އޯޓިޒަމް ހުންނަ ކުދިންގެ އިޖުތިމާއީ ކުރިއެރުން ރަނގަޅުކޮށް، ބަސް ދަސްކުރުމާއި ވާހަކަ ދެއްކުން ކުރިއެރުމަށް ބޭނުން ކުރެވޭ ވަރަށް ފައިދާހުރި އެއް ތެރަޕީއަކީ ޕްލޭ ތެރަޕީއެވެ. ޕްލޭ ތެރަޕީއަކީ ކުޅިވަރުގެ ތެރެއިން، އެކުދިންނަށް އިޖުތިމާއީ ގުޅުން ވަރުގަދަކޮށްދީ، އެހެންމީހުނާ މުއާމަލާތް ކުރުމުގެ ހުނަރު ދަސްކޮށްދިނުމެވެ. މިއީ އެކުދިންނަށް މަޖާ އަދި އުފާވެރި މާހައުލެއްގައި އެކުދިންގެ ދިރިއުޅުމުގެ މުހިންމު ހުނަރުތައް ދަސްކޮށްދެވޭ ވަރުގަދަ ވަސީލަތެކެވެ.
އޯޓިޒަމް ހުންނަ ކުދިންނަށް ޕްލޭ ތެރަޕީ މުހިންމު ވަނީ ކީއްވެ؟
އޯޓިޒަމް ހުންނަ ކުދިންނަށް އާއްމު ގޮތެއްގައި:
- ދޭހަވުމާއި އެހެން މީހުނާ މުއާމަލާތް ކުރުމުގައި ދަތިތަކެއް ހުރެއެވެ.
- ވާހަކަ ދެއްކުމާއި އިޖުތިމާއީ ގުޅުން އުފެއްދުމުގައި ދަތިތަކެއް ހުރެއެވެ.
- އަމިއްލަ އިހުސާސްތައް ބުނެދިނުމުގައި ދަތިތަކެއް ހުރެއެވެ.
- އެހެންމީހުންގެ އިހުސާސްތައް ދެނެގަތުމުގައި އުނދަގޫތަކެއް ހުރެއެވެ.
- އެހެން ކުދިންނާ ގުޅިގެން ކުޅޭ ކުޅިވަރުތައް ކުޅުމަށް ބައެއްފަހަރު އުނދަގޫ ވެއެވެ.
ޕްލޭ ތެރަޕީއަކީ އެކުދިންނަށް ހިތްހަމަޖެހޭ މާހައުލެއްގައި މި ހުނަރުތައް ތަރައްގީ ކުރުމަށް އެހީވެދޭ ކަމެކެވެ. އަދި ކުދިން ޖެހިލުންވުން ކުޑަވެ، އެހެން މީހުނާ އޮންނަ ގުޅުން ބަދަހިވާ ކަމެކެވެ.
ޕްލޭ ތެރަޕީގެ ސަބަބުން އެކުދިންގެ:
- އެހެން މީހުނާ މުޢާމަލާތު ކުރުމުގެ ހުނަރަށް ވަރަށް ބޮޑު ކުރިއެރުމެއް ލިބެއެވެ. ކުޅިވަރުގެ ތެރޭން އެކުދިންނަށް އަމިއްލަ ހިޔާލުތަކާ އިހުސާސްތައް ބުނެދޭން ދަސްވެގެން ދެއެވެ. ރޯލް ޕްލޭ، ޕްރިޓެންޑް ޕްލޭ (ޑޯލް ހައުސް ފަދަ ތަކެތި ބޭނުން ކޮށްގެން ނުވަތަ ބަތްކައްކާ ކުޅުން) އަދި މި ނޫންވެސް، ތަފާތު ކުޅޭ ތަކެތި ބޭނުން ކޮށްގެން އެކި ހާލަތްތައް އުފައްދައިގެން ކުޅޭ ކުޅިވަރުތަކުގެ ތެރެއިން، އެކުދިނަށް އަނގަބަހުން ނުވަތަ އެނޫންގޮތަކުން ވެސް ބުނެދޭން އުނދަގު އިހުސާސްތައް ބުނެދޭން ފަސޭހަވެގެންދެއެވެ.
- އެހެން މީހުނާ މުޢާމަލާތު ކުރުމާއި އެހެން މީހުނާ ގުޅިގެން އުޅުމުގެ ހުނަރު ތަރައްޤީވެއެވެ. ތެރަޕިސްޓް، ރައްޓެހި ކުދިން އަދި ބެލެނިވެރިންނާއެކު ރައްކާތެރި މާހައުލެއްގައި ކުޅޭ ކުޅިވަރުގެ ސަބަބުން އެހެން މީހުންގެ އިހްސާސްތައް ދެނެގަނެ، މުޢާމަލާތު ކުރުމަށް ދަސްވެއެވެ. އަދި އެހެން ކުދިންނާ ގުޅިގެން ކުޅެން އަދި އުޅެން ދަސްވެއެވެ.
