ބިޒީ ގޭބިސީތަކުގައި، ހާއްސަކޮށް ގިނަ ކުދިން ތިބޭ ގޭބިސީތަކުގައި، ގޭތެރޭގެ މަސައްކަތްތަކާއި، ސްކޫލަށް ކުދިން ގެންދިއުމާއި، މަސައްކަތުގެ ސްޓްރެސްއާއި، އިޖްތިމާޢީ ޒިންމާތަކުގެ ތެރެއިން ވަގުތުތައް ބެހިގެން ދިއުމަކީ ފަސޭހަ ކަމެކެވެ. ނަމަވެސް މި ހުރިހާ ކަމަކާއިއެކުވެސް، ދަރިން އެންމެ ބޮޑަށް ބޭނުންވަނީ މައިންބަފައިން އެކުދިންނަށް ހާއްސަ ސަމާލުކަމެއް ދިނުމެވެ. ފަހުގެ ދިރާސާތަކާއި ތަރުބިއްޔަތުގެ މާހިރުން އެއްބަސްވާ ގޮތުގައި، ކޮންމެ ދަރިފުޅަކާއި އެކުވެސް ވަކިން ވަގުތުކޮޅެއް ހޭދަކުރުމަކީ ބެލެނިވެރިންނަށް އެކުދިން ފެންނަކަމާއި، އަގުވަޒަންކުރާކަން ކުދިންނަށް އިހްސާސްކުރެވި އެކުދިންނާއި ބެލެނިވެރިންނާ ދެމެދު ގާތް ގުޅުމެއް އުފެދުމަށް އެހީތެރިވާ ކަމެކެވެ. މިކަން މުހިންމުވާ ސަބަބުތަކާއި އަދި ބިޒީ ދިރިއުޅުމުގައިވެސް މިކަން ކުރެވޭނެ ގޮތްތައް ތިރީގައި ފާހަގަ ކޮށްލާނަމެވެ.
ޖަޒުބާތީ ގޮތުން ވަރުގަދަ ގުޅުމެއް އުފައްދައިދިނުން
ކޮންމެ ދަރިއަކާއެކުވެސް އެހެން ފަރާތެއްގެ އުނދަގުލެއް ނުވަތަ މެދުކެނޑުމެއްނެތި ވަގުތު ހޭދަކުރުމަކީ ބެލެނިވެރިންނާއި ދަރިފުޅާއިދެމެދު ގާތްކަމާއި އިތުބާރު އުފައްދައިދޭ ކަމެކެވެ. އެމެރިކަން އެކަޑަމީ އޮފް ޕީޑިއެޓްރިކްސް (2023) ގައި ވާގޮތުން، މައިންބަފައިންގެ ފަރާތުން އާންމުގޮތެއްގައި ވަކިވަކިން ސަމާލުކަން ލިބޭ ދަރިން، ރައްކާތެރި ގުޅުމެއް އުފެއްދުމަށް ފުރުސަތު ބޮޑެވެ. އަދި އުޅޭއުޅުމުގައި ސުލޫކީ މައްސަލަތައް ކުރިމަތިވާވަރު މަދުކަމަށް ފާހަގަކުރެވެއެވެ. މި ދެވޭ ވަގުތަކީ ދަރިންނަށް އެމީހުން ހާއްސަކަން އިހުސާސްކުރެވި، އަދި އާއިލާގެ މެމްބަރެއްގެ އިތުރުން ވަކި ފަރުދެއްގެ ގޮތުގައިވެސް ލޯބިލިބިގެންވާކަން ގަބޫލުކުރެވޭ ކަމެކެވެ.
މިގޮތުން ގާތްގަނޑަކަށް 15 މިނެޓާއި 20 މިނެޓުގެ ވަގުތުކޮޅެއް ނަމަވެސް، ފޯނު ނުވަތަ އެހެން ކުދިންގެ ސަބަބުންވިޔަސް ސަމާލުކަން ނުގެއްލި އެކުއްޖަކަށް ހާއްސަކުރުމުންވެސް ވަރަށް ބޮޑު ތަފާތެއް ގެނެސްދޭނެއެވެ. ދަރިން ވަގުތު މާނަކުރަނީ ލޯބީގެ ގޮތުގައެވެ. އެގޮތުން ހާއްސަ ވަގުތުކޮޅު ލިބުމުން ޖަޒުބާތީގޮތުން އެކުދިން ވަރަށް ރަނގަޅު އަސަރެއް ކުރެއެވެ. އަދި މިކަމަކީ ޅަފަތުގައާއި ދަރިފުޅު ބޮޑުވުމަށްފަހުވެސް ދެމިގެންދާ ވަރުގަދަ ގުޅުމެއްގެ ބިންގަލަކަށް ވެގެންދެއެވެ.
