ތުއްތު ކުއްޖަކު ބެލެހެއްޓުމަކީ ދިރިއުޅުމުގައި އެންމެ އުފާވެރި ތަޖުރިބާތަކުގެ ތެރެއިން އެއް ތަޖުރިބާއެވެ. ނަމަވެސް އެއީ ވަރަށް ބޮޑު ގޮންޖެހުމެއް އޮންނަ ކަމެކެވެ. ކުޑަ ކުޑަ ފުރާނައެއް ބެލެހެއްޓުމުގެ އުފާވެރިކަމާއެކު، އެތައް ރެއެއްގެ ނިދި ހަމައަށް ނުލިބި، އަބަދުހެން ގާތުން ދިނުމުގެ އިތުރުން އެ ތުއްތު ދަރިފުޅުގެ ބޮޑު އަދި ކުދި ކޮންމެ ބޭނުމަކަށް ސަމާލުވުމުގެ ބުރަ އާދެއެވެ. މިކަންކަން ކުރަމުންދާއިރު، ގިނަ މައިންބަފައިން، ހާއްސަކޮށް މައިންނަށް އެމީހުންގެ އަމިއްލަ ބޭނުންތައް ފަސްކޮށްލެވެއެވެ. ނަމަވެސް، އަމިއްލަ ނަފްސު ބެލެހެއްޓުމަކީ ވަރަށް މުހިންމު ކަމެކެވެ. އެއީ އަމިއްލަ އެދުން އިސްކުރުމެއްނޫނެވެ. ހަށިގަނޑަށް ކޮންމެހެން ބޭނުންވާ މިންވަރަށް ނިންޖާއި އަރާމު ލިބުމާއި، ނަފްސާނީ ގޮތުން އެހީތެރިކަން ލިބޭ، އަދި ސިއްހަތު ސަލާމަތުން ހުރި މައިންބަފައިންނަށް އެމީހުންގެ ދަރިފުޅު ރަނގަޅަށް ބެލެހެއްޓުމަށް ނަފްސާނީ އަދި ޖިސްމާނީ ގޮތުން ތައްޔާރުވެވޭނެއެވެ.
މައިންބަފައިން އަމިއްލަ ނަފްސު ބެލެހެއްޓުން މުހިންމުވަނީ ކީއްވެ؟
ތުއްތު ކުއްޖަކު ބެލުމުގައި ހޭދަވާ ދުވަސްވަރުގައި އަމިއްލަ ނަފްސު ބެލެހެއްޓުމަކީ މައިންބަފައިންގެ ހަށިގަނޑާއި ނަފްސަށް އެކަނި މުހިއްމު ކަމެއްނޫނެވެ. މިއީ ކުއްޖާގެ ހެދިބޮޑުވުމަށްވެސް ވަރަށް މުހިންމު ކަމެކެވެ. ސައިންސުގެ ދިރާސާތަކުން ދައްކާ ގޮތުގައި ކުއްޖާ ބަލަހައްޓާ ފަރާތްތައް ސްޓްރެސްވެ، ވަރުބަލިވެ، ނުވަތަ ނަފްސާނީ ގޮތުން ބަލިކަށިވެފައި ތިބޭނަމަ، އެކަމުގެ އަސަރު ކުއްޖާއާ ގުޅުން ބަދަހިކުރުމަށާއި، ކުއްޖާގެ ނަފްސާނީ ތަރައްގީއަށާއި، އަދި ސިއްހަތަށް ވެސް ކޮށްފާނެއެވެ. 2016 ވަނަ އަހަރު ޖަރނަލް އޮފް ޗައިލް އެންޑް ފެމިލީ ސްޓަޑީޒްގައި ޝާއިއުކުރެވުނު ދިރާސާއަކުން ދައްކާފައިވަނީ މައިންބަފައިންގެ “ބަރންއައުޓް” ނުވަތަ ވަރުބަލިކަމާއި، ކެތްތެރި ވެވޭ މިންވަރު ކުޑަވުމާއި، ނަފްސާނީ ގޮތުން އިޖާބަދޭ މިންވަރު ދައްވުން އަދި ޑިޕްރެޝަންގެ ނިޝާންތައް އިތުރުވުމާ ގުޅިފައިވާ ކަމަށެވެ. މައިންބަފައިން ނަފްސާނީ ގޮތުން ރަނގަޅަށް ތިބޭނަމަ، އެމީހުންގެ ދަރިފުޅުގެ ބޭނުންތައް ދެނެގަތުމަށް އަދި ލޯތްބާއި، ހަމަޖެހުމާއެކު، ސާފުކޮށް އިޖާބަދިނުމަށް ވެސް އެމީހުންނަށް ފަސޭހަވާނެއެވެ.
