
މައްސަރު ކަންތަކާ ގުޅިގެން ކޮންމެވެސް ވަރެއްގެ ތަދެއް އުފެދުމަކީ އެކަށީގެންވާ ކަމެއް ކަމުގައި ވީ ނަމަވެސް، ތަދުގެ ސަބަބުން ދަރިފުޅުގެ އާންމު ދިރިއުޅުމުގެ ކަންކަން ކުރުމަށް އުނދަގުވާނަމަ ނުވަތަ ހުރަސް އެޅޭނަމަ، މިއީ އާއްމު ނުވަތަ އާދައިގެ ތަދެއްކަމަށް ބަލައިގެން ނުވާނެއެވެ. ގިނަ ދުވަސްތަކެއް ވަންދެން ދެމިގެންދާ ގަދަ ރިހުމަކާއި، ހޮޑުލުމާއި އެނބުރުން އެރުމާއި، ތަދު ކަނޑުވާ ބޭހުންވެސް ތަދަށް ފަސޭހައެއް ނުލިބުން، ނުވަތަ އާންމުކޮށް ސްކޫލަށް ނުދެވޭ ހިސާބަށް ދިއުމަކީ ސެކަންޑަރީ ޑިސްމެނުރިއާގެ އަލާމާތްތަކެވެ. މި ބާވަތުގެ ތަދަކީ ގިނަ ފަހަރު އެންޑޮމީޓްރިއޯސިސް (ރަހިމުގެ އެތެރެފަށަލައާ އެއްގޮތް ޓިޝޫއެއް ރަހިމުން ބޭރުގައި ހެދުން)، ޕެލްވިކް އިންފްލެމޭޓަރީ ޑިޒީޒް، އޯވަރިއަން ސިސްޓް، ނުވަތަ ފައިބްރޮއިޑްސް ފަދަ ބަލިތަކާ ގުޅިފައިވާ ވޭނެކެވެ.
ބައެއް ހާލަތްތަކުގައި، މި ކުދިންނަށް އާދަޔާ ހިލާފަށް ގިނައިން ލޭއައުން (ގަޑިއިރަކު އެއްފަހަރު ޕެޑް ބަދަލުކުރަންޖެހޭ ވަރަށް ގިނަ ގަޑިއިރުތަކެއް ވަންދެން ލޭއައުން)، 7 ދުވަހަށްވުރެ ގިނަ ދުވަހު ލޭއައުން، ނުވަތަ 21 ދުވަހަށްވުރެ ކުރު ނުވަތަ 45 ދުވަހަށްވުރެ ދިގު މައްސަރު ސައިކަލްތައް ތަޖުރިބާކުރެއެވެ. މިއީވެސް މައްސަރު ކަންތަކުގައި ނުވަތަ ދަރިފުޅުގެ ދަރިމައިވުމުގެ ސިއްހަތުގެ މައްސަލައެއް ހުރި ކަމުގެ އަލާމާތްތަކެވެ. އަދި މިފަދަ ކަންކަން ޑޮކްޓަރަކަށް ދައްކައިގެން ބަލަންވާނެއެވެ. ފްރޮންޓިއަރސް އިން ރިޕްރޮޑަކްޓިވް ހެލްތް (2024) ގައި ޝާއިއުކޮށްފައިވާ ދިރާސާއަކުން ދައްކާގޮތުގައި، ގިނަ އަދަދެއްގެ ފުރާވަރުގެ ކުދިން މިފަދަ އަލާމާތްތަކުން އެމީހުންގެ ދިރިއުޅުމަށް ބޮޑެތި އަސަރުތައް ކުރި ނަމަވެސް، މައުލޫމާތު ނެތުމުގެ ސަބަބުން ނުވަތަ ވާހަކަ ދެއްކުމުގެ ޖެހިލުންވުމުގެ ސަބަބުން މިކަމާ ގުޅޭގޮތުން ވާހަކަ ނުދައްކާ ހަމަހިމޭނުން ތިބެއެވެ.