އަމިއްލަ ނަފްސަށްކުރާ އިތުބާރާއި އަގު އިތުރުވުން
ދަރިންނާއެކު ވަކިވަކިން ވަގުތު ހޭދަކުރުމުން، އެދަރިފުޅަކީ ބެލެނިވެރިންނަށް ކިހާ މުހިންމު މީހެއްކަން ދަރިފުޅަށް ވިސްނެއެވެ. ޗައިލްޑް ޑިވެލޮޕްމަންޓް (2022) ގައި ޝާއިއުކުރެވުނު ދިރާސާއަކުން ހާމަވާގޮތުގައި، ބެލެނިވެރިންނާއެކު ގަވާއިދުން ވަކިވަކިން ތަފާތު ހަރަކާތްތަކުގައި ވަގުތު ހޭދަކުރާކުދިން އަމިއްލަ ނަފްސަށްކުރާ އިތުބާރު ވަރުގަދަވެއެވެ. އަދި އޭގެ ސަބަބުން އެކުދިން މިނިވަންކަމާއެކު އަމިއްލަ ހިޔާލު ފާޅުކުރުމަށް ބާރުއަޅައެވެ. އެކުދިން އަމިއްލަ ނަފްސު ދެކެން ފަށަނީ މުހިންމު އަދި ގާބިލު ބައެއްގެ ގޮތުގައެވެ.
ހާއްސަކޮށް އެއް ކުއްޖަށްވުރެ ގިނަ ކުދިން ތިބޭ އާއިލާތަކުގައި މިކަމަކީ ކުރުން ވަރަށް މުހިންމު ކަމެކެވެ. އެފަދަ އާއިލާތަކުގައި ކުދިންގެ މެދުގައި އަޅާކިޔުމާއި ވާދަވެރިކަމުގެ ސަބަބުން ކުއްޖާގެ އަމިއްލަވަންތަކަމުގެ އިހުސާސް ގެއްލިގެން ހިނގައިދާނެއެވެ. މަސްބާނަން ދިއުން، ކެއްކުން، ނުވަތަ ހަވީރު ވަގުތު އެކުގައި ފޮތް ކިޔުން ފަދަ ކަންކަމަކީ ކުއްޖާއަށް ސަމާލުކަން ހޯދުމަށް އެހެން ކުދިންނާ ވާދަކުރަން ނުޖެހޭ މާހައުލެއް ފަހިކޮށްދޭ ކަންކަމެވެ.
ކޮންމެ ކުއްޖެއްގެ ވަކިވަކި ބޭނުންތައް ދެނެގަތުމަށް އެހީތެރިވެދޭ
ކޮންމެ ކުއްޖަކީވެސް ތަފާތު ކުއްޖެކެވެ. އަދި އެކުދިންގެ ޖަޒުބާތީ ބޭނުންތަކާއި، ލޯބި ފާޅުކުރާ ގޮތްތަކާއި، ބިރުގަންނަ ކަންކަމާއި، އުންމީދުތައްވެސް ތަފާތެވެ. މައިންބަފައިން ކޮންމެ ކުއްޖަކާއެކު ވަކިވަކިން ވަގުތު ހޭދަކުރުމުން، އެކުދިންގެ ޝަހްސިއްޔަތާއި، ދަތިތަކާއި، ހުނަރުތައް ރަނގަޅަށް ދެނެގަނެވެއެވެ. ގްރޫޕް މާހައުލެއްގައި ފާހަގަނުވާ ކަންކަން، ގިނަފަހަރު ހަމަހިމޭންކޮށް ވަކިވަކިން ދެކެވޭ ވާހަކަތަކުގައި ހާމަވެއެވެ.
ޕްރީސްކޫލް ކުއްޖަކު ކުޅޭ ސަރަހައްދާ ގުޅޭގޮތުން ކަންބޮޑުވާ ކަމެއްގެ ވާހަކަ ދައްކަން ބޭނުންވިޔަސް، ނުވަތަ ފުރާވަރު ކުއްޖަކު ހަށިގަނޑުގެ ސިފައަށް އަންނަ ބަދަލުތަކާއި ގުޅޭ ގޮތުން ދެކޭގޮތް ނަމަވެސް، ވަކިވަކިން ވަގުތު ހޭދަކުރުމަކީ މައިންބަފައިންނަށް އެކުދިންގެ އެތެރޭގެ ދުނިޔެ ސާފުކޮށް ފެންނާނެ ކަމެކެވެ. މިކަމުގެ ސަބަބުން އެކުދިންގެ ޖަޒުބާތީ އަދި ހެދިބޮޑުވުމުގެ ތަރައްޤީގެ ބޭނުންތަކަށް އިތުރަށް ފަރުވާތެރިކަމާއިއެކު އިޖާބަދިނުމަށް އެހީތެރިވެދެއެވެ.