ކުރެވިދާނެ ކަންތައްތައް
1. ފުރުސަތު ލިބުނުވަރަކުން އަރާމުކުރުމަށް އިސްކަންދިނުން
ތުއްތު ކުއްޖެއް އުފަންވެގެން އުޅޭ ގެއެއްގައި ރަނގަޅަށް ނިދުން މިއީ ނުކުރެވޭނެ ކަމެއްހެން ހީވިޔަސް، ކުޑަ ވަގުތުކޮޅަކަށްވިޔަސް އަރާމުކޮށްލުމުންވެސް ބޮޑު ތަފާތެއް ފެނިގެންދާނެއެވެ. ތުއްތު ދަރިފުޅު ނިދާއިރު، އެއީ ހަމައެކަނި 20 މިނިޓުގެ ނިދިކޮޅެއް ނަމަވެސް ނިދާލާށެވެ. ކުރެވެން އޮތްނަމަ، ރޭގަނޑު މެދުކެނޑުމެއްނެތި ގިނަ ވަގުތުކޮޅަކަށް ނިދާލެވޭނެ ގޮތެއް ހޯދުމަށް ފިރިމީހާ ނުވަތަ އާއިލާގެ އެހެން މެންބަރަކާއެކު ވަގުތު ބަހާލައިގެން ނިދޭނެ ފުރުސަތެއް ހޯދޭތޯ ބަލާށެވެ. ގޭތެރޭގެ މަސައްކަތްތަކާއި އެހެނިހެން ޒިންމާތަކާ ބެހޭގޮތުން ހިތުގައި ބާއްވާ އުއްމީދުތައް ކުޑަކުރުމަކީވެސް އެހީތެރިވާ ކަމެކެވެ. ގޭތެރެ ތަރުތީބުކޮށް ބޭއްވުމަށް ކުރާމަސައްކަތް މަޑުކޮށްލެވިދާނެއެވެ. ނަމަވެސް ސިއްހަތު ސަލާމަތުން ބެހެއްޓުމަށް ކުރާ މަސައްކަތަކީ މަޑުޖައްސާލެވޭނެ ކަމެއްނޫނެވެ. ނިދި ނުލިބުމަކީ ހިތުގެ ހާލަތާއި، ނިންމުންތައް ނިންމުމުގެ ގާބިލިއްޔަތާއި، ޖިސްމާނީ ސިއްހަތަށް އަސަރުކުރާ ކަމެކެވެ. އެހެންކަމުން، އެއްވެސް ވަރަކަށް އަމިއްލަ ނަފްސު ކުއްވެރި ކުރުމެއްނެތި އަރާމުކުރުމުގެ ހުއްދަ އަމިއްލަ ނަފްސަށް ދޭށެވެ.
