އުނގެނުމުގައި އެކިކުދިންނަށް ފަސޭހަވަނީ އެކި ގޮތްތަކެވެ. އެހެންކަމުން އެކިކުދިންގެ އުނގެނުމުގެ ސްޓައިލް / ގޮތްތައް ތަފާތެވެ. ދަރިފުޅަށް އެންމެ ރަނގަޅަށް މައުލޫމާތުތައް ނަގައިގަނެވެނީ ކޮން ގޮތަކުންކަން ދެނެގަތުމަކީ މައިންބަފައިންނަށް ވަރަށް މުހިއްމު އަދި ބޭނުންތެރި ކަމެކެވެ. އުނގެނުމުގެ ތަފާތު ގޮތްތަކާ ބެހޭގޮތުން އާންމުކޮށް އެންމެ މަޝްހޫރު އޮނިގަނޑަކީ ވާރކް (VARK) މޮޑެލްއެވެ. މި މޮޑެލްގައި އުނގެނުމުގެ ހަތަރު މައިގަނޑު ސްޓައިލެއް ހިމެނެއެވެ. އެއީ: ވިޝުއަލް، އޯޑިޓަރީ، ރީޑިންގ/ރައިޓިންގ، އަދި ކިނިސްތެޓިކްއެވެ. އެއްވެސް ކުއްޖަކީ މި ސްޓައިލް ތަކުގެ ތެރެއިން ހަމައެކަނި އެއްކެޓެގަރީއަކަށް ފެތޭ ކުދިންނެއްނޫނެވެ. ދަރިފުޅަށް އުނގެނުމަށް އެންމެ ފަސޭހަ ގޮތް ދެނެގަތުމަކީ ގޭގައާއި ސްކޫލުގައި އެ ކުއްޖަކަށް އެހީތެރިވުމަށް ފަސޭހަވެގެންދާނެ ކަމެކެވެ.
ވިޝުއަލް ލާނާރސް (ފެނުމުން ދަސްކުރަން ފަސޭހަ ކުދިން)
ވިޝުއަލް ސްޓައިލްއަށް އުނގެނެން ފަސޭހަ ކުދިންނަށް މައުލޫމާތު އެންމެ ރަނގަޅަށް ވިސްނެނީ އެ މައުލޫމާތެއް ފެންނަ ގޮތަށް ހުރުމުންނެވެ. މިފަދަ ކުދިންނަށް ކުރެހުންތަކާއި، ޑައިގްރަމްތަކާއި، ކުލަތަކާއި، އަދި މިނޫންވެސް މަންޒަރު ސިފަވާގޮތަށް ދައްކުވައިދޭ ޕްރެޒެންޓޭޝަން ފަދަ ތަކެތީގެ އެހީގައި އުނގެނުމަށް ފަސޭހަވެއެވެ. މިކުދިން އާނމުކޮށް ކުރެހުން ހުންނަ ފޮތްތަކާއި، އާޓް ޕްރޮޖެކްޓްތަކަށް ޝައުގުވެރިވެއެވެ. މިފަދަ ކުދިންނަށް ހަމައެކަނި އަޑުއަހައިގެން މައުލޫމާތު ދެނެގަތުމަށްވުރެ، އެމައުލޫމާތު ފެންނަގޮތަށް ހުށަހެޅުމުން ހަނދާނުގައި ބަހައްޓަން ފަސޭހަވެއެވެ.
މިކުދިންނަށް އެހީތެރިވުމަށްޓަކައި، އާންމުކޮށް ކޮށްއުޅޭ ކަންތައްތަކުގެ ތެރެއަށް ކުރެހުމާއި، ނޯޓު ތައްޔާރުކުރުމުގައި ތަފާތު ކުލަތައް ހުންނަ ކަރުދާސް ބޭނުންކުރުމާއި އަދި ތާވަލުތައް ތައްޔާރުކުރުމަކީ ކުރެވިދާނެކަމެކެވެ. ނަގައިގަންނަން އުނދަގޫ މައުލޫމާތުތައް، ކިޔެވުމަށް ނުވަތަ އުނގެނުމަށް ހާއްސަކޮށް ތައްޔާރުކޮށްފައި ހުންނަ ވީޑިއޯތަކާއި، ސްޓޯރީބޯޑުތަކާއި، އަދި ޗާޓުތަކުން ފަސޭހައިން ވިސްނުމަށް ގެނައުމަށް އެހީތެރިވެދޭނެއެވެ. ދަރިފުޅު ކުރެހުމަށް ޝައުޤުވެރިވާނަމަ، އެއީ އެ ކުއްޖާ އުނގެނޭ އެއްޗެއްސާއި ފެންނަ މަންޒަރުގެ އަލީގައި ގުޅުން އުފެދެމުންދާކަން އެނގޭ ނިޝާނެކެވެ. އެހެންކަމުން އެކަމަށް ހިތްވަރުދިނުމަކީ ރަނގަޅު ކަމެކެވެ.