ދަރިންގެ މެދުގައި އުފެދޭ ހަސަދަވެރިކަން މަދުކުރުން
ކުދިންގެ މެދުގައި އުފެދޭ ގިނަ މައްސަލަތައް ފެށެނީ އިންސާފުވެރިކަމާއި ސަމާލުކަން ލިބޭ މިންވަރު މަދުކަމަށް އިހުސާސްކުރެވުމުގެ ސަބަބުންނެވެ. މައިންބަފައިން “އެހެން އެންމެންނަށް ނިސްބަތްވާކަމަށް” ކުދިންނަށް ހީވެ، އެކުދިން ނޭދެވޭ ގޮތްގޮތަށް އަމަލުކުރުމާއި ހަސަދަވެރިވުން އެކަށީގެންވެއެވެ. ކޮންމެ ކުއްޖަކާއެކު ވަކިން ވަގުތު ހޭދަކުރުމަކީ އެކުދިންނާއި މައިންބަފައިންނާ ދެމެދު އޮންނަ ގުޅުމަކީ ތަފާތު އަދި އަގުހުރި ގުޅުމެއްކަން ޔަގީންކޮށްދިނުމުގެ އިތުރުން ކުދިންގެ މެދުގައި އުފެދޭ ހަސަދަވެރިކަން މަދުކުރުމަށް އެހީތެރިވެދޭ ކަމެކެވެ.
2021ވަނަ އަހަރު އިލަނޮއި ޔުނިވަރސިޓީން ކުރި ދިރާސާއަކުން ދައްކާގޮތުގައި، ވަކިވަކިން ސަމާލުކަން ލިބޭނެކަމުގެ ޔަގީންކަން އޮންނަ ކުދިން، ސަމާލުކަން ހޯދުމަށް މަސައްކަތްކުރުމާއި އެހެން ކުދިންނާއި މައްސަލަޖެހުމުގެ ފުރުސަތު ކުޑައެވެ. މައިންބަފައިންނާއެކު އޮންނަ ގުޅުމުގެ ޔަގީންކަން ކުދިންނަށް އިހުސާސްކުރެވޭ ހިނދު، އެހެންކުދިންނަކީ ނުރައްކަލެއްކަމަށް ދެކުމުގެ ފުރުސަތު ކުޑަވެއެވެ.
މުވާސަލާތުކުރުމާއި އަހްލާގު ރަނގަޅުވުން
ވަކިވަކިން ވަގުތު ހޭދަކުރުމުގެ ސަބަބުން ކުދިންނަށް ތަންކޮޅެއް ހުޅުވާލެވިގެން އަދި ތެދުވެރިކަމާއެކު ވާހަކަދެއްކުމުގެ ފުރުސަތު ލިބެއެވެ. ހާއްސަކޮށް އެހެންކުދިންގެ ކުރިމަތީގައި ނުވަތަ އެހެން ބޮޑެތި މީހުންގެ ކުރިމަތީގައި ދައްކަން ލަދުގަންނަ ނުވަތަ ޖެހިލުންވާ މައުޟޫތަކާ ގުޅޭގޮތުންނެވެ. މިއީ ސުވާލުކުރުމަށާއި، ކަންބޮޑުވުންތައް ހިއްސާކުރުމަށް، އަދި މައްސަލަތަކާ ބެހޭގޮތުން ވާހަކަދެއްކުމަށް ރައްކާތެރި މާހައުލަކަށް ވެގެންދެއެވެ.
މީގެ އިތުރުން، ބެލެނިވެރިންނާ ޖަޒުބާތީގޮތުން ގުޅުން އޮންނަ ކުދިން، އަނިޔާވެރިވުމާއި އެކަހެރިވެފައިވާ އަމަލުތައް ދެއްކުމުގެ ފުރުސަތު ކުޑައެވެ. ފެންވަރު ރަނގަޅު ގޮތެއްގައި ވަގުތު ހޭދަކުރުމުން ޖަޒުބާތީގޮތުން ރައްކާތެރިކަން އުފެދެއެވެ. އަދި އެލޯބިވާ ގުޅުން ދެމެހެއްޓުމުގެ ބޭނުމުގައި ރައްކާތެރިކަން އިހުސާސްކުރެވޭ ކުދިންގެ އަމަލުތައްވެސް ރަނގަޅުކުރެއެވެ.