2. ހަށިގަނޑަށް ފައިދާހުރި ކާނާ ކެއުން (ހަމައެކަނި ސްނެކްސް ނޫން)
ތުއްތު ކުއްޖަކު ބަލަހައްޓާ ބައެއް މަންމައިން ރަނގަޅަށް ކެއުމަށް ހަނދާން ނެތެއެވެ. ފަސޭހައިން އަތުޖެހޭގޮތަށް ހުންނަ ބިސްކޯދު، ޕެކެޓްކޮށްފައި ހުންނަ ސްނެކްސް ނުވަތަ ކޮފީ ބޯލުމަކީ ފަސޭހަ ކަމެކެވެ. ނަމަވެސް ހަށިގަނޑަށް ހަގީގީ ކާނާގެ ބޭނުންތެރިކަން ބޮޑެވެ. ހާއްސަކޮށް ދަރިފުޅަށް ގާތުން ކިރުދޭނަމައެވެ. ކުރިއާލާ ފަސޭހައިން ތައްޔާރުކޮށްލެވޭފަދަ ކެއުމެއް ތައްޔާރުކޮށްލުން ނުވަތަ އާއިލާގެ މެމްބަރެއްގެ އެހީއަކަށް އެދެވިދާނެއެވެ. ކައްކާފައި ހުންނަ ބިސް، ހިއްކާފައި ހުންނަ މޭވާ، ނަޓްސް އަދި ކޮށާފައި ހުންނަ މޭވާ ފަދަ ސިއްހަތަށް ފައިދާހުރި ސްނެކްސް ފަސޭހައިން އަތްފޯރާ ފަށުގައި ބަހައްޓާށެވެ. ހަށިގަނޑުގައި ހުންނަންޖެހޭ ފެނުގެ މިންވަރު މާބޮޑަށް ދަށައްދިޔަ ނުދިނުމަކީވެސް ހަމަ އެހާމެ މުހިންމު ކަމެކެވެ. ދިވެހިރާއްޖޭގެ މޫސުމުގެ ސަބަބުން ހަށިގަނޑުން ފެން މަދުވުން ނުވަތަ ޑީހައިޑްރޭޓްވުމުގެ ނުރައްކާ އިތުރުވެދާނެއެވެ. އެހެންކަމުން މުޅި ދުވަހު ގިނަ އަދަދަކަށް ފެން، ކުރުނބާ ފެން ނުވަތަ ހަރބަލް ޓީ ބޮއިގެން ހަށިގަނޑުގައި ވަރުޖެއްސުމަކީ ކުރެވިދާނެ ކަމެކެވެ.
3. އެހީތެރިކަމަށް އެދުމާއި އެހީތެރިކަން ގަބޫލުކުރުން
ގިނަ ސަގާފަތްތަކުގައި، ހާއްސަކޮށް ދިވެހިރާއްޖޭގައި، އާއިލީ އެހީތެރިކަން ވަރަށް ބޮޑަށް އޮވެއެވެ. އެހެންނަމަވެސް، ބައެއް މައިންބަފައިން މި އެހީތެރިކަމަށް އެދެން ޖެހިލުންވެއެވެ. އެހީތެރިކަމަށް އެދުމަކީ ބަލިކަށިކަމެއް ނޫންކަމާއި، އެއީ ހިތްވަރުގަދަ ކަމެއްކަން ދެނެގަތުން މުހިންމެވެ. ފިރިމީހާ، އެއްބަނޑުއެއްބަފާ މީހަކު، މައިންބަފައިން ނުވަތަ ރަހުމަތްތެރިއެއް ކަމުގައި ވިޔަސް، އެހީތެރިކަން ދިނުމަށް އެމީހުންނަށް ފުރުސަތު ދޭށެވެ. އެގޮތުން ނިދާފައި އޮންނައިރު ކުޑަކުއްޖާ ބެލުން، ކެއުން ތައްޔާރުކުރުން، ނުވަތަ ހަމައެކަނި އެކީ ވާހަކަ ދައްކާލުން ވެސް މީގެ ތެރޭގައި ހިމެނެއެވެ. ކުއްޖާގެ ކަންތައްތައް ކުރުމަކީ ހަމައެކަނި މަންމަ ކުރަންޖެހޭ ކަމެއްގެ ގޮތުގައި ނުދެކޭށެވެ. މަސައްކަތް ބަހާލުމަކީ ދަރިން ބެލެހެއްޓުން އިތުރަށް ފަސޭހަ ކަމަކަށް ވެގެންދާނެއެވެ.