- ޖަޒުބާތުތައް ކޮންޓްރޯލު ކުރަން ދަސްވެއެވެ. ޕްލޭ ތެރަޕީގެ ސަބަބުން، ކުދިންނަށް ކަންކަމާ ކުރިމަތިލާ، ބިރުގަތުން ކުޑަވެ، ތަފާތު ޖަޒުބާތުތައް ދެނެގަނެ މެނޭޖްކުރަން ފަސޭހަ ރައްކާތެރި މާހައުލެއް އުފެދިގެން ދެއެވެ.
- ވަކި ގޮތަކަށް ރޭވިގެން ގެންދެވޭ ކުޅިވަރުގެ ތެރެއިން ކުދިންގެ ކިބައިން ފެންނަ ނޭދެވޭ ނުވަތަ ނުރަނގަޅު އަމަލުތައް މަދުވެގެން ދެއެވެ.
ޕްލޭ ތެރަޕީގެ ތަފާތު ވައްތަރުތައް
- ޗައިލްޑް ސެންޓާރޑް ޕްލޭ ތެރަޕީ: މިއީ ކުއްޖާ އަމިއްލައަށް ސެޝަންގައި ހިނގާ ކަންކަން ކޮންޓްރޯލު ކޮށްގެން ކުރިއަށް ގެންދާ ޕްލޭ ތެރަޕީގެ ވައްތަރެކެވެ. މި ވައްތަރުގެ ޕްލޭ ތެރަޕީގައި ކުޅުން ކުރިއަށް ގެންދަންވީ ގޮތް ތެރަޕިސްޓް އިރުޝާދު ދީ ކިޔައިދީގެން ސެޝަން ކުރިއަށް ގެންދިއުމުގެ ބަދަލުގައި ކުއްޖާއަށް އަމިއްލަ އިހުސާސްތައް ބަޔާންކޮށްދީ، ކުއްޖާ ބޭނުންވާ ގޮތައް ކުޅުމަށް މަގުފަހިކޮށްދީ ކުޅުމަށް އަމާން މާހައުލެއް ގާއިމްކޮށްދެއެވެ. ކުއްޖާއަށް އިހުސާސްތަކާއި ތަފާތު ހިޔާލުތައް ފަސޭހައިން ބަޔާންކޮށްދެވޭފަދަ ކުޅޭ ތަކެތި ކުއްޖާއަށް ތެރަޕިސްޓް ދިނުމަށްފަހު، ކުއްޖާ އަމިއްލައަށް ކުޅުމަށް ދޫކޮށްލާނީއެވެ. އަދި، މި ކުޅުމުގެ ތެރޭގައި ބައިވެރިވެ، ކުއްޖާ ކުރާ ކަންކަން ރަނގަޅަށް އޮބްޒާރވްކޮށް، އަޑުއަހާ ކުއްޖާއާއި ހިތްހެޔޮކަމާއިއެކު ބައިވެރިވެ މުޢާމަލާތުކުރުމަށް މަސައްކަތް ކުރާނީއެވެ. އޯޓިޒަމް ހުންނަ ގިނަ ކުދިންނަކީ އެހެންމީހުނާ ވާހަކަ ދައްކާ މުޢާމަލާތު ކުރުމުގައި ދަތިތަކެއް ހުންނަ ކުދިން ކަމުން، ޗައިލްޑް ސެންޓާރޑް ޕްލޭ ތެރަޕީގެ ސަބަބުން، އިތުރު ޕްރެޝަރަކާއި ނުލާ ކަންކަން ބަޔާންކޮށްދީ ގުޅުން ބަދަހިކުރުމަށް ފަސޭހަވެގެން ދެއެވެ.