ބިޒީ ޝެޑިއުލްއަކާއެކުވެސް މިކަން ކުރާނެ ގޮތް
މައިންބަފައިންނަށް މިކަން ކުރުމަށް މާގިނަ ހުސްވަގުތުތަކެއް ބޭނުމެއް ނުވެއެވެ. މިއީ ވަގުތުގެ ދިގުމިނަށްވުރެ ވަގުތު ބޭނުންކުރާ ގޮތަށް ބަރޯސާވާ ކަމެކެވެ.
- ކޮންމެ ދަރިއަކަށްވެސް ބެލެނިވެރިޔާއާއެކު ވަގުތު ހޭދަކުރުމަށް ކުރާނެކަމެއް ހޮވުމުގެ ފުރުޞަތު ދިނުން: ބީޗައް ހިނގާލަންދިއުން، އެކުގައި ފިހާރައަކަށް ދިއުން، ވާހަކައެއް ކިޔުން ނުވަތަ އެއްޗެއް ކެއްކުން.
- ނިދަން އޮށޯންނަ ވަގުތު ހާއްސަ ވަގުތުކޮޅެއްގެ ގޮތުގައި ބޭނުންކުރުން: ފަސް މިނިޓު ވާހަކަ ކިޔައިދިނުމަށް (އެއްކޮށް ނިދާ ކުދިންނަށް އެކީ ވާހަކައެއް ކިޔާދިންނަމަވެސް ކޮންމެ ކުއްޖަކާވެސް ވަކިން ވާހަކައާ ގުޅޭގޮތުން އެއްޗެއް ބުނެލުން ނުވަތަ ސުވާލެއްކޮށްލުންފަދަ ކަމެއް ކުރެވިދާނެއެވެ.) ، ލޯބިން ބައްދާލުމަށް، ނުވަތަ އެމީހުންގެ ދުވަހުގެ ވާހަކަ ހިއްސާކޮށްލުމަށް.
- ގޭތެރޭގެ މަސައްކަތްތައް ކުރާއިރު “އެހީތެރިވުމުގެ ވަގުތު” ކުދިންގެ މެދުގައި ބަދަލުކުރަމުން ގެންދިއުން: ހެދުންތައް ފައްޖެހުން، ކެއްކުން، ނުވަތަ ގަސްތަކަށް ކާނާއެޅުން
- ކުޑަކުއްޖަކު ހުރިނަމަ، އެކުއްޖާ ނިދާފައި އޮންނައިރު ނުވަތަ ކުޅެން އިންނަވަގުތު، ބޮޑެތި ކުދިންނަށް ވަގުތުކޮޅުތަކެއް ދިނުން.
މުހިންމު ކަމަކީ، ކުޑަ ވަގުތުކޮޅަކަށް ނަމަވެސް، ސަމާލުކަން އެއްވެސް އެހެން ކަމަކަށް ދޭންނުޖެހޭ ގޮތަށް އެކުދިންނާއެކު ހޭދަކުރުމެވެ.
ކުދިންނަށް ހޯދައިދޭ ކުޅޭއެއްޗެއްސާއި ކައްކައިދޭ ކާތަކެތީގެ މަތިން ކުދިން ހަނދާން ނެތުމަކީ ވަރަށްގާތް ކަމެކެވެ. ނަމަވެސް ބެލެނިވެތިންގެ ފަރާތުން އެކުދިންނަށް ކުރުވި އިހްސާސްތައް އަބަދުވެސް ހަނދާން ހުންނާނެއެވެ. ކުދިންނާއިއެކު ވަކިވަކިން ވަގުތު ހޭދަކުރުމުން އެކުދިންނަށް ދައްކުވައިދެނީ އެމީހުންނަކީ މުހިންމު، ލޯބިލިބިގެންވާ، އަދި ބެލެނިވެރިންގެ ފުރިހަމަ ސަމާލުކަން ލިބިގެންވާ ބައެއްކަމެވެ. ދުރު މުސްތަގުބަލެއްގައި، މިކަމުން އިތުބާރާއި، އަމިއްލަ ނަފްސަށް އޮންނަ ޔަގީންކަމާއި، އަދި ބޮޑުވަމުންދާ އިރު އާއިލީ ގުޅުން ހަރުދަނާވެގެންދެއެވެ.