4. ދުވާލަކު 10-15 މިނިޓު އަމިއްލަ ނަފްސަށް ހާއްސަކުރެވޭތޯ މަސައްކަތް ކުރާށެވެ
އަމިއްލަ ނަފްސަށް ގިނަ ވަގުތުތަކެއް ދިނުމަކީ ކުރެވޭނެ ކަމެއް ކަމުގައި ނުވިނަމަވެސް، އަމިއްލަ ނަފްސަށް ދޭ 10 ނުވަތަ 15 މިނިޓުގެ ސެލްފް-ކެއަރއިންވެސް ރަނގަޅު އަސަރެއް ކުރާނެއެވެ. އެވަގުތު ހަކަތަ އިތުރުކޮށްދޭ ކަމެއް ކުރުމަށް ބޭނުންކުރާށެވެ. މިސާލަކަށް ހަމަހިމޭންކަމާއެކު ވަގުތު ހޭދަކޮށްލުން، ޑައިރީ ލިޔުން، ސްޓްރެޗްކުރުން، ނުވަތަ ފޮތެއް ކިޔުންފަދަ ކަމެއް ކުރެވިދާނެއެވެ. ބެލްކަނީ ނުވަތަ ގޯތިތެރޭ އިނދެ ސައިތައްޓެއް ބޯލުން ނުވަތަ އަވަސް އަވަހަށް ނޭވާލާފަދަ ކަސްރަތެއް ވެސް ކޮށްލެވިދާނެއެވެ. ހާއްސަކޮށް ދަރިފުޅު ނިދާފައި އޮންނަ ވަގުތު މިކަން ގަވައިދުން ކުރުމުން، ސްޓްރެސް ކުޑަކުރުމަށް އަދި ނަފްސާނީ ގޮތުން ހުންނަ ހާސްކަން ފިލުވާލުމަށް އެހީތެރިވެދޭނެއެވެ. މި ކުޑަ ވަގުތުކޮޅުވެގެން ދާނީ ހަށިގަނޑަށް ހަމަހަމަކަމެއް އުފައްދައިދީ، އަމިއްލަ ބޭނުންތައް ވެސް މުހިންމުކަން ހަނދާންކޮށްދޭ ވަގުތު ކޮޅަކަށެވެ.
5. އަމިއްލަ ނަފްސާނީ ސިއްހަތު ރައްކާތެރިކުރުން
އަލަށް މައިންބަފައިންނަށް ވުމުން ޖަޒުބާތީ ގޮތުން އެކި ހާލަތްތައް ކުރިމަތިވުމަކީ އާންމު ކަމެކެވެ. ނަމަވެސް ގިނަދުވަހަށް ދެމިހުންނަ ހިތާމަވެރިކަމުގެ އިހުސާސް، ނާއުންމީދުވުން، ނުވަތަ ކަންބޮޑުވުމުގެ އިހުސާސްތަކަކީ ކުއްޖާ ވިހެއުމަށްފަހު ދިމާވާ ނަފްސާނީ ހިތާމަވެރިކަން (ޕޯސްޓްޕާޓަމް ޑިޕްރެޝަން) ނުވަތަ ކަންބޮޑުވުން (އެންޒައިޓީ) ގެ ނިޝާންތަކަކަށް ވެދާނެއެވެ. މި ނިޝާންތައް އަވަހަށް ދެނެގަތުމަކީ މުހިންމު ކަމެކެވެ. ދަރިފުޅާ ދުރުހެން ހީވާނަމަ، އަރާމުކޮށްލުމަށްފަހުވެސް އާދަޔާ ހިލާފަށް ވަރުބަލިކަން އިހުސާސްކުރެވޭނަމަ، ސަބަބެއްނެތި ރޮވެންފެށޭނަމަ، ނުވަތަ އާދައިގެ ދިރިއުޅުމުގެ ކަންކަމުން އުފާ ނުލިބޭނަމަ، ސިއްހީ ހިދުމަތްދޭ ފަރާތަކާ ވާހަކަ ދައްކާށެވެ. ކުއްޖާ ވިހެއުމަށްފަހު ދިމާވާ ނަފްސާނީ ގޮންޖެހުންތަކަކީ އާންމު އަދި ފަރުވާ ކުރެވޭ ކަންކަމެވެ. މިއީ އެކަނި ކުރިމަތިލާން ޖެހޭ ކަމެއްކަމަށް ނުދެކި، އެހީތެރިކަން ހޯދުމުން އަމިއްލަ ނަފްސަށާއި ކުއްޖާއަށްވެސް ބޮޑު ބަދަލެއް ގެނެސްދޭނެއެވެ.