މައްސަރު ދުވަސްވަރު މާ ބޮޑަށް ބަނޑުގައި ރިއްސުމުގެ ސަބަބުތަކަކީ ކޮބާ؟
މައްސަރު ދުވަސްވަރު އާދަޔާ ހިލާފަށް ބޮޑަށް ބަނޑުގައި ރިއްސުމަށް މެދުވެރިވެދާނެ އެކި ސަބަބުތައްވެއެވެ. އެންމެ އާންމު ސަބަބަކީ ޕްރޮސްޓަގްލަންޑިންގެ މިންވަރު މަތިވުމެވެ. މިއީ ރަހިމުގެ ކޮންޓްރެކްޝަން އުފެދޭވަރު ގަދަވެ، ރިއްސުން ބޮޑުވުމަށް މެދުވެރިވާ ކަމެކެވެ. ސެކަންޑަރީ ޑިސްމެނުރިއާގައި، އެހެނިހެން ސަބަބުތަކުގެ ތެރޭގައި އެންޑޮމީޓްރިއޯސިސް ހިމެނެއެވެ. މިއީ ރަހިމުގެ އެތެރޭގައި އުފެދޭ ޓިޝޫތަކާ އެއްގޮތް ޓިޝޫތަކެއް ރަހިމުން ބޭރުގައި އޯވަރީ ނުވަތަ ޕެލްވިސްގެ ނުވަތަ ހަށިގަނޑުގެ އެހެން ހިސާބުތަކުގައި ފެތުރިގެން ދިއުމެވެ. މީގެ އިތުރުން ޕެލްވިކް އިންފެކްޝަންތަކުގެ ސަބަބުން ރިޕްރޮޑަކްޓިވް އޯގަންތަކަށް ގެއްލުން ލިބުމާއި، ރަހިމުގެ އެކި މައްސަލަތައް ފަދަ ސްޓްރަކްޗަރަލް މައްސަލަތައް ވެސް ހިމެނެއެވެ.
ޕޮލިސިސްޓިކް އޯވަރީ ސިންޑްރޯމް (ޕީސީއޯއެސް) ގެ ސަބަބުން ވެސް މައްސަރު ކަންތައް ނުގަވާއިދުން އައުމާއި ބަނޑުގައި ރިއްސުން ކުރިމަތިވެދާނެއެވެ. ނަމަވެސް ޕީސީއޯއެސްއާއެކު އާންމުކޮށް މޫނުގައި ބިހި ނެގުމާއި، މޫނުގައި މާ ގިނައިން އިސްތަށި ފެޅުމާއި، ހަށިގަނޑުގެ ބަރުދަން އިތުރުވުން ފަދަ އެހެނިހެން އަލާމާތްތަށް ހިމެނެއެވެ. ސްޓްރެސްގެ ސަބަބުން ނުވަތަ ތައިރޮއިޑްގެ މައްސަލަތަކުގެ ސަބަބުން ނުވަތަ ހަށިގަނޑުގެ ބަރުދަން ލުއިވުމުގެ ސަބަބުން ހޯމޯން ބެލެންސް ނުވުމަކީ ވެސް މައްސަރު ކަންތައް ނުގަވާއިދުން އައުމާއި އުނދަގޫތައް ކުރިމަތިވުމަށް މެދުވެރިވެދާނެ ކަމެކެވެ.
މައިންބަފައިން ކަންތައް ކުރަންވީ ކިހިނެއް؟
އެންމެ ފުރަތަމަ އަދި އެންމެ މުހިންމު ފިޔަވަޅަކީ ދަރިފުޅަށް މައްސަރު ކަންތަކާ ބެހޭ ގޮތުން ލަދުވެތިކަމެއް ނެތި ވާހަކަދެއްކޭނެ ރައްކާތެރި އަދި ހުޅުވާލެވިފައިވާ މާހައުލެއް ގާއިމުކުރުމެވެ. ކުރީ ކޮޅުގައި މިފަދަ މަޝްވަރާތައް ފެށުމާއެކު، ކޮންމެވެސް ވަރެއްގެ ރިއްސުމަކީ އާދައިގެ ކަމެއް ނަމަވެސް، ތަދު އިތުރުވަމުން ދާނަމަ އެއްވެސް މީހަކާ ހިއްސާނުކޮށް ހުރެ އެ ތަދާ އެކަނި ކުރިމަތިލާން ނުޖެހޭނެކަން ދަރިފުޅަށް ބުނެދޭށެވެ. ދަރިފުޅުގެ މައްސަރުކަންތަކުގެ ސައިކަލް ރެކޯޑުކުރުމަށް ހިތްވަރުދޭށެވެ. މިގޮތުން މައްސަރު ކަންތައް ފެށޭ އަދި ނިމޭ ތާރީހުތަކާއި، ރިއްސުމުގެ މިންވަރު، އަދި އާދަޔާ ހިލާފު އެއްވެސް އަލާމާތެއް ހުރިތޯ ނޯޓުކުރުމަށް އިރުޝާދުދޭށެވެ. މި މައުލޫމާތަކީ ޑޮކްޓަރަކާ މަޝްވަރާކުރަން ޖެހިއްޖެނަމަ ވަރަށް ބޭނުންތެރި މައުލޫމާތުތަކެކެވެ.