- ފްލޯ ޓައިމް ތެރަޕީ (ޑީ އައި އާރ މޮޑެލް): މިއީ ކުއްޖާ ކުޅެން އިންނައިރު ކުއްޖާއާއި އެއްހަމައެއްގައި ތަޅުންމަތީ އިށީންދެ ކުއްޖާއާއި އެކު ކުޅުމުގައި ތެރަޕިސްޓް ނުވަތަ ބެލެނިވެރިޔާ ބައިވެރިވެ ކުއްޖާގެ ބައިވެރިވުމާއި ވިސްނުން މަޑުމަޑުން ތަރައްޤީ ކުރުމަށް އެހީތެރިވުމެވެ. މި ވައްތަރުގެ ޕްލޭ ތެރަޕީ ކުރިއަށް ގެންދިއުމުގައި، ކުއްޖާ ޝައުގުވެރިވާ ކުޅިވަރެއްގައި ނުވަތަ ހަރަކާތެއްގައި އިންނަ ވަގުތު، ތެރަޕިސްޓް ނުވަތަ ބެލެނިވެރިޔާ، ކުއްޖާ ސަމާލުކަން ހޯދާ، ކުޅޭ ކުޅިވަރެއްގައި މަޑުމަޑުން ބައިވެރިވެ ކުއްޖާގެ އިތުބާރު ހޯދަން މަސައްކަތް ކުރަނީއެވެ. މިސާލަކަށް، ކުއްޖާ ކުޅޭ ކުޑަ ކާރެއް އަނބުރާލަ އަނބުރާލާ އިންނަ ނަމަ، އެކަން ހުއްޓުވުމުގެ ބަދަލުގައި، ތެރަޕީ ދޭ ފަރާތުންވެސް އެފަދަ ހަރަކާތެއް ކުރަން ފަށާނީއެވެ. މީގެ ސަބަބުން އެ މީހަކުވެސް ކުއްޖާ އެ ކުރާ ކަމަށް ޝައުގުވެރިވާކަން ކުއްޖާއަށް އިހުސާސްކުރެވި، އެ ކުއްޖާގެ އިތުބާރު ލިބެން ފަށައެވެ. ކުއްޖާގެ އިތުބާރު ލިބުމަށްފަހު، ދެފަރާތައް ވާހަކަ ދެއްކުމަށް މަގުފަހިވާފަދަ ޖުމްލަތައް ބޭނުންކޮށްގެން ކުއްޖާއާއި އިތުރަށް މުއާމަލާތްކޮށް، އެކީގައި ކުޅުމަށް މަސައްކަތް ކުރާނީއެވެ. ކުއްޖާގެ ބައިވެރިވުން އިތުރުވާ ވަރަކަށް، ކުއްޖާގެ ވިސްނުން އިތުރަށް ބޭނުން ކުރަން ޖެހޭފަދަ ސުވާލުތައް ކުއްޖާއާއި ކުރިމަތި ކުރުވައެވެ. މިސާލަކަށް، ކާރު ދެން ދާނީ ކޮންތާކަށްތޯ ނުވަތަ ކާރު ތަނެއްގައި ޖެހިއްޖެނަމަ ދެން ވާނީ ކިހިނެއްތޯ އަހާ ކުއްޖާގެ ޖަވާބު ހޯދަން މަސައްކަތް ކުރެވިދާނެއެވެ. މީގެ ސަބަބުން ކުއްޖާގެ ވިސްނުމުގެ ހުނަރާއި ކަންކަން ހައްލު ކުރުމުގެ ހުނަރުގެ އިތުރުން އެހެން މީހުނާއި މުއާމަލާތް ކުރުމުގެ ހުނަރު ކުރިއަރައިގެންދެއެވެ.
- ޕްލޭ ބޭސްޑް އެޕްލައިޑް ބިހޭވިއަރ އެނަލިސިސް: މިއީ އެޕްލައިޑް ބިހޭވިއަރ އެނަލިސިސް އާއި ކުޅިވަރާއި ގުޅުވާލައިގެން ކުރިއަށް ގެންދާ ތެރަޕީއެކެވެ. މަޖާ ކުޅިވަރުތަކާއި ހަރަކާތްތަކުގެ ތެރެއިން ކުދިންނަށް ހިތްވަރު ދިނުމުގެ ބަހަކުން ނުވަތަ ހަރަކާތަކުން ކުއްޖާގެ ޝައުގުވެރިކަން ހޯދާ، ކުއްޖާގެ އިޖުތިމާޢީ އަދި މުޢާމަލާތުކުރުމުގެ ހުނަރު އިތުރުކުރުމެވެ. މިސާލަކަށް، ކުޅިވަރުގެ ތެރެއިން،ކުއްޖާ ބޭނުންވާ ކަމެއް ނުވަތަ އެއްޗެއް އަނގަބަހުން ނުވަތަ އިޝާރާތުން ބުނެދިނުމުން އަތްތިލަބަޑިއެއް ޖެހުން ނުވަތަ ވަރަށް ރަނގަޅޭ ފަދަ އެއްޗެއް ބުނުން. މީގެ ސަބަބުން ތަފާތު ހުނަރުތައް ކުއްޖާއަށް ދަސްވެ، އިތުރު ޕްރެޝަރަކާއި ނުލާ، އެހެން މީހުނާ މުޢާމަލާތުކޮށް ގުޅުން ބަދަހިކުރުމަށް ހިތްވަރު ލިބިގެން ދެއެވެ.