6. ކޮންމެ ކަމެއް އެންމެ ފުރިހަމަކޮށް ކުރުމަށް އަންނަ ޕްރެޝަރު ކުޑަކުރުން
ސޯޝަލް މީޑިއާއިން، މައިންބަފައިންނަށްވުމަކީ ފަސޭހަ ކަމެއްގެ ގޮތުގައި ދައްކުވައިދީފާނެއެވެ. ފޮޓޯތަކުން ފެންނަފަދަ އެންމެ ފުރިހަމަކޮށް ރީތިކޮށްތިބޭ ތުއްތު ކުދިންނާއި އަބަދުވެސް ސާފުކޮށް ތަރުތީބުކޮށް އޮންނަ ގެތައް ދައްކައިގެންނެވެ. ނަމަވެސް ހަގީގަތުގައި، މައިންބަފައިންނަށްވުމަކީ ފަސޭހަ ކަމެއްނޫނެވެ. އަދި ޖަޒުބާތީގޮތުން ގޮންޖެހުންތައް ހުންނަ ކަމެކެވެ. އެހެން މީހުންނާ އަޅާކިޔުމުން އިތުރުވާނީ ހަމައެކަނި ބޭކާރު ޕްރެޝަރެކެވެ. ކަންތައްތައް ބޭނުންވާގޮތަށް އެންމެ ރަނގަޅަށް ނުދާ ދުވަސްތަކާ ދިމާވުމާއި، ހިތްހަމަނުޖެހުން އިހުސާސްވުމާއި، ނުވަތަ އަރާމުކޮށްލާނެ ވަގުތުކޮޅެއް ނުވަތަ ހުސްވަގުތުކޮޅެއް ހޯދަން އެދުމަކީ މައްސަލައެއް ނޫނެވެ. އެންމެ ފުރިހަމަ ވުމުގެ ވިސްނުން ދޫކޮށްލާށެވެ. ދަރިފުޅަށް ބޭނުންވަނީ ހުރިހާ ކަމެއް ފުރިހަމަ މަންމައެއް ނޫނެވެ. ސިއްހީގޮތުން ދުޅަހެޔޮ، ލޯބިދޭ، އަދި ފުރިހަމަނޫން މަންމައެއްވެސް ކުއްޖާއަށް ފުދޭނެއެވެ. އަމިއްލަ ނަފްސަށް ހެޔޮކޮށް ހިތާށެވެ، ކުޑަކުޑަ ކާމިޔާބީތައް ފާހަގަކުރާށެވެ، އަދި ގޯސްކުރެވޭ ކަންތައްތަކަކީ މި ދަތުރުގެ ބައެއްކަން ބަލައިގަންނާށެވެ.
ތުއްތު ކުއްޖަކު ގެންގުޅުމުގެ ތެރޭގައި އަމިއްލަ ނަފްސަށް ބެލުމަކީ ހާސިލުކުރުމަށް އަގުބޮޑު ކަމެއްހެން ހީވެދާނެއެވެ. ނަމަވެސް އެއީ ހަގީގަތުގައި ވަރަށް މުހިންމު ކަމެކެވެ. އަރާމާއި، އެހީތެރިކަމާއި، ރަނގަޅު ކެއުމާއި، ހަމަޖެހުން ލިބުން ކޮންމެ މީހަކަށް ހައްގުވެގެންވެއެވެ. ހަމައެކަނި މައިންބަފައިނަށްޓަކައެއް ނޫނެވެ. ކުއްޖާގެ ދުޅަހެޔޮ ކަމަށްވެސްމެއެވެ. އަމިއްލަ ނަފްސުގެ ދުޅަހެޔޮކަމަށް އިސްކަންދިނުމުން، ތިޔަ ދައްކައިދެނީ ނަފްސަށް ލޯބިދިނުމާއި، ހަމަޖެހުމާއި، ވަރުގަދަކަމުގެ ނަމޫނާއެކެވެ.