އޯޑިޓޯރީ ލާނާރސް (އަޑުއަހައިގެން އުނގެނޭ ކުދިން)
އަޑުއަހައިގެން ދަސްކުރުމަށް ފަސޭހަ ކުދިންނަށް އެންމެ ރަނގަޅަށް މައުލޫމާތު ދެނެގަނެވެނީ އަޑުއެހުމުންނެވެ. މިކުދިން އާންމުކޮށް ޝައުގުވެރިވަނީ އަޑުތަކަށާއި، މިއުޒިކަށާއި، ދެކެވޭ ވާހަކަތަކަށެވެ. އެކުދިން ވާހަކަ އަޑުއެހުމާއި، ލަވަކިޔުމާއި، އެކުދިންގެ ހިޔާލު ފާޅުކޮށް ވާހަކަ ދެއްކުމަށް ލޯބިކުރެއެވެ. އާ އެއްޗެއް ދަސްކުރުމުގައި، އަޑުއަހައިގެން އުނގެނޭ ދަރިވަރުންނަށް ގިނަފަހަރު އެންމެ ފައިދާކުރަނީ އަމިއްލައަށް މަޑުމަޑުން އެކިޔުމުގެ ބަދަލުގައި އަޑުބާރުކޮށް އެއެއްޗެއް ތަފްސީލުކޮށް ކިޔައިދިނުމުންނެވެ.
މިކުދިންނަށް އުނގެނުމުގައި އެހީތެރިވުމުގެ ގޮތުން ބާރަށް ފޮތް ކިޔައިދިނުމާއި، އެކި މައުޟޫއުތަކާ ބެހޭގޮތުން ވާހަކަދައްކައި މަޝްވަރާކުރުމާއި، ނުވަތަ މުހިންމު ކަންތައްތައް ހަނދާނުގައި ބެހެއްޓުމަށް ރާގާއި ލަވަތައް ބޭނުންކުރެވިދާނެއެވެ. ދަރިފުޅު އުނގެނެމުންދާ އެއްޗަކާ ބެހޭގޮތުން ވާހަކަދެއްކުމަށް ހިތްވަރުދިނުމަކީވެސް ކުރެވިދާނެކަމެކެވެ. އަދި ދަސްކުރަމުންދާގަޑީގައި އެކުދިންގެ އަޑު ރެކޯޑުކޮށް އެއަޑުއެހުން ނުވަތަ ދަސްކުރާ ފިލާވަޅުތަކާއި ގުޅޭ ޕޮޑްކާސްޓްތައް އަޑުއެހުމަކީވެސް ފައިދާހުރި ކަމެކެވެ. މިކުދިން އެންމެ ރަނގަޅަށް ނުވަތަ އެންމެ ފަސޭހައިން ދަސްކުރަނީ އެހެންމީހުންގެ ވާހަކަތައް އަޑުއިވި އަދި މަޝްވަރާތަކުގައި ބައިވެރިވެވޭ ފަދަ ގްރޫޕް މާހައުލުތަކުގައެވެ.
ރީޑިންގ / ރައިޓިންގ (ކިޔުމާއި ލިޔުމުން އުނގެނޭ ކުދިން)
ކިޔުމާއި ލިޔުމުގެ ސްޓައިލަށް އިސްކަންދޭ ކުދިން އެންމެ ރަނގަޅަށް އެއްޗެއް ދަސްކުރެވެނީ މައުލޫމާތު ކިޔައިގެން ނުވަތަ ލިޔެގެންނެވެ. މިކުދިން އާންމުކޮށް ފޮތް ކިޔުމަށާއި، ލިސްޓު ހެދުމަށާއި، ވާހަކަ ލިޔުމަށާއި، އަދި ދިރާސާކުރުމަށް ލޯބިކުރެއެވެ. މައްސަލައެއް ހައްލުކުރަން މަސައްކަތްކުރާއިރު، އެންމެ ފުރަތަމަކަމަކަށް ލިޔާނެ އެއްޗަކާއި ކަރުދާހެއް ހޯދުމަކީ މިކުދިންގެ ކިބައިން ފާހަގަ ވެދާނެކަމެކެވެ.