- ލެގޯ ތެރަޕީ: ލެގޯތެރަޕީއަކީ ޓީމެއްގެ ގޮތުގައި އެއްކުއްޖަކަށްވުރެ ގިނަ ކުދިން ހިމަނައިގެން ލެގޯ ބްލޮކްސް ބޭނުން ކޮށްގެން މޮޑެލް ހެދުމުގެ ތެރެއިން ދެވޭ ތެރަޕީއެކެވެ. މީގެ ސަބަބުން ކުދިންނާއި ވާހަކަ ދެއްކުމާއި، އެއްކުއްޖަކު އަނެއްކުއްޖަކަށް ފުރުޞަތުދިނުމާއި، ޓީމެއްގެ ގޮތުގައި މަސައްކަތް ކުރުމާއި އަދި މައްސަލަ ހައްލުކުރުމުގެ ހުނަރު ކުދިންގެ ގައިގައި ހަރުލެއްވުމަށް އެހީތެރިވެދެއެވެ.
އޯޓިޒަމް ކުދިންނަށް ޕްލޭ ތެރަޕީ ދިނުމުގެ ފައިދާތައް
ޖާރނަލް އޮފް އޯޓިޒަމް އެންޑް ޑިވެލޮޕްމެންޓަލް ޑިސްއޯރޑާރސް ގައި 2020 ވަނަ އަހަރު ޝާއިއު ކުރެވިފައިވާ ގޮތުގައި އޯޓިޒަމް ކުދިންގެ ތެރެއިން ޕްލޭ ތެރަޕީ ދޭ ކުދިންގެ އިޖްތިމާއީ ހުނަރަށް ވަރަށް ބޮޑަށް ކުރިއެރުން ލިބ އަދި އެ ކުދިން ތަފާތު ޖަޒުބާތުތައް ފަސޭހައިން ދެނެގަންނަން ފަށައެވެ. މީގެ އިތުރުން، ޕްލޭ ތެރަޕީގެ ސަބަބުން، ކުއްޖާގެ ވާހަކަ ދެއްކުމާއި މުޢާމަލާތް ކުރުމުގެ ހުނަރު ކުރިއަރައެވެ. އަދި، އެހެން މީހުނާއި ހަތަރުކަޅި ހަމަކޮށް، އިހްސާސްތައް ބަޔާންކޮށްދިނުމަށް ދަސްވެއެވެ. މީގެ އިތުރުންވެސް، އަމިއްލަ ނަފްސައް އޮންނަ އިތުބާރު ބޮޑުވެ، ނޭދެވޭ އަމަލުތަކާ ކުއްޖާ ދުރުކޮށްދެއެވެ. އަދި އެކުވެރިންނާއި، ބެލެނިވެރިންނާ އޮންނަ ގުޅުން ރަނގަޅުވެ، އެހެން މީހުނާއެކީ އުޅެން ދަސްވެއެވެ.
ކާމިޔާބު ޕްލޭ ތެރަޕީއަކަށް އަސަރު ކުރާ ކަންކަން
ޕްލޭ ތެރަޕީއެއް ކާމިޔާބުވުމަށް މުހިންމު ބައެއް ކަންކަމުގެ ތެރޭގައި، ވީހާވެސް ޅަ އުމުރުގައި ތެރަޕީ ފެށުން، ބެލެނިވެރިންގެ ބައިވެރިވުން ގަވައިދުން ލިބެމުން ދިއުން، އެކުއްޖެއްގެ ހާލަތާ ގުޅޭގޮތަށް ހާއްސަކޮށްގެން ތެރަޕީ ކުރިއަށް ގެންދިއުން އަދި ތެރަޕިސްޓް ގެ ހުނަރާއި ފެންވަރު ހިމެނެއެވެ.
ޕްލޭ ތެރަޕީއަކީ އޯޓިޒަމްގެ މައި ސިފަތަކުގެ ތެރޭގައި ހިމެނޭ ވާހަކަ ދެއްކުމާއި މުޢާމަލާތް ކުރުމުގެ ދަތިކަމަށް ވަރަށް ބޮޑު ކުރިއެރުމެއް ހޯދާދޭ ކަމެކެވެ. ކޮންމެ ކުއްޖަކީވެސް ތަފާތު ކުއްޖެއް ކަމުން، އެކި ކުދިންނަށް ތެރަޕީގެ އަސަރުކުރާ މިންވަރު ތަފާތު ވެދާނެއެވެ. ރަނގަޅަށް ޓްރެއިނިން ލިބިފައިވާ ތެރަޕިސްޓެއްގެ އެހީތެރިކަން ހޯދައިގެން ތެރަޕީގެ ކަންކަން ކުރިއަށް ގެންދިއުމަކީ އެދެވިގެންވާ ކަމެކެވެ.