ގަދަ، ދިގު މުއްދަތަކަށް ދެމިގެންދާ، ސްކޫލް އަދި ހަރަކާތްތަކަށް އަސަރުކުރާ ވޭނެއްގެ ޝަކުވާ ދަރިފުޅު ކުރާނަމަ، އެއީ ސިއްހީ ލަފާ ހޯދަންޖެހޭ ވަގުތެވެ. ތަފާތު ޓެސްޓްތަކާއި އަލްޓްރާސައުންޑްގެ އެހީތެރިކަމާއެކު އެންޑޮމީޓްރިއޯސިސް ނުވަތަ ޕީސީއޯއެސް ފަދަ ބަލިތައް ނެތްކަން ޑޮކްޓަރުން ޔަގީން ކުރެއެވެ. ގިނަ ހާލަތްތަކުގައި، ތަދު ކަނޑުވާ ބޭސް، ހޯމޯން ފަރުވާ، ކާނާގެ ބަދަލުތައް، އަދި ދިރިއުޅުމުގެ ވައްޓަފާޅީގެ ބަދަލުތައް ހިމެނޭ އަސަރުހުރި ފަރުވާތައް ލިބެން ހުރެއެވެ.
ބެލެނިވެރިން ގޭގައި ދަރިފުޅަށް ތަދު މެނޭޖްކުރުމަށް އެހީތެރިވުމުގެ ގޮތުން ކުރެވިދާނެ ކަންތައްތަކުގެ ތެރޭގައި “ހީޓް ޕެކް”އަކުން ބޮނޑިތާން ކޮށްދިނުން، ގިނައިން އަރާމުކުރުމަށް ބާރު އެޅުން، ދިޔާ އެއްޗެހި ގިނައިން ދިނުން އަދި ސިއްހަތަށް ފައިދާހުރި ކާނާ ކާންދިނުން ހިމެނެއެވެ. އަދި މީގެ އިތުރުން،ގަވާއިދުން ޖިސްމާނީ ހަރަކާތްތަކުގައި ބައިވެރިވުމަށް ހިތްވަރުދޭށެވެ. އެއީ މިކަންތައްތކުން، ދިގު މުއްދަތަށް ބަލާއިރު ޕީރިއަޑުގެ ސަބަބުން ދިމާވާ އުނދަގޫތައް މަދުކުރުމަށް އެހީތެރިވެދޭނެއެވެ.
މައްސަރު ކަންތަކާއެކު އަބަދު ކެއްނުކުރެވޭ ވަރު ވޭނެއްގައި އުޅެން ޖެހުމަކީ އަންހެން ދަރިފުޅު އަބަދު އުޅެންޖެހޭނެ ގޮތެއް ނޫނެވެ. އަވަހަށް ފިޔަވަޅު އެޅުމާއި، ރަނގަޅަށް މުއާމަލާތުކުރުމާއި އިހްތިރާމާއެކު ބެލެހެއްޓުމަކީ އަންހެން ދަރިފުޅަށް އޭނާގެ ބަދަލުވަމުންދާ ހަށިގަނޑާމެދު އިތުބާރާއި ރައްކާތެރިކަން އިހްސާސްކުރުމަށް އެހީތެރިވެދޭނެ ކަންކަމެވެ.