ކިޔުމާއި ލިޔުމުން އުނގެނޭ ކުއްޖަކަށް އެހީތެރިވުމަށްޓަކައި، ކިޔުމަށް ބޭނުންކުރެވޭނެ ތަކެތި ގިނައިން ހޯދައިދެވިދާނެއެވެ. މީގެ ތެރޭގައި ހަގީގީ ވާހަކަތަކާއި ހިޔާލީވާހަކަތައް އަދި ކަންކަން ކުރާނެގޮތުގެ މައްޗަށް ތައްޔާރުކޮށްފައިވާ ފޮތްތަކާއި ތަފާތު ލިޔުންތައް ހިމެނެއެވެ. ޑައިރީ ލިޔުމަށާއި، ރިޕޯޓު ލިޔުމަށް، ނުވަތަ ބޮޑެތި ކުދިންނަށް ބްލޮގް ލިޔުމަށްވެސް ހިތްވަރުދެވިދާނެއެވެ. ފްލޭޝްކާޑުތަކާއި، ލޭބަލްކޮށްފައިވާ ކުރެހުންތަކާއި، ލިޔެފައިވާ އިރުޝާދުތަކަކީ މިކުދިންނަށް އުނގެނުމުގައި ވަރަށް ބޭނުންތެރި އެއްޗެއްސެވެ. ދަސްކުރާތަކެތި އަމިއްލަ އިބާރާތުން ލިޔުމަކީ ވަރަށް ފަރިތަކޮށް ރަނގަޅަށް އާންމުގޮތެއްގައި މިކުދިން ކުރާކަމެކެވެ.
ކިނިސްތެޓިކް ލާނަރސް (އަމަލީ ތަޖުރިބާއިން ކަންކަން ދަސްކުރުން)
މިސްޓައިލަށް ކަންކަން ދަސްކުރުމަށް ފަސޭހަ ކުދިންނަށް އެންމެ ރަނގަޅަށް ކަންކަން ނަގައިގަނެވެނީ އަމަލީ ތަޖުރިބާތަކުގެ ތެރެއިންނެވެ. އެކުދިން އުނގެނެނީ ކަންކަން ކުރުމުގެ ތެރެއިންނެވެ. ތަކެތި އުފެއްދުމާއި،ކަންކަން ތަޖުރިބާކުރުމާއި، ތަމްސީލުކުޅުން / އެކްޓު ކުރުން، ނުވަތަ ޖިސްމާނީގޮތުން އެއެއްޗަކާއި ކޮންޓެކްޓް ވެގެންނެވެ. މިކުދިންނަކީ އާންމުކޮށް މަޑުން ތިބުމަށް އުނދަގޫ އަދި ވަރަށް ހަރަކާތްތެރި ކުދިންތަކެއްކަން ފާހަގަ ކުރެވެއެވެ. އެކުދިންގެ ހިއްސުތަކާއި ގުނަވަންތައް ބޭނުންކޮށްގެން ކަންކަން ދަސްކުރެވޭ ފަދަ މާހައުލަކީ މިކުދިންނަށް އެންމެ ކަމުދާ މާހައުލެވެ.
މިކުދިންގެ އުނގެނުމަށް އެހީތެރިވުމަށްޓަކައި، އަމަލީ ތަޖުރިބާތަކުގެ ފުރުސަތު ދިނުމަކީ މުހިންމު ކަމެކެވެ. މިސާލަކަށް ސައިންސް އެކްސްޕެރިމެންޓްތަކާއި، ގެއިންބޭރުގައި ކުރެވޭފަދަ ބައެއް ހަރަކާތްތަކާއި، ކްރާފްޓް ހެދުންފަދަ އެއްޗެހި އުފެއްދުމުގެ ހަރަކާތްތަކާއި، ތަމްސީލުކުޅުން ނުވަތަ އެކްޓްކުރުން ފަދަ ކަންކަމަކީ އުނގެނުމަށް އެހީތެރި ވުމުގެ ގޮތުން ކުރެވިދާނެ ބައެއް ކަންކަމެވެ. ކިޔެވުމުގެ ވަގުތު ކުރު ސެޝަންތަކަކަށް ބަހާލައި، އޭގެ ދެމެދުގައި ގިނަގިނައިން ހަރަކާތްތެރިވުމުގެ ހުސްވަގުތުކޮޅެއް ދިނުމުންވެސް އެކުދިންނަށް ސަމާލުކަން ދެމެހެއްޓުމަށް އެހީތެރިވެދޭނެއެވެ.
ބައެއް ކުދިންނަކީ ވަކި ސްޓައިލަކަށް އުނގެނުމަށް އިސްކަންދޭ ކުދިން ނަމަވެސް، ގިނަ ކުދިންނަކީ އެއް ސްޓްއިލަކަށްވުރެ ގިނަ ސްޓައިލްތައް ބޭނުންކޮށްގެން އުނގެނޭ ކުދިންނެވެ. އެވަގުތަކާ ގުޅޭގޮތުން އުނގެނުމުގެ އެކި ސްޓައިލްތައް އެކުދިން ބޭނުންކުރެއެވެ. މިސާލަކަށް، ކުއްޖަކަށް ހިސާބު އެންމެ ފަސޭހައިން ދަސްވަނީ ލިޔެގެން އަދި ކުރަހައިގެން ކަމުގައި ވެދާނެއެވެ. އެހެންނަމަވެސް ހިސްޓްރީ ފަދަ މާއްދާތައް ދަސްކުރަން އެންމެ ފަސޭހައީ ވާހަކަތަކަށް އަޑުއަހައިގެން ކަމުގައި ވެދާނެއެވެ.
ވިސްނާލަންޖެހޭ މުހިންމު ކަމަކީ އުނގެނުމުގެ ސްޓައިލްތަކަކީ ބަދަލުނުވާ ގޮތަށް ކަނޑައެޅިފައިވާ އެއްޗެއް ނޫންކަމެވެ. ދަރިފުޅުގެ ކިޔެވުމުގެ ސްޓައިލް ވަގުތު ބަދަލުވަމުންދާގޮތުން ނުވަތަ ތަފާތު މާއްދާތަކަށް ތަފާތު ސްޓައިލްތަކަށް ބަދަލުވެދާނެއެވެ. އެހެންކަމުން އެކުދިން ވަކި ސްޓައިލަކަށް އުނގެނުމަށް ބާރުއެޅުމުގެ ބަދަލުގައި، އުނގެނުމުގެ ސްޓައިލްތަކަކީ އެހީތެރިވެދޭ މަގެއްގެ ގޮތުގައި ދެކޭށެވެ. އެންމެ މުހިންމު ކަމަކީ އެކުދިންގެ ކުރިއެރުމަށް އެހީތެރިވެދިނުމާއި، އިތުބާރު އުފެއްދުމާއި، އުނގެނުމަކީ އުފާވެރި ތަޖުރިބާއަކަށް ހެދުމެވެ.
ދަރިފުޅު އުނގެނުމަށް ޝައުގުވެރިވާ ގޮތް އެނގުމަކީ ގޭގައި ފިލާވަޅުތައް ހެދުމުގައި އެހީތެރިވެދިނުމުގައާއި، ބައިވެރިވާނެ އިތުރުހަރަކާތްތައް ކަނޑައެޅުމުގައާއި، ހިޔާލުތައް ހިއްސާކުރުމުގައި ވަރަށް ބޮޑު ތަފާތެއް ގެނެސްދޭނެ ކަމެކެވެ. އެކުދިންނަކީ މަތީގައި ފާހަގަކުރެވުނު ކޮންމެ ސްޓައިލަކަށް އުނގެނުމަށް ފަސޭހަ ކުދިންކަމުގައި ވިޔަސް، ކޮންމެ ކުއްޖަކަށްވެސް ތަބީއީ ގޮތުން އުފާވެރި، ހިތްހަމަޖެހޭ މާހައުލެއްގައި އުނގެނުމުގެ ފުރުސަތު ފަހިކޮށްދިނުމަކީ ފައިދާ ކުރާނެ ކަމެކެވެ. މައިންބަފައިންގެ ހައިސިއްޔަތުން އެކުދިންނަށް ކުރިއަށް ދެވޭނެ މަގު ސުކޫލު ދައުރުގައާއި އަދި މުޅި ދިރިއުޅުމުގައިވެސް ފަހިކޮށްދެވޭނެއެވެ.
